২০২০ চনত যেতিয়া মোদী চৰকাৰে ঘৰচীয়া গৰুৰ ‘কাওপেথী’ বা দেশীয় গৰুৰ পঞ্চগব্যৰ ওপৰত গৱেষণাৰ বাবে ৯৮ কোটি টকা আবণ্টন দিছিল, তেতিয়া বহুতে ভ্ৰু কোঁচাইছিল।
বিজ্ঞান-প্ৰযুক্তিৰ আধুনিক যুগত এনে গৱেষণা কিমান যুক্তিসংগত সেই সম্পৰ্কে সাধাৰণ মানুহৰ মনত আলোচনা আৰু সমালোচনাৰ ধুমুহাৰ সৃষ্টি হৈছিল। কিন্তু শেহতীয়াকৈ সেই ধন আবণ্টনৰ ফল ধৰিবলৈ আৰম্ভ কৰিছে। দেশৰ আইআইটিৰ শীৰ্ষ গৱেষকসকলে এতিয়া তেওঁলোকৰ গৱেষণা-পত্ৰ প্ৰকাশ কৰি বিজ্ঞান সমাজত এক নতুন হুলস্থুলৰ সৃষ্টি কৰিছে।
শেহতীয়াকৈ আইআইটি ৰূঢ়কী বিজ্ঞানীসকলৰ এক আচৰিত সফলতাৰ বিষয় পোহৰলৈ আহিছে ‘দ্য প্ৰিণ্ট’ত প্ৰকাশিত এক প্ৰতিবেদনত। ঘৰচীয়া গৰুৰ প্ৰস্ৰাৱৰ পৰা তৈয়াৰী ‘গোমুত্ৰ অৰ্ক’ৰ ওপৰত বিতং পৰীক্ষা-নিৰীক্ষা চলাইছে
তেওঁলোকৰ গৱেষণাত দাবী কৰা হৈছে যে ই চিকুনগুনিয়াৰ দৰে মাৰাত্মক ভাইৰাছৰ বিৰুদ্ধে অতি ফলপ্ৰসূ এণ্টিভাইৰেল হিচাপে কাম কৰিব পাৰে। গৱেষণাগাৰত কৰা কঠোৰ বৈজ্ঞানিক পৰীক্ষাত এই কথা প্ৰমাণিত হোৱাত গৱেষক দলটো নিজেই এতিয়া যথেষ্ট আশাবাদী।
আইআইটি বেনাৰস হিন্দু বিশ্ববিদ্যালয়ৰ বিজ্ঞানীসকলে কেৱল ভাইৰাছৰ নিৰাময়েই নহয়, দৈনন্দিন জীৱনত ব্যৱহাৰ কৰিব পৰা আন বহুতো বস্তু আৱিষ্কাৰ কৰিছে।
প্ৰাচীন পঞ্চগব্য (গাখীৰ, দৈ, ঘিউ, গৰুৰ গোবৰ আৰু গৰুৰ প্ৰস্ৰাৱ) কিমান ফলপ্ৰসূভাৱে প্ৰাকৃতিক বীজাণুনাশক বা এণ্টিচেপ্টিক হিচাপে ব্যৱহাৰ কৰিব পাৰি তাৰো পৰীক্ষা কৰিছে। আইআইটিৰ আন এক অধ্যয়নত দেখা গৈছে যে গৰুৰ গোবৰত কিছুমান ৰাসায়নিক উপাদান থাকে, যিয়ে ধাতুৰ ওপৰত সুৰক্ষামূলক স্তৰ সৃষ্টি কৰি মামৰে ধৰা ৰোধ কৰাত সহায় কৰিব পাৰে।
আনকি বায়’গেছ বাৰ্নাৰ আৰু উচ্চমানৰ ইলেক্ট্ৰ’ড নিৰ্মাণত গৰুৰ গোবৰৰ ব্যৱহাৰৰ বিষয়েও ডাঙৰ ডাঙৰ তথ্য পোহৰলৈ আহিছে।
আয়ুৰ্বেদৰ সহস্ৰবছৰীয়া বিশ্বাসক আধুনিক বিজ্ঞানৰ পৰীক্ষাগাৰলৈ আনি পৰীক্ষাত অৱতীৰ্ণ কৰাৰ এই প্ৰচেষ্টাই এক নতুন মাত্ৰা লাভ কৰিছে।
গৱেষকসকলৰ মতে, বিজ্ঞান যেনেকৈ অন্ধবিশ্বাসী নহয়, প্ৰমাণৰ আগত সকলো কথাকে কেৱল অন্ধবিশ্বাস বুলি উলাই কৰাটোও সঠিক নহয়। ৯৮ কোটিৰ এই চৰকাৰী প্ৰকল্পটো শেষত কিমান সফল হ’ব সেয়া হয়তো সময়ে ক’ব পাৰে, কিন্তু এই আইআইটিৰ গৱেষণা-পত্ৰবোৰে অন্ততঃ স্পষ্ট কৰি দিয়ে যে আমি জনা সাধাৰণ উপাদানবোৰতো আধুনিক প্ৰযুক্তিৰ ডাঙৰ ডাঙৰ সমাধান লুকুই থাকিব পাৰে।
