ভাবিলেও গাৰ নোম শিয়ৰি উঠা এক ঘটনা। ভবাটো বাদেই, কল্পনাও কৰিব নোৱাৰি এই নৃশংস কাণ্ড (brutal act)। যিমান পাষাণ হৃদয়ৰ লোকেই নহওক কিয়, এই কাণ্ড কৰাৰ পূৰ্বে এবাৰ হ’লেও হাত কঁপিব, বুকু বিষাব। কিন্তু সেয়াই সংঘটিত হ’ল। যাক ভাষাৰে ব্যাখ্যা কৰিব নোৱাৰি।
হয়, ওদালগুৰি জিলাৰ টংলা (Tongla in Udalguri district)ৰ দুই ভাতৃৰ হত্যাকাণ্ডৰ কথাকে উল্লেখ কৰিব বিচৰা হৈছে। কি দোষ আছিল ফুলকুমলীয়া, নিষ্পাপ দুই ভাতৃৰ। যাৰ বাবে ইমান ডাঙৰ এক শাস্তি প্ৰদান কৰা হ’ল?
গৌৰৱ শৰ্মা (Gaurav Sarma) আৰু কৌশিক শৰ্মা (Kaushik Sarma)। দুই ভাতৃ, এজনৰ বয়স ১২ আৰু আনজনৰ ১৪ বছৰ। টংলা কেন্দ্ৰীয় জাতীয় বিদ্যায়লৰ ছাত্ৰ দুয়ো। শুকুৰবাৰে স্কুললৈ পৰীক্ষা দিবলৈ গৈ জীৱন্তে উভতি নাহিল দুয়ো। তাৰ পৰিৱৰ্তে পিতৃ-মাতৃৰ বুকু শুদা কৰি আৰু সহস্ৰজনক শোক সাগৰত ডুবাই থৈ ডিঙি কটা অৱস্থাত নিথৰ দেহ হৈ উভতি আহিল!
ঘৰৰ পৰা মাত্ৰ ৩ কিলোমিটাৰ নিলগত উদ্ধাৰ হয় দুই ভাতৃৰ মৃতদেহ (Bodies of two brothers recovered)। কিন্তু মহেন্দ শৰ্মা নামৰ পেছাত এগৰাকী গাড়ীচালকৰ দুই পুত্ৰক কোনে এনেদৰে নৃশংসভাৱে হত্যা কৰিলে সেয়া এতিয়াও ৰহস্যৰ আৱৰ্তত। ঘটনা সন্দৰ্ভত আৰক্ষীয়ে ইতিমধ্যে তদন্ত আৰম্ভ কৰিছে। উল্লেখযোগ্য যে শুকুৰবাৰে বিদ্যালয়লৈ যোৱাৰ পৰত নিৰুদ্দেশ হোৱা দুই ভাতৃৰ মৃতদেহ শনিবাৰে পুৱা সস্তপাৰাত ডিঙি কটা অৱস্থাত জংঘলত উদ্ধাৰ হয়।স্কুলৰ ইউনিফৰ্ম পৰিধান কৰা অৱস্থাতে দুই ছাত্ৰৰ ৰক্তাক্ত মৃতদেহ প্ৰত্যক্ষ কৰে প্ৰাতঃভ্ৰমণলৈ যোৱা স্থানীয় লোকে। লগে লগে অঞ্চলটোত হুৱাদুৱা লাগে।আনহাতে, ঘটনা সন্দৰ্ভত আৰক্ষীক অৱগত কৰাৰ পিছতে আৰক্ষীৰ দল ঘটনাস্থলীত উপস্থিত হৈ মৃতদেহ দুটা উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰি তদন্ত আৰম্ভ কৰে।
শুকুৰবাৰে পৰীক্ষা দিবলৈ গৈ পঞ্চম আৰু ষষ্ঠ শ্ৰেণীৰ দুই ছাত্ৰ স্কুলত উপস্থিত নোহোৱাত কেন্দ্ৰীয় জাতীয় বিদ্যালয়ৰ প্ৰধান শিক্ষকে মাতৃলৈ ফোন কৰি খবৰ লয়। ইফালে দুই সন্তান বিদ্যালয়লৈ নোযোৱা বুলি জানিব পাৰি পৰিয়ালটোৰ মাজত হাহাকাৰ লাগে। ততাতৈয়াকৈ টংলা আৰক্ষী থানাত পিতৃ-মাতৃয়ে এজাহাৰ দাখিল কৰাৰ লগতে তেওঁলোকে বিচাৰ-খোচাৰ আৰম্ভ কৰে। কিন্তু আজি পুৱা ডিঙি কটা অৱস্থাত স্থানীয় ৰাইজে টংলাৰ যোৰপুখুৰীৰ ওচৰৰ জংঘলত প্ৰত্যক্ষ কৰে দুই ভাতৃৰ মৃতদেহ। লগে লগে দুই কণমানি ছাত্ৰক অতি নৃশংসতাৰে কোনে কিয় হত্যা কৰিলে তাক লৈ ৰহস্যৰ সৃষ্টি হৈছে। স্থানীয় লোকৰ সন্দেহ, পৰিয়ালকেন্দ্ৰিক শত্ৰুতাৰ বাবেই হয়তো দুই কণমানি ছাত্ৰক হত্যা কৰিব পাৰে। অৱশ্যে আৰক্ষীৰ সঠিক তদন্ততহে এই কথা পোহৰলৈ আহিব।
