বাংলাদেশৰ (Bangladesh) সম্মিলিত সনাতন জাগৰণ জোটৰ মুখপাত্ৰ আৰু ইস্কনৰ পুণ্ডাৰিক ধামৰ অধ্যক্ষ চিন্ময় কৃষ্ণ প্ৰভুক গ্ৰেপ্তাৰ কৰা বিষয়ত নতুন দিল্লীয়ে উদ্বেগ প্ৰকাশ কৰে।
মঙলবাৰে এক বিবৃতিযোগে ভাৰতৰ বৈদেশিক পৰিক্ৰমা মন্ত্ৰালয়ে কয়, “বাংলাদেশৰ সংখ্যালঘু সম্প্ৰদায়ৰ ওপৰত ধাৰাবাহিক আক্ৰমণৰ পৰিপ্ৰেক্ষিতত হিন্দু সন্ন্যাসী চিন্ময়ক গ্ৰেপ্তাৰ কৰা আৰু তেওঁৰ বিৰুদ্ধে ৰাজদ্ৰোহৰ অভিযোগ যথেষ্ট উদ্বেগজনক।”
বিবৃতিতোত বৈদেশিক পৰিক্ৰমা মন্ত্ৰালয়ে কয়, “আমি বাংলাদেশ চৰকাৰক দেশখনৰ সকলো সংখ্যালঘু, বিশেষকৈ হিন্দুসকলৰ সুৰক্ষা আৰু নিৰাপত্তা নিশ্চিত কৰিবলৈ আহ্বান জনাইছো। একে সময়তে, তেওঁলোকৰ শান্তিপূৰ্ণ প্ৰতিবাদ আৰু মত প্ৰকাশৰ অধিকাৰো সুৰক্ষিত কৰিব লাগে।”
উল্লেখযোগ্য যে চিন্ময় কৃষ্ণক সোমবাৰে ঢাকাৰ পৰা গ্ৰেপ্তাৰ কৰা হয়। চট্টগ্ৰাম মেট্ৰ’পলিটান মেজিষ্ট্ৰেটৰ আদালতে ৰাজদ্ৰোহৰ অভিযোগত তেওঁৰ জামিন নাকচ কৰে।
তেওঁ বৰ্তমান ন্যায়িক জিম্মাত আছে। এইটো লক্ষণীয় যে বাংলাদেশ আৰক্ষীয়ে তেওঁৰ জিম্মাৰ বাবে আবেদন কৰা নাই। অৱশ্যে আদালতে নিৰ্দেশ দিয়ে যে বন্দী অৱস্থাত চিন্ময়ৰ সকলো ধৰ্মীয় অধিকাৰ সুৰক্ষিত ৰাখিব লাগিব।
হাছিনা চৰকাৰৰ পতনৰ পিছত কেইবাটাও ধৰ্মীয় সংগঠনে সমগ্ৰ দেশৰ অস্থিৰতাৰ পৰিৱেশত সনাতনী জাগৰণ মঞ্চ গঠন কৰে। চিন্ময় মঞ্চৰ মুখপাত্ৰ হিচাপে নিৰ্বাচিত হৈছিল।
তেওঁৰ আহ্বানত হাজাৰ হাজাৰ সংখ্যালঘু লোকে বাংলাদেশৰ বিভিন্ন অঞ্চল, শ্বহীদ মিনাৰ, চিটাগং আদিত সমদলত অংশগ্ৰহণ কৰিছিল। চিটাগঙত সমদলৰ পিছত এজন স্থানীয় বি এন পি নেতাই তেওঁৰ বিৰুদ্ধে ৰাজদ্ৰোহৰ গোচৰ ৰুজু কৰে। গোচৰটোৰ সন্দৰ্ভত সোমবাৰে তেওঁক গ্ৰেপ্তাৰ কৰা হৈছে।
৫ আগষ্টত তদানীন্তন প্ৰধানমন্ত্ৰী শ্বেখ হাছিনাক বহিষ্কাৰ কৰাৰ পিছৰে পৰা সমগ্ৰ বাংলাদেশত সংখ্যালঘুসকলৰ ওপৰত অত্যাচাৰৰ অভিযোগ উত্থাপিত হৈছে। দেশৰ বিভিন্ন প্ৰান্তত বহুতো ঘৰ জ্বলাই দিয়া হৈছিল। ধৰ্মীয় অনুষ্ঠানসমূহো ধ্বংস কৰা হৈছিল।
ইউনুছ নেতৃত্বাধীন অন্তৱৰ্তীকালীন চৰকাৰ শাসনলৈ অহাৰ পিছত পৰিস্থিতি বিশেষ সলনি হোৱা নাই বুলি অভিযোগ। অৱশ্যে, অন্তৱৰ্তীকালীন চৰকাৰৰ মুখ্য উপদেষ্টা মহম্মদ ইউনুছে বাৰে বাৰে আশ্বাস দিছে যে তেওঁলোকে সংখ্যালঘুসকলৰ সুৰক্ষা আৰু ধৰ্মীয় অধিকাৰ নিশ্চিত কৰিব।
তেওঁ দেশবাসীক সাম্প্ৰদায়িক সম্প্ৰীতি বজাই ৰাখিবলৈ এটা বাৰ্তাও দিয়ে। অৱশ্যে ইউনুছৰ চৰকাৰে ধৰ্মীয় উগ্ৰপন্থী আৰু সংখ্যালঘুসকলৰ ওপৰত আক্ৰমণ কিমান নিয়ন্ত্ৰণ কৰিব পাৰে তাক লৈ বহুতো মহলত সন্দেহ আছে।
