মন্ত্ৰী নন্দিতাই পৰিদৰ্শন কৰিলে চৰকাৰী বিদ্যালয় : ছাত্ৰ-ছাত্ৰীৰ সৈতে মত-বিনিময়

অসম চৰকাৰৰ শক্তি, নৃতত্ত্ব, ক্ৰীড়া আৰু যুৱ কল্যাণ দপ্তৰৰ মন্ত্ৰী নন্দিতা গৰ্লোচা (Minister Nandita Garlosa) আজি হঠাৎ আহি ডিফু চৰকাৰী বালক উচ্চতৰ মাধ্যমিক বিদ্যালয় (Diphu Government Boys Higher Secondary School) আৰু বালিকা বিদ্যালয়ত (Girls’ School) উপস্থিত (Present) হয়৷ মন্ত্ৰীগৰাকীয়ে বিদ্যালয় দুখন পৰিদৰ্শন কৰি ছাত্ৰ-ছাত্ৰীৰ লগত মত-বিনিময় কৰাৰ লগতে শিক্ষাগুৰুসকলৰ লগতো মত বিনিময় কৰে৷ চৰকাৰী বালক বিদ্যালয়ৰ দ্বাদশ শ্ৰেণীত উপস্থিত হৈ ছাত্ৰ-ছাত্ৰীক বিভিন্ন প্ৰশ্ন কৰাৰ লগতে পৰবৰ্তী সময়ত আহিলে প্ৰাণীবিজ্ঞানৰ এটা শ্ৰেণীত তেওঁ পাঠদান কৰিম বুলি কয় ৷

একেদৰে দশম শ্ৰেণীৰ ছাত্ৰ-ছাত্ৰীসকলৰ লগত মত-বিনিময় কৰি পঢ়াৰ বাহিৰে কোনে কোনে খেলাধূলা কৰি ভাল পাই, কাৰ প্ৰফেচনেল খেলুৱৈ হোৱাৰ মন আছে জানিব বিছাৰে৷ এগৰাকী ছাত্ৰই তেওঁ প্ৰফেচনেল ফুটবল খেলুৱৈ হ’ব বুলি কয়৷ আন কেইবাগৰাকী ছাত্ৰ-ছাত্ৰীয়ে বিভিন্ন খেলৰ প্ৰতি থকা নিজৰ আগ্ৰহৰ কথা দোহাৰে৷ মন্ত্ৰীগৰাকীয়ে কিদৰে খেলক প্ৰফেচন হিচাবে লৈ জীৱনৰ বাটত আগবাঢ়িব পাৰি তাক কয়৷

উল্লেখ যে এসময়ক কলেজৰ প্ৰবক্তা নন্দিতা গাৰ্লোচাই এতিয়াও হাফলঙলৈ গ’লে সময় পালেই কলেজত এটা ক্লাছ কৰি সুখ অনুভৱ কৰে৷ মন্ত্ৰী নন্দিতা গাৰ্লোচা বিদ্যালয়লৈ আহি ছাত্ৰ-ছাত্ৰীৰ লগত মত বিনিময় কৰাত অধ্যক্ষ হিলাৰী তেৰাঙে ধন্যবাদ জ্ঞাপন কৰে৷