আদানী (Adani) বিতৰ্কক লৈ এইবাৰ মুকলিকৈ মুখ খুলিছে কেন্দ্ৰীয় গৃহমন্ত্ৰী অমিত শ্বাহে (Amit Shah)। মঙলবাৰে সংবাদ সংস্থা এএনআইক (ANI) দিয়া এক সাক্ষাৎকাৰত শ্বাহে কয় যে বিজেপিৰ হাতত লুকুৱাবলগীয়া একো নাই আৰু ভয় কৰিবলগীয়া একো নাই। এই বিতৰ্কত বিৰোধীয়ে মোদী চৰকাৰক (Modi Sarkar) লক্ষ্য কৰি লৈছে। এই মন্তব্য কৰে গৃহমন্ত্ৰী গৰাকীয়ে।
আদানী গ্ৰুপৰ শ্বেয়াৰৰ মূল্য বৃদ্ধিৰ বাবে বিত্তীয় জালিয়াতি আৰু প্ৰবঞ্চনাৰ অভিযোগ উত্থাপন হৈছে। আমেৰিকাৰ বিনিয়োগ গৱেষণা কোম্পানী ‘হিণ্ডেনবাৰ্গ ৰিচাৰ্চʼ(Hindenburg Resource) ৰ প্ৰতিবেদন ওলোৱাৰ লগে লগে দেশত হুলস্থুলৰ সৃষ্টি হয়। কংগ্ৰেছকে ধৰি বিৰোধীয়ে উদ্যোগপতি গৌতম আদানীৰ (Gautam Adani) সৈতে প্ৰধানমন্ত্ৰী মোদীৰ ‘ভাল সম্পৰ্কʼৰ সুযোগ লৈছে।
কিন্তু কেন্দ্ৰীয় গৃহমন্ত্ৰীগৰাকীয়ে এই সন্দৰ্ভত বিতংভাৱে একো নকʼলে। এই পৰিপ্ৰেক্ষিতত শ্বাহে কয়, “বিষয়টো উচ্চতম ন্যায়ালয়ত বিচাৰ চলি আছে। যিহেতু গোচৰটো উচ্চতম ন্যায়ালয়ত আছে, গতিকে মন্ত্ৰী হিচাপে ইয়াৰ ওপৰত মন্তব্য কৰাটো সঠিক নহয়।”
শ্বাহে লগতে কয়, “বিজেপিৰ লুকুৱাবলগীয়া একো নাই। আন একো ভয় নাই।” শ্বাহৰ আগত কেন্দ্ৰীয় বিত্তমন্ত্ৰী নিৰ্মলা সীতাৰমণে এই বিতৰ্কত প্ৰশ্নৰ সন্মুখীন হৈছিল। কিন্তু তেওঁৱো কৌশলেৰে এই বিষয়টো এৰাই চলিছিল। তেওঁ মাথোঁ কৈছিল, “এই দেশৰ নিয়ন্ত্ৰক সংস্থাসমূহে সমগ্ৰ বিষয়টোৰ বিষয়ে অৱগত৷ কেৱল এতিয়াই নহয়, তেওঁলোক সদায় সজাগ।”
এই গোচৰত উচ্চতম ন্যায়ালয়ৰ হস্তক্ষেপ বিচাৰি আবেদন দাখিল কৰা হৈছে। যোৱা শনিবাৰে সেই আৱেদনৰ শুনানিৰ সময়ত মুখ্য ন্যায়াধীশ চন্দ্ৰচুৰে (Chandrachud) কয়, “এনে পৰিস্থিতিৰ পুনৰাবৃত্তি ৰোধৰ বাবে আমি ব্যৱস্থা গ্ৰহণ কৰিমনে? নীতিৰ বিষয়ত আমি হস্তক্ষেপ কৰিব নিবিচাৰো। সেইটো চৰকাৰৰ কাম। চৰকাৰ এই বিষয়ত আগ্ৰহী হোৱা উচিত। শ্বেয়াৰ বজাৰৰ নিয়ন্ত্ৰণ ব্যৱস্থা আৰু ভাৰতীয় বিনিয়োগকাৰীৰ স্বাৰ্থ সুৰক্ষাৰ বিষয়ে আমি ছলিচিটৰ জেনেৰেলৰ ওচৰত আমাৰ উদ্বেগ প্ৰকাশ কৰিছো।”
