কোচিং ক্লাছৰ পৰা পিকনিক খাবলৈ যোৱা আঠজন ছাত্ৰ (Eight students) সাগৰত উটি (Students drown) যায়। আৰক্ষীৰ মতে, পুনেৰ ছাত্ৰসকলে গা ধুবলৈ গৈ সাগৰৰ পাৰৰ পৰা যথেষ্ট দূৰলৈ গৈছিল। তাৰ পিছত তেওঁলোকক ঢৌৱে উটুৱাই লৈ যায়। পিছত আঠজন ছাত্ৰৰ মৃতদেহ উদ্ধাৰ হয়। পুনেৰ (Pune) আলাণ্ডি অঞ্চলৰ জনপ্ৰিয় কোচিং কেন্দ্ৰ হৈছে উইনাৰ্ছ একাডেমী (Winners Academy)। তাৰ একাংশ ছাত্ৰ-ছাত্ৰী মহাৰাষ্ট্ৰৰ ৰায়গড়ৰ দিবেগড়ত পিকনিকৰ বাবে গৈছিল।
আৰক্ষীয়ে জনোৱা মতে, পিকনিক গ্ৰুপত মুঠ ৪৮ জন ছাত্ৰ-ছাত্ৰী আছিল। ইয়াৰে ২৫ জন ল’ৰা আৰু ১৭ জনী ছোৱালী। ইয়াৰ বাহিৰেও আছিল ছয়জন শিক্ষক। অভিযোগ অনুসৰি, বহুতে সাগৰত গা ধুই আছিল। কিছুমানে যথেষ্ট দূৰলৈ গৈছিল। তাত ঢৌৰ উচ্চতাও বেছি আছিল। এজন আৰক্ষী বিষয়াৰ মতে, ছাত্ৰসকলে সেই অংশৰ সাগৰৰ গভীৰতা বুজি পোৱা নাছিল। পানীৰ সোঁতো অনুমান কৰিব পৰা নাছিল। সেইবাবেই ঘটনাটো সংঘটিত হয়।
বাকীসকলে কিছু সময়ৰ পাছত আঠজন নিৰুদ্দেশ হোৱা বুলি গম পায়। আৰক্ষীয়ে তালাচী অভিযান আৰম্ভ কৰে। স্থানীয় ৰাইজো জড়িত হৈ পৰে। সন্ধিয়ালৈকে তেওঁলোকে এজন এজনকৈ আঠজনক উদ্ধাৰ কৰে। লগে লগে বৰলীৰ প্ৰাথমিক স্বাস্থ্য কেন্দ্ৰলৈ লৈ যোৱা হয়। কিন্তু তাত থকা চিকিৎসকে তেওঁলোকক মৃত বুলি ঘোষণা কৰে। আৰক্ষীৰ সূত্ৰ অনুসৰি, নিহত আটাইকেইজন একাদশ আৰু দ্বাদশ শ্ৰেণীৰ ছাত্ৰ, বয়স প্ৰায় ১৬ বছৰ। তেওঁলোকৰ পৰিয়ালক অৱগত কৰা হৈছে। নিহতকেইজন হ’ল তন্ময় দত্তত্ৰেয় বাহিলে, সুমিত ভাৰত অহিৰ, প্ৰণৱ ৰামদাস বনছ’ডে, কৈবল্য সতীশ ৱাশংকৰ, ৰাজবীৰ যুৱৰাজ বাহিলে, যশ কিৰণ ৱাংখেড়ে, সোহাম টুকাৰাম ভাণ্ডোৱালকাৰ আৰু কৌস্তুভ সন্দীপ দৌণ্ড।
ৰায়গড়ৰ জনপ্ৰিয় সমুদ্ৰ সৈকত ডিবেগড়। পুনেৰ পৰা প্ৰায় ১৭০ কিলোমিটাৰ দূৰত্বত অৱস্থিত। বহুতে পিকনিকৰ বাবে আদৰ্শ স্থান হিচাপে বাছি লৈছে। বৃহস্পতিবাৰৰ এই শোকাৱহ ঘটনাই অঞ্চলটোৰ সুৰক্ষাক লৈ প্ৰশ্ন উত্থাপন কৰিছে। মহাৰাষ্ট্ৰৰ মুখ্যমন্ত্ৰী দেৱেন্দ্ৰ ফাড়নভিছে শোক প্ৰকাশ কৰে। তেওঁ ছ’চিয়েল মিডিয়াত লিখিছে, “এয়া অতি দুখজনক, হৃদয়বিদাৰক কাণ্ড। স্থানীয় প্ৰশাসনে মৃতকৰ মৃতদেহ আলাণ্ডীলৈ ঘূৰাই অনাৰ ব্যৱস্থা কৰিছে।”
