শেহতীয়াকৈ দেশৰ ভোটাৰ তালিকা নিবিড় সংশোধন প্ৰক্ৰিয়াত (SIR) অনিয়মৰ খবৰ ৰাষ্ট্ৰীয় সংবাদ মাধ্যমত পোহৰলৈ অহাৰ পিছত সমগ্ৰ দেশতে আলোড়নৰ সৃষ্টি হয়। নিৰ্বাচনী প্ৰক্ৰিয়াত স্বচ্ছতাৰ অভাৱক লৈ বিৰোধী ৰাজনৈতিক দলসমূহে সৰৱ হৈ পৰিছে। ককৰোচ জনতা পাৰ্টীয়ে (CJP) মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগৰ সময়সীমা নিৰ্ধাৰণ কৰে। কিন্তু একে সময়তে দাবী পূৰণ নকৰিলে দেশজোৰা আন্দোলনৰ সতৰ্কবাণীও দিয়ে। সেই কাৰণে গান্ধী জয়ন্তীৰ দিনা মুম্বাইৰ শিৱাজী পাৰ্কত এক প্ৰতিবাদী কাৰ্যসূচী আহ্বান কৰা হয়। কিন্তু শেষত মুম্বাই আৰক্ষীয়ে তাৰ অনুমতি নিদিলে। প্ৰতিবাদত চিজেপিৰ প্ৰতিষ্ঠাপক সদস্য অভিজিৎ দীপকেয়ে সেইদিনাই তাত ‘জে’ল ভৰো আন্দোলন’ৰ আহ্বান জনায়। এই কথা প্ৰকাশ কৰিছে ৰাষ্ট্ৰীয় সংবাদ মাধ্যমে।
ছ’চিয়েল মিডিয়া এক্সৰ এটা পোষ্টত এই কাৰ্যসূচী ঘোষণা কৰি দীপকেয়ে লিখিছে, “২ অক্টোবৰত মুম্বাইৰ শিৱাজী পাৰ্কত অনুষ্ঠিত হ’ব ‘জে’ল ভৰো আন্দোলন’। মূলতঃ তিনিটা দাবী উত্থাপন কৰিছে দলটোৱে। এটা হৈছে, মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগ। দ্বিতীয়, নিৰ্বাচন আয়োগৰ বিশেষ নিবিড় পুনৰীক্ষণ (SIR) প্ৰক্ৰিয়া স্থগিত ৰখা উচিত। তৃতীয়, আয়োগৰ আইনী গাঁথনিৰ প্ৰয়োজনীয় পৰিৱৰ্তন।
বৈঠকৰ অনুমতি সন্দৰ্ভত মুম্বাই আৰক্ষীয়ে জনাইছে যে বম্বে উচ্চ ন্যায়ালয়ৰ ৰায় আৰু মহাৰাষ্ট্ৰ চৰকাৰৰ নিৰ্দেশনা অনুসৰি শিৱাজী পাৰ্কৰ দৰে জনবহুল স্থানত এনে সমাৱেশৰ অনুমতি দিয়াৰ কৰ্তৃত্ব তেওঁলোকৰ নাই। তদুপৰি এনে সমাৱেশৰ ফলত শব্দ প্ৰদূষণ, প্ৰচণ্ড যান-জঁটৰ সৃষ্টি হোৱাৰ লগতে সাধাৰণ মানুহৰ চলাচলত ব্যাঘাত জন্মিব বুলি আশংকা কৰা হৈছে। আনহাতে, আন এক বিকল্প স্থান বাছি ল’বলৈও তেওঁলোকক পৰামৰ্শ দিছে আৰক্ষীয়ে।
কিন্তু আৰক্ষীৰ এই সিদ্ধান্তক তীব্ৰ সমালোচনা কৰি দীপকেয়ে কয় যে জনসাধাৰণৰ কণ্ঠক নিস্তব্ধ কৰাৰ এনে প্ৰচেষ্টা কোনো কাৰণতে গ্ৰহণযোগ্য নহয়। ইয়াৰ কিছু সময়ৰ পিছতে ২ অক্টোবৰত ‘জে’ল ভৰো’ কাৰ্যসূচী ৰাজহুৱাভাৱে ঘোষণা কৰে।
