পাকিস্তানৰ প্ৰাক্তন প্ৰধানমন্ত্ৰী (Former Prime Minister of Pakistan) ইমৰান খানক গ্ৰেপ্তাৰ (Imran Khan arrested)। মঙলবাৰে পুৱা ইছলামবাদ উচ্চ ন্যায়ালয়ৰ সন্মুখৰ পৰা পাক অৰ্ধসামৰিক ৰেঞ্জাৰসকলে তেওঁক নিজৰ জিম্মাত লয়।
ভূমি কেলেংকাৰীৰ সৈতে জড়িত গোচৰৰ বাবে পাকিস্তান তেহৰিক-এ-ইনছাফৰ অধ্যক্ষ ইমৰাণক গ্ৰেপ্তাৰ কৰা হৈছে বুলি প্ৰশাসনৰ সূত্ৰই প্ৰকাশ কৰিছে।
গ্ৰেপ্তাৰৰ পিছত ইমৰাণক ৰেঞ্জাৰসকলে প্ৰহাৰ কৰাৰো অভিযোগ। ইয়াৰ পিছতে তেওঁক এখন গাড়ীত উঠাই অচিনাকি স্থানলৈ লৈ যোৱা হয় বুলি স্থানীয় সংবাদ মাধ্যমৰ বাতৰিত প্ৰকাশ পাইছে।
ইমৰাণৰ দল পাকিস্তান তেহৰিক-এ-ইনছাফৰ উপ-সভাপতি ফাৱাদ চৌধুৰীয়ে কয় যে ইমৰাণক পাকিস্তান ৰেঞ্জাৰে বলপূৰ্বকভাৱে লৈ গৈছে। তেওঁৰ অধিবক্তা ফৈজল চৌধুৰীকো আক্ৰমণ কৰা হয়। কিন্তু প্ৰশাসনৰ সূত্ৰৰ মতে, গ্ৰেপ্তাৰৰ পিছত ইমৰাণক উচ্চ ন্যায়ালয়ৰ চৌহদৰ বাহিৰলৈ লৈ গৈ ৰেঞ্জাৰসকলে আৰক্ষীক গতাই দিয়ে।
শেহতীয়াকৈ আল কাদিৰ ট্ৰাষ্টৰ মাটি দখল কৰাৰ অভিযোগত ইমৰাণৰ বিৰুদ্ধে এফআইআৰ দাখিল কৰা হৈছিল। সেই গোচৰৰ জামিন বিচাৰি মঙলবাৰে পুৱা ইছলামবাদ উচ্চ ন্যায়ালয়লৈ গৈছিল। ইমৰাণৰ সমৰ্থকে গ্ৰেপ্তাৰত বাধা দিয়াৰ লগে লগে উচ্চ ন্যায়ালয়ৰ চৌহদত তেওঁলোকৰ সৈতে ৰেঞ্জাৰছৰ সংঘৰ্ষ হয়।
ইয়াৰ পূৰ্বে নিম্ন আদালতে সেই গোচৰত তেওঁৰ বিৰুদ্ধে গ্ৰেপ্তাৰৰ পৰোৱানা জাৰি কৰিছিল। অভিযোগ অনুসৰি, ইমৰাণ আৰু তেওঁৰ পত্নী মানেকাৰ মালিকানাধীন ট্ৰাষ্টে প্ৰধানমন্ত্ৰী হৈ থকাৰ সময়ত এটা বাণিজ্যিক কোম্পানীৰ পৰা প্ৰায় ৫৩ কোটি টকাৰ মাটি অবৈধভাৱে লৈছিল।
