আমেৰিকাত বহুজাতিক আইটি কোম্পানীসমূহৰ কৰ্মচাৰীসকলৰ ওপৰত পুনৰবাৰ চাকৰিৰ পৰা চাটাইৰ বাবে ভাবুকি নামি আহিছে। এপ্ৰিলৰ আৰম্ভণিতে অৰেকলৰ ৩০ হাজাৰ কৰ্মচাৰীয়ে ইমেইলযোগে চাকৰি হেৰুৱাইছে।
বুধবাৰে মাৰ্ক জুকাৰবাৰ্গৰ মেটাই একেলগে ৮ হাজাৰ কৰ্মচাৰীক চাকৰিৰ পৰা বৰ্খাস্ত কৰে। ইয়াৰে অধিকাংশই H1B ভিছা থকা বিদেশী। বৃহস্পতিবাৰে জুকাৰবাৰ্গে ছ’চিয়েল মিডিয়াত লিখি নিজৰ এই পদক্ষেপক ন্যায্যতা প্ৰদান কৰি কয় যে আমি জানো যে এইটো এটা অতি কঠিন সিদ্ধান্ত।
আমেৰিকাৰ বিভিন্ন আইটি কোম্পানীত সমূহীয়া চাটাইৰ বলি হোৱা লোকৰ এক বৃহৎ অংশ হৈছে এইচ-টু-বি ভিছা থকা ভাৰতীয় নাগৰিক। আগন্তুক দিনত কৃত্ৰিম বুদ্ধিমত্তাৰ (AI) ব্যৱহাৰৰ ফলত আৰু ডাঙৰ সংকটৰ সৃষ্টি হ’ব বুলি আশংকা কৰা হৈছে।
প্ৰকাশিত কিছুমান বাতৰিয়ে দাবী কৰিছে যে কৃত্ৰিম বুদ্ধিমত্তাৰ আন্তঃগাঁথনি আৰু ডাটা চেণ্টাৰত বিনিয়োগৰ বাবে খৰচ কমোৱাৰ বাবে বিভিন্ন আইটি কোম্পানীত কেইবাটাও পদ বাদ দিয়া হ’ব।
অৰেকলৰ বহু কৰ্মচাৰীয়ে অভিযোগ কৰে যে মানৱ সম্পদ বিভাগৰ সৈতে পূৰ্বৰ কোনো আলোচনা হোৱা নাছিল বা এই সন্দৰ্ভত মেনেজাৰৰ পৰা কোনো ইংগিত পোৱা নাছিল। কিন্তু মেটাই পূৰ্বে ঘোষণা কৰিছিল যে বহু কৰ্মচাৰীক চাকৰিৰ পৰা বৰ্খাস্ত কৰা হ’ব।
ফেচবুকৰ নিয়ন্ত্ৰক সংস্থাই কয় যে তেওঁলোকে দক্ষতা বৃদ্ধিৰ বাবে আৰু কৃত্ৰিম বুদ্ধিমত্তাৰ ওপৰত হোৱা বৃহৎ ব্যয়ৰ প্ৰভাৱ হ্ৰাস কৰিবলৈ নিজৰ ১০ শতাংশ কৰ্মশক্তি অৰ্থাৎ প্ৰায় ৮ হাজাৰ লোকক চাকৰিৰ পৰা বৰ্খাস্ত কৰাৰ পৰিকল্পনা কৰিছে।
ছ’চিয়েল মিডিয়াত প্ৰকাশ কৰা এক বিবৃতিত মেটাই কয় যে ২০ মে’ৰ পৰা এই চাটাই কাৰ্যকৰী হ’ব আৰু সেয়াই হ’ল। ইয়াৰ উপৰি খবৰ আহিছে যে মেটাই কোম্পানীটোত ৬ হাজাৰ খালী পদ পূৰণ কৰাৰ পৰিকল্পনা বৰ্তমান স্থগিত ৰাখিছে।
চাকৰিৰ পৰা বৰ্খাস্ত হোৱাৰ পিছত কোম্পানীটোৰ মুখ্য জনসংযোগ বিষয়া জেনেল গেলে এক বিবৃতিত কয় যে ৭ হাজাৰ কৰ্মচাৰীক এআই ভিত্তিক নতুন টীমলৈ বদলি কৰা হ’ব। প্ৰায় ৬ হাজাৰ খালী পদো বন্ধ কৰা হৈছে।
শেহতীয়াকৈ সমগ্ৰ আমেৰিকাৰ আইটি উদ্যোগত চাকৰিৰ পৰা বৰ্খাস্ত হোৱাৰ ঢৌৱে কেৱল চাকৰিৰ সুযোগ সংকুচিত কৰাই নহয়, ই আমেৰিকাত কাম কৰা ভাৰতীয় পেছাদাৰীসকলৰ মাজত এটা পুৰণি আশংকাও পোহৰলৈ আনিছে যে চাকৰি হেৰুৱাৰ অৰ্থ হ’ব পাৰে দেশখনত থকাৰ অধিকাৰ হেৰুৱাবলগীয়া হোৱা।
