উচ্চতম ন্যায়ালয়ে (Supreme Court) নাবালকক ছ’চিয়েল মিডিয়া (Social media for minors) ব্যৱহাৰৰ ক্ষেত্ৰত দমন কৰিব লাগে বুলি পৰামৰ্শ দিছে। সোমবাৰে মুখ্য ন্যায়াধীশ সূৰ্য কান্তৰ নেতৃত্বত এখন বিচাৰপীঠে কেন্দ্ৰীয় চৰকাৰক এই সন্দৰ্ভত নতুন নিয়ম প্ৰণয়ন কৰিবলৈ কয়। শীৰ্ষ ন্যায়ালয়ে কয় যে কেন্দ্ৰই যদি কোনো ব্যৱস্থা গ্ৰহণ নকৰে তেন্তে তথ্য প্ৰযুক্তি আইনৰ অধীনত আদালতে নিৰ্দেশ জাৰি কৰিবলৈ বাধ্য হ’ব।
‘জাষ্ট ৰাইটছ ফৰ চিলড্ৰেন এলায়েন্স’ নামৰ এটা সংস্থাই ১৮ বছৰৰ তলৰ নাবালকসকলে ছ’চিয়েল মিডিয়া আৰু অন্যান্য ডিজিটেল মিডিয়া ব্যৱহাৰ কৰাৰ বিৰুদ্ধে ‘সুৰক্ষা’ বিচাৰি উচ্চতম ন্যায়ালয়ত জনস্বাৰ্থৰ গোচৰ তৰিছিল। সোমবাৰে গোচৰৰ শুনানিৰ সময়ত মুখ্য ন্যায়াধীশৰ বিচাৰপীঠে বিষয়টোক লৈ উদ্বেগ প্ৰকাশ কৰে। আদালতে জানিব বিচাৰে যে কেন্দ্ৰীয় চৰকাৰে ছ’চিয়েল মিডিয়াত শিশুৰ মুক্ত চলাচল নিয়ন্ত্ৰণৰ বাবে কি পদক্ষেপ গ্ৰহণ কৰিছে।
শুনানিৰ সময়ত কেন্দ্ৰৰ হৈ ছলিচিটৰ জেনেৰেল তুষাৰ মেহতাই কয় যে ওপৰে ওপৰে এই বিষয়টো ডিজিটেল পাৰ্ছনেল ডাটা প্ৰটেকচন এক্টৰ অন্তৰ্গত যেন লাগে। অৱশ্যে ইয়াক পৰীক্ষা কৰাৰ প্ৰয়োজন আছে। আবেদনকাৰীৰ হৈ হাজিৰ হোৱা অধিবক্তা এইচ এছ ফুলকাই উল্লেখ কৰে যে এই আইনখন এতিয়াও বলবৎ হোৱা নাই। ২০২৭ চনত ই প্ৰযোজ্য হ’ব পাৰে। ছলিচিটৰ জেনেৰেলে সেই বক্তব্যৰ সৈতে একমত প্ৰকাশ কৰে।
একে সময়তে তেওঁ আদালতত কয় যে ছ’চিয়েল মিডিয়া ব্যৱহাৰ কৰাৰ বাবে নাবালকক শাস্তি প্ৰদানৰ বাবে ডিজিটেল পাৰ্ছনেল ডাটা প্ৰটেকচন এক্টৰ বিধানৰ লগত আন কোনো আইন সংযোজন কৰিব পাৰি নেকি সেই বিষয়ে বিবেচনা কৰা উচিত। কেন্দ্ৰই এটা ব্যৱস্থা অন্তৰ্ভুক্ত কৰিব বিচাৰিছে যে যদি নাবালকসকলে ছ’চিয়েল মিডিয়াত একাউণ্ট খোলে তেন্তে তেওঁলোকৰ পিতৃ-মাতৃ বা অভিভাৱকৰ সন্মতিৰ প্ৰয়োজন হ’ব। চুক্তিও স্বাক্ষৰ কৰিবলগীয়া হ’ব পাৰে।
ন্যায়াধীশ জয়মাল্য বাগচিয়ে নাবালকসকলে ছ’চিয়েল মিডিয়া ব্যৱহাৰ কৰাত আক্ষেপ কৰি কয়, “এতিয়া ১৫ বছৰীয়া শিশুৱেও টুইটাৰত একাউণ্ট খুলিব পাৰে। ছ’চিয়েল মিডিয়া কোম্পানীসমূহে নিজৰ প্লেটফৰ্মত একাউণ্ট খোলাৰ বাবে ন্যূনতম বয়স ১৮ কৰা উচিত। কেৱল সেয়াই নহয়, এই নিয়ম উলংঘা হৈছে নেকি তাক নিৰীক্ষণ কৰাৰ প্ৰয়োজন আছে। ইয়াৰ পিছত তেওঁ ছলিচিটৰ জেনেৰেলক কয়, “কেন্দ্ৰীয় চৰকাৰেও কিছুমান নিৰ্দেশনা জাৰি কৰিব লাগে, যিবোৰ ভাৰতীয় আইনৰ সৈতে সঙ্গতিপূৰ্ণ।” ইয়াৰ পিছত তুষাৰমেহতাই কয়, “তেওঁলোকে (ছ’চিয়েল মিডিয়া) ভাৰতীয় আইন যে মানি চলিব লাগিব তাত কোনো সন্দেহ নাই।”
আনহাতে, তথ্য প্ৰযুক্তি আইনৰ ৭৯ নং ধাৰা সন্দৰ্ভত মুখ্য ন্যায়াধীশগৰাকীয়ে কয়, “যদি বিষয়টো সঠিকভাৱে সমাধান নহয় তেন্তে আদালতে নিৰ্দেশনা জাৰি কৰিবলৈ বাধ্য হ’ব।”
