আফগানিস্তানৰ বিৰুদ্ধে প্ৰত্যক্ষ যুদ্ধৰ ঘোষণা কৰিলে পাকিস্তানে (Pak army attack)। কাবুলে অভিযোগ কৰিছে যে বৃহস্পতিবাৰে নিশাৰে পৰা পাকিস্তানে আফগানিস্তানৰ কাবুল, কন্দহাৰ আৰু পাক্তিকাত বিমান আক্ৰমণ চলাইছে। প্রতি আক্রমণত ৫৫ জন পাকিস্তানী জোৱান নিহত হোৱা বুলিও দাবী কৰিছে আফগানিস্তানৰ তালিবান চৰকাৰে৷
অৱশ্যে এই পৰিসংখ্যাৰ সৈতে ইছলামাবাদ একমত নহয়। তেওঁলোকে দুজন পাকিস্তানী জোৱান আৰু ৩৬ জন আফগান জোৱান নিহত হোৱা বুলি দাবী কৰে।
ইতিমধ্যে পাকিস্তানে আফগানিস্তানৰ বিৰুদ্ধে ‘অপাৰেচন গাজাব লিল হক’ নামৰ সামৰিক অভিযান আৰম্ভ কৰাৰ কথা ঘোষণা কৰিছে।
দেশৰ প্ৰধানমন্ত্ৰী শ্বাহবাজ শ্বৰীফে ছ’চিয়েল মিডিয়াত এটা পোষ্টত লিখিছে যে আমাৰ সামৰিক বাহিনী যিকোনো আক্ৰমণাত্মক ইচ্ছাক ধ্বংস কৰিবলৈ সক্ষম। ইছলামবাদে দাবী কৰিছে যে পাক-আফগান সীমান্তত আফগানিস্তানৰ আগ্ৰাসী আচৰণৰ সন্মুখীন হ’বলৈ এই পদক্ষেপ লোৱা হৈছে। অৱশ্যে আফগানিস্তানে এই সংঘাতৰ বাবে পাকিস্তানক দোষাৰোপ কৰিছে।
তালিবান চৰকাৰৰ মুখপাত্ৰ জাবিউল্লাহ মুজাহিদে ছ’চিয়েল মিডিয়াত পোষ্ট কৰি কয়, “কাপুৰুষ পাকিস্তানী সেনাই কাবুল, কন্দহাৰ, পাক্তিকাৰ কিছুমান অঞ্চলত বিমান আক্ৰমণ চলাইছে। সৌভাগ্যক্ৰমে কোনো লোকৰ মৃত্যুৰ খবৰ পোৱা নাই।” কাবুলে দাবী কৰিছে যে পাকিস্তানে প্ৰথমে আফগান সীমান্ত পাৰ হৈ আক্ৰমণ আৰম্ভ কৰিছিল।
শুকুৰবাৰে পুৱা আফগানিস্তানৰ ৰাজধানী কাবুলত বিস্ফোৰণৰ শব্দ শুনা যায়। তালিবানে অভিযোগ কৰে যে ইছলামাবাদে ডুৰাণ্ড লাইন (পাক-আফগান আন্তঃৰাষ্ট্ৰীয় সীমান্ত)ত আক্ৰমণ চলাই আছে। তালিবান চৰকাৰে দাবী কৰে যে আফগান সেনাই পাকিস্তানী সেনা ঘাটি আৰু সীমান্তৰ ১৯টা সেনা চকী মাত্ৰ চাৰি ঘণ্টাৰ ভিতৰতে ধ্বংস কৰে।
আফগানিস্তানৰ ৰাষ্ট্ৰীয় প্ৰতিৰক্ষা বিভাগে প্ৰকাশ কৰা অনুসৰি, পাকিস্তানী সেনাৰ ৫৫ জন জোৱান নিহত হয়। ইয়াৰ উপৰি কেইবাজনো পাকিস্তানী জোৱানক জীৱিত অৱস্থাত বন্দী কৰা হৈছে বুলিও দাবী কৰা হৈছে। কাবুলৰ দাবী যে পাকিস্তানৰ আক্ৰমণত ৮ জন তালিবান যোদ্ধা নিহত হৈছে। ১১ জন আহত হয়।
কিন্তু ইয়াৰ বিপৰীতে পাকিস্তানৰ তথ্য মন্ত্ৰী আতাউল্লাহ তাৰাৰে আফগান আক্ৰমণত দুজন পাকিস্তানী জোৱান নিহত হোৱা বুলি দাবী উত্থাপন কৰে। আহত হৈছে তিনিজন। পাকিস্তানৰ আক্ৰমণত ৩৬ জন তালিবান যোদ্ধা নিহত হোৱা বুলিও তেওঁ দাবী কৰে।