আমেৰিকাৰ বেছিভাগ ভাৰতীয় আইটি পেছাদাৰীয়ে এইচ-১বি ভিছাত কাম কৰে, যিবোৰ তেওঁলোকৰ নিয়োগকৰ্তাৰ সৈতে প্ৰত্যক্ষভাৱে জড়িত। চাকৰি এৰিলেই ওভতনি যাত্ৰাৰ সময় গণনা আৰম্ভ হয়।
আমেৰিকাৰ প্ৰব্ৰজন নিয়ম অনুসৰি, তেওঁলোকৰ ভিছাৰ পৃষ্ঠপোষকতা কৰিব পৰা নতুন নিয়োগকৰ্তা বিচাৰিবলৈ সাধাৰণতে মাত্ৰ ৬০ দিনৰ সময় থাকে। বিফল হ’লে দেশ এৰিব লাগিব। আৰু ইয়াতেই ডাঙৰ সমস্যাটো নিহিত হৈ আছে।
আমেৰিকাত কাম কৰা বহু ভাৰতীয়ই বছৰ বছৰ ধৰি গ্ৰীণ কাৰ্ডৰ বাবে অপেক্ষা কৰি আছে। কিছুমানৰ আমেৰিকাত জন্ম হোৱা সন্তান। কোনো কোনোৱে দীৰ্ঘম্যাদী থকাৰ আশাত ঘৰ কিনিছে। চাকৰি হেৰুওৱাৰ পিছত আইনী জঞ্জালৰ বাবে সকলো অনিশ্চিত হৈ পৰিছে।
কিছুমান বাতৰিত দাবী কৰা হৈছে যে বহু চাকৰিৰ পৰা বৰ্খাস্ত কৰা ভাৰতীয় কৰ্মচাৰীয়ে এতিয়া আৰু কেইদিনমান আমেৰিকাত থকাৰ অস্থায়ী বিকল্প বিচাৰিছে। ইয়াৰে এটা হ’ল বি-২ ভিজিটৰ ভিছালৈ সলনি হোৱা, যাৰ ফলত তেওঁলোকে নতুন নিয়োগকৰ্তা বিচাৰি পোৱাৰ সময়ত অতিৰিক্ত কেইমাহমান থাকিব পাৰিব।
আমেৰিকাৰ নাগৰিকত্ব আৰু অভিবাসন সেৱাৰ (USCIS) নিয়ম অনুসৰি, চাকৰিৰ পৰা বৰ্খাস্ত কৰা এইচ-১বি কৰ্মীসকলক সাধাৰণতে ৬০ দিনৰ “গ্ৰেছ পিৰিয়ড” বা তেওঁলোকৰ আই-৯৪ৰ মৰ্যাদা শেষ নোহোৱালৈকে দিয়া হয়, যাতে তেওঁলোকে ইয়াৰ পিছত কি কৰিব সেইটো সিদ্ধান্ত ল’ব পাৰে। এই সময়ছোৱাত তেওঁলোকে নতুন পৃষ্ঠপোষক বিচাৰি পাব পাৰে, আন এটা ভিছা কেটেগৰীত আবেদন কৰিব পাৰে বা দেশ এৰিবলৈ সাজু হ’ব পাৰে।
সাধাৰণতে ৬০ দিনৰ সময়সীমা কৰ্মচাৰীজনৰ কামৰ অন্তিম দিনৰ পৰা আৰম্ভ হয়, তেওঁলোকৰ অন্তিম দৰমহা বেংকত জমা হোৱাৰ দিনটোৰ পৰা নহয়। কেৱল এই বছৰতে ছিলিকন ভেলীৰ আইটি কোম্পানীসমূহৰ এক লাখৰো অধিক কৰ্মচাৰীয়ে চাকৰি হেৰুৱাইছে। ইয়াৰে এক বৃহৎ সংখ্যক ভাৰতীয়।
আইটি উদ্যোগত নিযুক্তিৰ সামগ্ৰিক হ্ৰাসে তেওঁলোকৰ বাবে বিকল্প কৰ্মসংস্থাপন বিচাৰি উলিওৱাত অসুবিধাৰ সৃষ্টি কৰিছে। শেহতীয়াকৈ কৰা এক সমীক্ষাত দেখা গৈছে যে আমেৰিকাত চাকৰি হেৰুৱাই পেলোৱা ভাৰতীয় পেছাদাৰীসকলৰ প্ৰায় আধাসংখ্যকে ভাৰতলৈ ঘূৰি অহাৰ কথা চিন্তা কৰিছে।
আন কিছুমানে কানাডা আৰু ইউৰোপক বিকল্প হিচাপে চাইছে। আমেৰিকাত এইচ-১বি ভিছাৰ ওপৰত নিৰ্ভৰশীল নোহোৱা ভাৰতীয়ৰ পৰিস্থিতি সুকীয়া। যিসকলৰ গ্ৰীণ কাৰ্ড বা স্থায়ী বাসিন্দাৰ মৰ্যাদা আছে তেওঁলোকে চাকৰি হেৰুৱালেও দেশত থাকিব পাৰে।
