Imran Khan I ইমৰাণ খানৰ গ্ৰেপ্তাৰ অবৈধ, ঘোষণা পাকিস্তান উচ্চতম ন্যায়ালয়ৰ

পাকিস্তানৰ উচ্চতম ন্যায়ালয়ে ইমৰাণ খানৰ (Imran Khan) গ্ৰেপ্তাৰক অবৈধ (Illegal) বুলি ঘোষণা কৰে। বৃহস্পতিবাৰে উচ্চতম ন্যায়ালয়ৰ ন্যায়াধীশে এই ৰায় দিয়ে। পাকিস্তানৰ মুখ্য ন্যায়াধীশ ওমৰ আতা বন্দিয়ালে আদালতৰ চৌহদৰ পৰা কেনেকৈ গ্ৰেপ্তাৰ কৰিব পাৰি বুলি প্ৰশ্ন উত্থাপন কৰে।

বৃহস্পতিবাৰে আল কাদিৰ ট্ৰাষ্ট গোচৰত পাকিস্তান তেহৰিক-এ-ইনছাফৰ অধ্যক্ষ ইমৰাণ খানক গ্ৰেপ্তাৰ কৰাৰ বিৰুদ্ধে আবেদনৰ শুনানি গ্ৰহণ কৰি এই মন্তব্য কৰে মুখ্য ন্যায়াধীশগৰাকীয়ে। পাকিস্তানৰ উচ্চতম ন্যায়ালয়ে বৃহস্পতিবাৰে ৰাষ্ট্ৰীয় জবাবদিহিতা ব্যুৰোক এঘণ্টাৰ ভিতৰত প্ৰাক্তন প্ৰধানমন্ত্ৰী ইমৰাণ খানক হাজিৰ কৰিবলৈ নিৰ্দেশ দিয়ে।

যদিও দুপৰীয়া ৪.৩০ বজাৰ ভিতৰত হাজিৰ কৰোৱাৰ কথা আছিল, তথাপিও ৫.৪০ বজাত হাজিৰ কৰা হৈছিল। ১৫খন বাহনৰ কনভয়ত ইমৰাণ খানক আদালতলৈ নিয়া হয়। ৰাজনৈতিক বিশ্লেষকসকলে অনুভৱ কৰিছে যে উচ্চতম ন্যায়ালয়ৰ এই ৰায়দান ইমৰাণ খানৰ দল পাকিস্তান তেহৰিক-এ-ইনছাফৰ বাবে এক ‘স্বস্তিদায়ক’।