দীপংকৰ দাস,ডিফু : ক্ৰমাৎ স্বাভাৱিক অৱস্থালৈ ঘূৰি আহিছে কাৰ্বি আংলং জিলাৰ বান পৰিস্থিতি। ফুলনি আৰু শিলনিজান ৰাজহ চক্ৰৰ অন্তৰ্গত অঞ্চলসমূহত ব্যাপক ক্ষতিসাধন কৰিছে বানে । বিশেষকৈ হাওৰাঘাট মহকুমাৰ অন্তৰ্গত ফুলনি ৰাজহ চক্ৰত এই ধ্বংসলীলাৰ তীব্ৰতা অধিক আছিল। তথাপিও জিলা প্ৰশাসন আৰু কাৰ্বি আংলং স্বায়ত্তশাসিত পৰিষদে আৰম্ভণিৰ পৰাই বিষয়টোক গুৰুত্বসহকাৰে লৈ উদ্ধাৰ অভিযান আৰু সহায়সামগ্ৰী বিতৰণ কৰি বানাক্ৰান্ত ৰাইজৰ মাজত সহায়ৰ হাত আগবঢ়াইছে।
জিলা প্ৰশাসনৰ তৰফৰ পৰা লাভ কৰা তথ্য অনুসৰি হাওৰাহাট মহকুমাৰ ফুলনি ৰাজহ চক্ৰৰ অন্তৰ্গত ২৩ খন গাঁও আৰু বোকাজান মহকুমাৰ শিলনিজান ৰাজহ চক্রৰ দুখন গাঁও বানত ক্ষতিগ্ৰস্ত হৈছে। ফুলনি ৰাজহ চক্ৰৰ অন্তৰ্গত ১৭১১০ জন আৰু শিলনিজান ৰাজহ চক্ৰৰ অন্তৰ্গত ৪৫ জনকে ধৰি মুঠ ১৭১৫৫ জন লোক বানত আক্রান্ত হৈছে।
এই ২৫খন গাঁৱৰ ভিতৰত ১২১৯৫জন লোক গৃহবন্দী হৈ থকাৰ বিপৰীতে ৪৯৬০জন লোকক বিভিন্ন আশ্ৰয় শিবিৰত ৰখা হৈছে। কিন্তু এতিয়া পানী কমিবলৈ আৰম্ভ কৰাৰ লগে লগে আশ্ৰয় শিবিৰত থকাসকলে ঘৰলৈ উভতি যাবলৈ আৰম্ভ কৰিছে। এইবাৰ সৰ্বাধিক পশুধনৰ ক্ষয়ক্ষতি হৈছে। ফুলনি ৰাজহ চক্ৰৰ অধীনত ২২৫টা ডাঙৰ আৰু ১১৮টা সৰুকে ধৰি মুঠ ৩৪৩টা পশুধনৰ মৃত্যু হৈছে।
বানপানীত ফুলনি আৰু শিলনিজানত এটি শিশুসহ দুজনৰ মৃত্যু হৈছে। ফুলনি ৰাজহ চক্ৰৰ অধীনস্থ বানাক্ৰান্ত লোকসকলক সহায়ৰ হাত আগবঢ়োৱাৰ লগতে ১৭টা সাহায্য শিবিৰ মুকলি কৰাৰ বিপৰীতে গৃহবন্দী হৈ থকা বানপীড়িত লোকসকলক ঘৰে ঘৰে সাহায্য প্ৰদানৰ ব্যৱস্থা কৰিছে জিলা প্ৰশাসন তথা কার্বি আংলং স্বায়ত্ত শাসিত পৰিষদে ।
চৰকাৰী তথ্য অনুসৰি ২০৩.০৬ কুইণ্টল চাউল, ৩৫.৭৫১ কুইণ্টল দালি, ১০.৪৭ কুইণ্টল নিমখ, ১০৪৭ লিটাৰ মিঠাতেল, ১৪৮৩ পেকেট চেনিটেৰী নেপকিন, ১৪৮৩ পেকেট মহ নিবাৰণকাৰী ধুপ, ২০২ পেকেট টাৰপলিন, ১৪৮৩ পেকেট মমবাতি, ৩৯.৫৯ কুইণ্টল সেউজীয়া খাদ্য (পশু চিকিৎসা বিভাগে প্ৰদান কৰা), ১৫০০ পেকেট শিশু খাদ্য (ডি এছ ডব্লিউ অ’ই প্ৰদান কৰা) আৰু জনস্বাস্থ্য বিভাগৰ হাওৰাঘাট বিভাগে বানপীড়িত অঞ্চলসমূহলৈ ৩,০০০ পানীৰ পাউচ আৰু পানীৰ টেংকাৰ যোগান ধৰিছে।
এই বানত চৰকাৰী ক্ষয়-ক্ষতিৰ পৰিমান – ফুলানী ৰাজহ চক্ৰৰ অন্তৰ্গত ডকমকা উপ-সংমণ্ডলৰ অন্তৰ্গত ৮ টা পথ, ফুলনী ৰাজহ চক্ৰৰ অধীনৰ জনস্বাস্থ্য বিভাগৰ ডকমকা সংমন্ডলৰ অন্তৰ্গত দুটা হিউম পাইপ আৰু হাওৰাহাট চক্ৰৰ অন্তৰ্গত ৫ টা পি ডব্লিউ এছ এছ ক্ষতিগ্ৰস্ত হৈছে। বান পৰিস্থিতিৰ সৈতে মোকাবিলা কৰিবলৈ জিলা প্ৰশাসনে SDRF, Police, DDR F, F & EM দল মোতায়েন কৰিছে, লগতে স্থানীয় ৰাইজেও সহায়ৰ হাত আগবঢ়াইছে। উদ্ধাৰ অভিযানৰ বাবে এখন নাও নিয়োগ কৰি ৬৭ জন লোকক উদ্ধাৰ কৰা হয়।
ফুলনী ৰাজহ চক্ৰৰ অধীনত ১০টা চিকিৎসা দল মোতায়েন কৰা হৈছে। বিভিন্ন ব্যক্তিগত আৰু স্বেচ্ছাসেৱী সংগঠনেও ত্রান সামগ্রী বিতৰণ কৰি সহায়ৰ হাত আগবঢ়াইছে। জিলা আয়ুক্ত আৰণ্যক শইকীয়াৰ তত্বাৱধানত আৰু পৰিষদৰ সদস্যসকলৰ সহায়ত সমগ্ৰ উদ্ধাৰ অভিযান আৰু খাদ্য তথা ত্রাণ সাহায্য বিতৰণৰ কাম চলি আছে। পার্বত্য জিলাখনৰ বৰ্তমানৰ বান পৰিস্থিতি স্বাভাৱিক।
বান পৰিস্থিতি উন্নত হৈছে আৰু লাহে লাহে স্বাভাৱিক অৱস্থালৈ উভতি আহিছে
