উত্তৰ প্ৰদেশৰ লখিমপুৰৰ খেৰীত দুগৰাকী কিশোৰীক ধৰ্ষণ কৰাৰ অভিযোগত অভিযুক্ত এজন গেংষ্টাৰৰ আৰক্ষীৰ সৈতে হোৱা ‘এনকাউণ্টাৰ’ত (Up encounter) মৃত্যু।মৃত গেংষ্টাৰজনৰ নাম তালিব ওৰফে আজম খান লখিমপুৰ খেৰীৰ বাসিন্দা।
আৰক্ষীৰ সূত্ৰ অনুসৰি, তালিবৰ বিৰুদ্ধে গণধৰ্ষণ, গো-হত্যা, ডকাইতি আৰু গাড়ী চুৰিকে ধৰি ১৭টা অপৰাধমূলক গোচৰ আছে। তেওঁৰ মূৰৰ ওপৰত ১ লাখ টকাৰ পুৰস্কাৰ ঘোষণা কৰা আছিল।
কিছুদিন পূৰ্বে লখিমপুৰ খেৰীত তালিবে দুগৰাকী কিশোৰীক ধৰ্ষণ কৰাৰ অভিযোগ উত্থাপন হৈছিল। তেতিয়াৰে পৰাই আৰক্ষীয়ে তেওঁক বিচাৰি আছিল। সোমবাৰে আৰক্ষীয়ে এক গোপন সূত্ৰৰ পৰা তথ্য লাভ কৰে যে লখিমপুৰ খেৰীৰ দিয়াৰা দলঙৰ সমীপৰ লম্ভুৱা অঞ্চলত তালিবে তেওঁৰ দুই সহযোগী ছলমান আৰু মুখতাৰৰ সৈতে লগ হৈছিল।
উল্লেখ্য যে ছলমান আৰু মুখতাৰৰ বিৰুদ্ধেও দলবদ্ধ ধৰ্ষণৰ অভিযোগ আছে। এই তথ্য লাভ কৰাৰ লগে লগে আৰক্ষীৰ এটা দলে দিয়াৰা দলঙৰ সমীপত অভিযান চলায়। আৰক্ষীৰ দলটো তালৈ যোৱাৰ লগে লগে তালিব আৰু তেওঁৰ সহযোগী দুজনে তেওঁলোকৰ ওপৰত গুলীচালনা কৰিবলৈ ধৰে।
এজন তদন্তকাৰী বিষয়াই জনোৱা মতে, গুলীয়াগুলীত তালিব আহত হয়। অৱশ্যে ছলমান আৰু মুখতাৰে পলায়ন কৰিবলৈ সক্ষম হয়। সংকটজনক অৱস্থাত তালিবক উদ্ধাৰ কৰি লম্ভুৱা প্ৰাথমিক স্বাস্থ্য কেন্দ্ৰলৈ লৈ যোৱা হয়। তাৰ পৰাই তালিবক চুলতানপুৰ চৰকাৰী চিকিৎসা মহাবিদ্যালয়লৈ স্থানান্তৰ কৰা হয়। তালৈ নিয়াৰ সময়ত চিকিৎসকে তেওঁক মৃত বুলি ঘোষণা কৰে।
আৰক্ষী অধীক্ষক কুনাৰ অনুপম সিঙে জানিবলৈ দিয়া মতে, লখিমপুৰ খেৰীত দুগৰাকী ছোৱালীক ধৰ্ষণ কৰাৰ গোচৰত তালিব, ছলমান আৰু মুখতাৰক আৰক্ষীয়ে বিচাৰি আছিল। তালিবে লখিমপুৰ খেৰী আৰু চুলতানপুৰত আতংকৰ সৃষ্টি কৰিছিল। এই দুই স্থানত তেওঁৰ গেংটো অতি সক্ৰিয়।
