নগাওঁৰ উপ-নিৰ্বাচনত জয়ী হ’ব বিজেপি। কাৰণ মানুহে নৰেন্দ্ৰ মোডীক ভাল পায়। সমগ্ৰ বিশ্বই ভাল পায় নৰেন্দ্ৰ মোডীক। হিমন্ত বিশ্ব শৰ্মাইও তেনেকুৱাই। “বিজেপিয়ে প্ৰতিটো জাতি আৰু সম্প্ৰদায়ৰ সৈতে উন্নয়নৰ পথ বাছি লৈছে, গতিকে মুছলমান ভোটো বিজেপিৰ সপক্ষে আহিব।” আজি ডিফুত এক যোগদান কাৰ্যসূচীত উপস্থিত থকা কার্বি আংলং স্বায়ত্ত শাসিত পৰিষদৰ মুখ্য কাৰ্যবাহী সদস্য তথা বিধায়ক তুলিৰাম ৰংহাঙে এই মন্তব্য কৰে। সাংবাদিকৰ আগত নিজৰ মন্তব্য প্ৰকাশ কৰি তেওঁ অৱগত কৰে যে তেওঁ নিজেও ২৫ ছেপ্টেম্বৰৰ পৰা নগাঁৱৰ উপ-নিৰ্বাচনৰ প্ৰচাৰত যোগদান কৰিব।
আজিৰ যোগদান কাৰ্যসূচীৰ সন্দৰ্ভত মুখ্য কাৰ্যবাহী ৰংহাঙে কয় যে যোৱা লোকসভা নিৰ্বাচনৰ পৰা বিধানসভা নিৰ্বাচনলৈকে বিৰোধী দলৰ বিশেষকৈ এপি এইচ এল চি আৰু কংগ্ৰেছৰ ১ লাখ ৩৯ হাজাৰ সদস্য আৰু সমৰ্থকে বিজেপি দলত যোগদান কৰিছে। এই যোগদান কাৰ্যসূচী এতিয়াও অব্যাহত আছে।
মুখ্যমন্ত্রীৰ সকলোকে লগত লৈ উন্নয়নৰ পথত আগুৱাই যোৱা নীতি আৰু নির্বাচনৰ পূর্বে দিয়া প্রতিশ্রুতি পূৰণৰ প্রক্রিয়াৰ বাবেহে এয়া সম্ভৱ হৈছে বুলি উল্লেখ কৰি উদাহৰণ হিচাপে তেওঁ কয় যে নিৰ্বাচনৰ পূৰ্বে আমি ২৪৪ (ক) অনুচ্ছেদৰ অধীনত সংসদত স্বায়ত্তশাসিত ৰাজ্যৰ বিষয়টো উত্থাপন কৰাৰ প্ৰতিশ্ৰুতি দিছিলোঁ।
ইতিমধ্যে সাংসদ অমৰ সিং তিছ’ই সংসদত এই বিষয়টো উত্থাপন কৰিছে। আমি বিধানসভাতো বিষয়টো উত্থাপন কৰিছো। বিৰোধী দলৰ পৰা আমাৰ প্ৰতি আকৰ্ষিত হৈছে এই প্ৰতিশ্ৰুতি পূৰণৰ বাবে, আমাৰ দায়বদ্ধতাৰ বাবে। কালি মুখ্যমন্ত্রীৰ উপস্থিতিত ১৫৬১ জন লোকে বিজেপিত যোগদান কৰাৰ পাছত আজি সৰুপথাৰ, হামৰেণ আৰু দুৱাৰ বাগৰিৰ ১২০০ৰো অধিক লোকে বিজেপিত যোগদান কৰিছে। পৰিষদীয় নিৰ্বাচনৰ পূৰ্বে বোকাজান পরিষদীয় সমষ্টিত ৩০ হাজাৰ এ পি এইচ এল চি-কংগ্ৰেছৰ সদস্য-সমৰ্থকে বিজেপিত যোগদান কৰিব বুলিও দাবী কৰে মুখ্য কার্যবাহী ৰংহাঙে।
