ৰাষ্ট্ৰপতিৰ শাসনৰ অন্ত পৰাৰ পাছত মণিপুৰত নতুন চৰকাৰ আহিছে যদিও হিংসা বন্ধ হোৱা (Manipur Violence) নাই। কামজোং জিলাৰ থাৱাই কুকি গাঁৱত দুজন কুকি লোকক হত্যা কৰাৰ ঘটনাই উত্তৰ-পূবৰ বিজেপিশাসিত ৰাজ্যখনত পুনৰ উত্তেজনাৰ সৃষ্টি কৰিছে।
আৰক্ষীয়ে জনোৱা মতে, বুধবাৰে থাৱাই কুকি গাঁৱৰ নিবাসী থেংগিন বাইটে আৰু উখৰুল জিলাৰ শংকাইৰ বাসিন্দা থাংবইমাং খোংছাইক অচিনাক্ত দুষ্কৃতিকাৰীয়ে অপহৰণ কৰে।
বৃহস্পতিবাৰে তেওঁলোকৰ মৃতদেহ উদ্ধাৰ হোৱাৰ পিছতে পাহাৰীয়া অঞ্চলটো পুনৰ উত্তেজিত হৈ উঠে। মণিপুৰৰ মুখ্যমন্ত্ৰী যুমনাম খেমচান্দে কয় যে তেওঁৰ চৰকাৰে এই ঘটনাৰ নিয়াৰ তদন্ত কৰিবলৈ সিদ্ধান্ত লৈছে। কিন্তু পাহাৰীয়া অঞ্চলটোত কাৰ্যতঃ মেইটেৰ কোনো সংগঠন নাই। ইতিমধ্যে এই হত্যাকাণ্ডৰ আঁৰত নগা উগ্ৰপন্থীৰ ভূমিকা পোহৰলৈ আহিছে।
বিগত চাৰি বছৰে মেইটেই-কুকী সংঘাতত উত্তপ্ত হৈ থকা মণিপুৰত আচলতে এইটোৱেই প্ৰথমবাৰৰ বাবে নগা গোটৰ ভূমিকাক লৈ অভিযোগ উত্থাপন হৈছে। বুধবাৰে উখৰুল জিলাৰ মপিথেল পাহাৰীয়া অঞ্চলত দুটা সশস্ত্ৰ গোটৰ মাজত গুলীয়াগুলী সংঘটিত হয়। মণিপুৰৰ গৃহমন্ত্ৰী কে গোবিন্দছে ইংগিত দিছে যে কুকি আৰু নগা সশস্ত্ৰ সংগঠনৰ মাজত হোৱা বিবাদৰ বাবেই এই ঘটনা সংঘটিত হৈছে।
এই ঘটনাৰ প্ৰতি সঁহাৰি জনাই ২১ জন নগা গাঁৱৰ লোকক অপহৰণ কৰা বুলিও তেওঁ জানিবলৈ দিয়ে। বৃহস্পতিবাৰে নিশা তেওঁলোকক মুকলি কৰি দিয়া হয়। উল্লেখ্য যে কুকিসকলৰ দৰে নগাসকলো খ্ৰীষ্টান। মূলতঃ তেওঁলোক মণিপুৰৰ সেনাপতি আৰু উখৰুল নামৰ পাহাৰীয়া জিলা দুখনতে বাস কৰে।
