শুকুৰবাৰে নিশা টিহুত ড্ৰাগছবিৰোধী অভিযান (Tihu Drugs Seized)। এই অভিযানত টিহুৰ নান্নাট্ৰাৰীত উৎখাত কৰা হয় ড্ৰাগছৰ ঘাটি। লগতে ড্ৰাগছ, মোবাইল ফোন, লেপটপ, নগদ ধন, চাৰিচকীয়া আৰু দুচকীয়া বাহনসহ ড্ৰাগছ সৰবৰাহৰ অভিযোগত আঠজনকৈ লোকক কৰায়ত্ত কৰা হয়। এক গোপন সূত্ৰৰ ভিত্তিত টিহু আৰক্ষীয়ে এই অভিযান চলায়।
নান্নাট্ৰাৰীৰ নৃপেন ৰাজবংশীৰ ঘৰত ড্ৰাগছৰ ঘাটি উচ্ছেদ কৰাৰ লগতে ঘৰটোৰ পৰা ড্ৰাগছভৰ্তি কণ্টেইনাৰ, খালী কণ্টেইনাৰ, ১৯টা মোবাইল, এটা লেপটপ, এখন চাৰিচকীয়া বাহন, চাৰিখন মটৰচাইকেল জব্দ কৰে। লগতে মালিক নৃপেন ৰাজবংশীসহ আঠজন লোকক আৰক্ষীয়ে কৰায়ত্ত কৰে।
ড্ৰাগছ সৰবৰাহৰ অভিযোগত আটক কৰা লোককেইজন হৈছে নৃপেন ৰাজবংশী, উৎপল মজুমদাৰ, নীৰৱ ৰাজবংশী, মনোজ দাস, ত্ৰিদীপ গোস্বামী, আজিজুল হক, হৰেণ দাস আৰু নয়ন বৰ্মন। তেওঁলোকক টিহু আৰক্ষীয়ে নিজৰ জিম্মাত লৈ মাৰাথন জেৰা অব্যাহত ৰাখিছে। আনহাতে, এই ড্ৰাগছ সৰবৰাহৰ ঘটনাৰ অধিক তদন্ত অব্যাহত ৰাখিছে।
