শপত গ্ৰহণৰ দুদিন পিছতে কৰ্ণাটকৰ কংগ্ৰেছ মন্ত্ৰীসভা (Karnataka Congress Cabinet)ত অশান্তিৰ লক্ষণ (Signs of unrest) দেখা গৈছে। ইতিমধ্যে এজন মন্ত্ৰীয়ে বিচৰা বিভাগ নোপোৱাত পদত্যাগ (A minister’s resignation) কৰিছে। আশা কৰা ধৰণে দপ্তৰ বিতৰণ নকৰাৰ বাবে আৰু চাৰিজন মন্ত্ৰীও অসন্তুষ্ট। এনে পৰিস্থিতিত কৰ্ণাটকৰ নতুন মুখ্যমন্ত্ৰী ডি কে শিৱকুমাৰ (DK Shivkumar) দলৰ অভ্যন্তৰৰ পৰায়ে প্ৰবল চাপত পৰিছে। কৰ্ণাটকৰ জ্যেষ্ঠ কংগ্ৰেছ নেতা ৰামালিংগা ৰেড্ডী (Ramalinga Reddy)য়ে শুকুৰবাৰে পুৱা মন্ত্ৰীসভাৰ পৰা পদত্যাগ কৰে। ৰেড্ডীয়ে দাবী কৰে যে শিৱকুমাৰে তেওঁক বেংগালুৰু উন্নয়ন বিভাগৰ দায়িত্ব দিয়াৰ আশ্বাস দিছিল। কিন্তু তেওঁক জলসিঞ্চন বিভাগ দিয়া হয়। ইয়াৰ পিছত ৰেড্ডীয়ে কেবিনেটত নথকাৰ সিদ্ধান্ত লয়। ইফালে ৰেড্ডীক ‘ঘনিষ্ঠ বন্ধু’ বুলি অভিহিত কৰি শিৱকুমাৰে অৱশ্যে সমস্যাটো সমাধান হ’ব বুলি কয়।
কৰ্ণাটকৰ আৰু দুজন মন্ত্ৰী কে এইচ মুনিয়াপ্পা আৰু কে জে জৰ্জেও দপ্তৰ বিতৰণক লৈ ক্ষোভ প্ৰকাশ কৰিছে। কৰ্ণাটকৰ প্ৰাক্তন মুখ্যমন্ত্ৰী সিদ্দাৰমাইয়াৰ কেবিনেটতো আছিল সাতবাৰৰ সাংসদ মুনিয়াপ্পা। শিৱকুমাৰে তেওঁক খাদ্য আৰু যোগান মন্ত্ৰীৰ পদ দিয়ে। কিন্তু এজন জ্যেষ্ঠ বিধায়ক হিচাপে তেওঁ ‘সন্মানজনক’ দপ্তৰ লাভ কৰিবলৈ আগ্ৰহী। এই কথা তেওঁ ৰাহুল গান্ধীকো জনাইছে।
আনহাতে, শক্তি মন্ত্ৰী জৰ্জো নিজৰ বিভাগত সুখী নহয়। সিদ্দাৰমাইয়াৰ কাৰ্যকালতো তেওঁ শক্তি মন্ত্ৰী আছিল। আন এজন মন্ত্ৰী সতীশ জাৰকিহোলি ৰাজহুৱা কাম-কাজ বিভাগৰ দায়িত্বত সুখী যদিও আন এটা কাৰণত বিচলিত। তেওঁ আশা কৰিছিল যে মন্ত্ৰী হোৱাৰ সমান্তৰালকৈ তেওঁক কৰ্ণাটক প্ৰদেশ কংগ্ৰেছৰ সভাপতি হিচাপেও নিযুক্তি দিয়া হ’ব। কিন্তু সেয়া নহ’ল। এই বিষয়ত তেওঁ কংগ্ৰেছ নেতৃত্বৰ প্ৰতি ক্ষোভ প্ৰকাশ কৰিছে।
উল্লেখ্য যে সিদ্দাৰমাইয়াৰ পদত্যাগৰ পিছত বুধবাৰে বিয়লি ৪ বজাত বেংগালুৰুৰ লোকভৱনৰ গ্লাছ হাউছত মুখ্যমন্ত্ৰী হিচাপে শপত গ্ৰহণ কৰে শিৱকুমাৰে। ৰাজ্যপাল থাবৰচান্দ গেহলটে তেওঁক শপত গ্ৰহণ কৰায়। বুধবাৰে শিৱকুমাৰৰ সৈতে দলিত নেতা জি পৰমেশ্বৰেও উপ-মুখ্যমন্ত্ৰী হিচাপে শপত গ্ৰহণ কৰে। লগতে ১২ জন মন্ত্ৰীয়েও শপত গ্ৰহণ কৰে।
