মঙলবাৰে খানাপাৰা পশু চিকিৎসা মহাবিদ্যালয়ৰ খেলপথাৰত দ্বিতীয়টো কাৰ্যকালৰ বাবে মুখ্যমন্ত্ৰী হিচাপে শপত গ্ৰহণ কৰে ডঃ হিমন্ত বিশ্ব শৰ্মাই (HBS 2.0)।
এই শপত গ্ৰহণ অনুষ্ঠানত উপস্থিত থাকে দেশৰ কেইবাগৰাকীও ভিভিআইপি তথা ভিআইপি। ইয়াৰ উপৰি ২২ খন এনডিএ-শাসিত ৰাজ্যৰ মুখ্যমন্ত্ৰী, উপ-মুখ্যমন্ত্ৰীকে ধৰি দেশৰ কেইবাগৰাকীও আগশাৰীৰ উদ্যোগপতি উপস্থিত থাকে।
আনহাতে, মুখ্যমন্ত্ৰী হিমন্ত বিশ্ব শৰ্মাৰ সৈতে আন চাৰিগৰাকী মন্ত্ৰী ক্ৰমে ৰামেশ্বৰ তেলী, অতুল বৰা, অজন্তা নেওগ আৰু চৰণ বড়োৱেও শপত গ্ৰহণ কৰে৷ মুখ্যমন্ত্ৰীৰ লগতে তিনিগৰাকী মন্ত্ৰীয়ে অসমীয়া ভাষাত আৰু চৰণ বড়োৱে বড়ো ভাষাত শপত গ্ৰহণ কৰে। ৰাজ্যপাল লক্ষ্মণ প্ৰসাদ আচাৰ্যই তেওঁলোকক পদ আৰু গোপনীয়তাৰ শপত বাক্য পাঠ কৰায়।
উল্লেখ্য যে এই শপত গ্ৰহণ অনুষ্ঠানত মুখ্য অতিথি হিচাপে উপস্থিত থাকে প্ৰধানমন্ত্ৰী নৰেন্দ্ৰ মোদী। লগতে কেন্দ্ৰীয় গৃহমন্ত্ৰী অমিত শ্বাহ, কেন্দ্ৰীয় প্ৰতিৰক্ষা মন্ত্ৰী ৰাজনাথ সিং, বিজেপিৰ ৰাষ্ট্ৰীয় সভাপতি নীতিন নবীন আৰু ভাৰতত থকা আমেৰিকাৰ ৰাষ্ট্ৰদূত চাৰ্জিঅ’ গ’ৰো উপস্থিত থাকে।
