২০০০ টকাৰ নোট (Rs 2,000 notes) বজাৰত নাথাকিব বুলি জাৰি কৰা হৈছিল নিৰ্দেশ। ফলত দেশৰ জনসাধাৰণে তেওঁলোকৰ হাতত থকা ২০০০ টকাৰ নোট বেংকত জমা দিয়ে। কিন্তু তাৰ মাজতে প্ৰকাশ পাইছে অন্য এক খবৰ। শুকুৰবাৰে আৰবিআয়ে (RBI) জনোৱা মতে, বজাৰত এতিয়াও প্ৰচলিত হৈ আছে ন হাজাৰ সাতশ ষাঠি কোটিৰ দুহাজাৰ টকীয়া নোট। ৯৭.২৬ শতাংশ নোট অক্ষত অৱস্থাত বেংকলৈ ঘূৰি আহে। কিন্তু এতিয়াও ইমান সংখ্যক নোট আহিবলৈ বাকী (Notes are yet to return to the bank) আছে।
১৯ মে’ত আৰবিআয়ে ঘোষণা কৰিছিল যে ২০০০ টকীয়া সকলো নোট বজাৰৰ পৰা উলিওৱা হ’ব। কিন্তু এতিয়াও বজাৰত থকা ২০০০ টকীয়া নোটৰ পৰিমাণক লৈ চিন্তিত হৈ পৰিছে আৰবিআই। ২০০০ টকীয়া সকলো নোট জমা দিয়াৰ শেষ তাৰিখ আছিল ৩০ ছেপ্টেম্বৰ। পিছলৈ এই সময়সীমা ৭ অক্টোবৰলৈ বৃদ্ধি কৰা হয়। উল্লেখযোগ্য যে ২০১৬ চনত প্ৰথমবাৰৰ বাবে বজাৰলৈ আহিছিল ২০০০ টকীয়া নোট। সেই সময়ত বজাৰৰ পৰা এহাজাৰ আৰু পুৰণি পাঁচশ টকীয়া নোট বাতিল কৰা হৈছিল।
