অসমৰ প্ৰাণৰ শিল্পী জুবিন গাৰ্গৰ (Zubeen Garg) ন্যায়ৰ দাবীত এইবাৰ এক ব্যতিক্ৰমী পদক্ষেপ গ্ৰহণ কৰিলে অভয়াপুৰীৰ এদল যুৱকে। দীপাৱলীৰ পোহৰেৰে জীপাল হৈ উঠিল অভয়াপুৰীৰ পিৰাধৰাৰ বুঢ়ী আই থান। ৬০০০ মাটিৰ চাকি প্ৰজ্বলনেৰে প্ৰিয় শিল্পীগৰাকীক স্মৰণ কৰাৰ লগতে ন্যায়ৰ দাবী উত্থাপন কৰিলে যুৱকসকলে।
জুবিন গাৰ্গে এসময়ত এগৰাকী সাংবাদিকৰ সৈতে হোৱা কথোপকথনত কৈছিল, “অসম মানে চাহ, গঁড় আৰু জুবিন।” শিল্পীগৰাকীৰ এই কথাষাৰক মূল বিষয়বস্তু হিচাপে লৈ এইবাৰ পিৰাধৰাৰ বুঢ়ী আই থানত আয়োজন কৰা হয় এক বিশেষ দীপাৱলী উদযাপনৰ।
কেৱল এদিনৰ আয়োজন নহয়, এই ব্যতিক্ৰমী দৃশ্যৰ আঁৰত আছে ২০ গৰাকী যুৱকৰ ২০ দিনৰ অক্লান্ত পৰিশ্ৰম। দিনে-নিশাই একাকাৰ কৰি যুৱককেইজনে প্ৰস্তুত কৰি উলিয়াইছে ৬০০০ মাটিৰ চাকি। প্ৰতিটো চাকি সজাই-পৰাই এক বিশেষ ৰূপত উপস্থাপন কৰাৰ ক্ষেত্ৰত তেওঁলোকৰ পৰিশ্ৰম আৰু নিষ্ঠাই অনুষ্ঠানটোক কৰি তুলিছে অধিক আকৰ্ষণীয়।
হাজাৰ হাজাৰ চাকিৰ পোহৰত আলোকিত হৈ পৰা থানৰ চৌহদত সৃষ্টি হয় এক আৱেগিক পৰিৱেশ। চাকিৰ পোহৰৰ মাজেৰে যেন প্ৰতিফলিত হয় জুবিন গাৰ্গৰ প্ৰতি থকা মানুহৰ অকৃত্ৰিম ভালপোৱা, শ্ৰদ্ধা আৰু তেওঁৰ ন্যায় লাভৰ প্ৰত্যাশা।
উল্লেখযোগ্য যে অভয়াপুৰীত দীপাৱলী উদযাপনৰ ক্ষেত্ৰতো এক বিশেষ পৰম্পৰা গঢ়ি উঠিছে। প্ৰতিবছৰে একোটা ভিন্ন বিষয়বস্তু নিৰ্বাচন কৰি ব্যতিক্ৰমী ধৰণে দীপাৱলী পালন কৰি আহিছে ইয়াৰ উদ্যোক্তাসকলে। কেৱল পোহৰৰ উৎসৱ হিচাপেই নহয়, সামাজিক, সাংস্কৃতিক আৰু সমসাময়িক বিষয়ক প্ৰতিফলিত কৰাৰ এক মাধ্যম হিচাপেও তেওঁলোকে দীপাৱলীক ব্যৱহাৰ কৰি আহিছে।
এইবাৰ সেই আয়োজনৰ কেন্দ্ৰবিন্দু অসমৰ সংগীত জগতৰ প্ৰাণৰ শিল্পী জুবিন গাৰ্গ। ৬০০০ মাটিৰ চাকিৰ পোহৰেৰে যুৱকসকলে দাঙি ধৰিলে এক বিশেষ বাৰ্তা—জুবিন কেৱল এজন শিল্পীয়েই নহয়, তেওঁ অসমীয়াৰ আৱেগ, পৰিচয় আৰু আত্মাৰ এক অবিচ্ছেদ্য অংশ।
