শনিবাৰে পুৱা যোৰহাটত (Jorhat) ভাৰতীয় বায়ুসেনা (Indian Air Force)ৰ এএন-৩২ (AN-32) বিমান দুৰ্ঘটনাগ্ৰস্ত (Plane crashed) হৈ নিহত হয় ৫ জনকৈ জোৱান (5 soldiers killed)। নিহতসকলৰ ভিতৰত আছে স্কোৱাড্ৰন লীডাৰ প্ৰশান্ত সিং, ফ্লাইট লেফটেনেণ্ট শুভম কুমাৰ, চাৰ্জেণ্ট জিতেন্দ্ৰ শৰ্মা, অগ্নিবীৰবায়ু ক্ষেমাৰাম কুমাৱত আৰু ডেনিছ আলম। শনিবাৰে পুৱা ৰৰৈয়া বায়ুসেনা ঘাটি (Roraiya Air Force Base)ত অৱতৰণ কৰাৰ সময়ত সংঘটিত হয় এই দুৰ্ঘটনা। দুৰ্ঘটনা সংঘটিত হোৱাৰ পিছতে বিমানখনত অগ্নিকাণ্ড সংঘটিত হয় আৰু দুটা পৃথক দুৰ্ঘটনাত পতিত হয় বিমানখন।
শনিবাৰে পুৱা প্ৰায় ৯.৪৫ বজাত নিয়মীয়া প্ৰশিক্ষণ অনুশীলন চলাইছিল সামৰিক বিমানখনে। বায়ুসেনাৰ ঘাটিৰ ৰাণৱেত অৱতৰণ কৰাৰ সময়তে বিমানখনৰ চকা ফাটি যোৱাৰ সন্দেহ কৰা হৈছে। ইয়াৰ পিছত ৰাণৱেৰ পৰা ছিটিকি বিমানখন দুটুকুৰা হৈ যায়। লগতে বিমানখনত অগ্নিকাণ্ড সংঘটিত হয়। এই ঘটনাক লৈ শোক প্ৰকাশ কৰিছে বায়ুসেনাই। তেওঁ মৃত জোৱানসকলৰ পৰিয়াললৈ সমবেদনা জ্ঞাপন কৰিছে। আনহাতে, মুখ্যমন্ত্ৰী হিমন্ত বিশ্ব শৰ্মাই সমবেদনা জ্ঞাপন কৰি কয়, “ভাৰতীয় বায়ুসেনাৰ এএন-৩২ বিমানখন যোৰহাটত দুৰ্ঘটনাত পতিত হোৱাৰ খবৰে অতি ব্যথিত কৰি তুলিছে৷ বিমানখনত থকা দেশৰ পাঁচগৰাকী সাহসী বায়ুসেনা জোৱানৰ অকাল বিয়োগৰ খবৰটিয়ে গভীৰভাৱে মর্মাহত কৰি তুলিলে। মাতৃভূমিৰ সেৱাত আত্মনিয়োগ কৰি স্কোৱাড্ৰন লীডাৰ প্ৰশান্ত সিং, ফ্লাইট লেফটেনেণ্ট শুভম কুমাৰ, ছাৰ্জেণ্ট জিতেন্দ্ৰ শৰ্মা, অগ্নিবীৰবায়ু খেমাৰাম কুমাৱট আৰু অগ্নিবীৰবায়ু ডেনিছ আলমে দেশৰ বাবে যি সৰ্বোচ্চ ত্যাগ আগবঢ়াই গ’ল, সেয়া ভাৰতবৰ্ষই চিৰদিন মনত ৰাখিব৷”
তেওঁ লগতে কয়, “এই অপূৰণীয় ক্ষতিৰ মুহূর্তত শোকসন্তপ্ত পৰিয়ালবৰ্গলৈ মোৰ আন্তৰিক সমবেদনা জ্ঞাপন কৰিছোঁ। অসমবাসীৰ হৈ এই বীৰ সন্তানসকলক গভীৰ শ্ৰদ্ধাঞ্জলি জনাইছোঁ।”
লগতে কয়, “এই গভীৰ শোকৰ সময়ত অসম চৰকাৰ আৰু অসমবাসী প্ৰতিজন বীৰজোৱানৰ পৰিয়ালৰ কাষত আছে আৰু সদায় থাকিব। তেখেতসকলৰ ত্যাগ আৰু দেশপ্ৰেম চিৰদিন অম্লান হৈ থাকিব।”
উল্লেখ্য যে এএন-৩২ বিমান মূলতঃ সামৰিক সঁজুলি আৰু সৈন্য পৰিবহণৰ বাবে ব্যৱহাৰ কৰা হয়। প্ৰতিকূল বতৰ আৰু পৰিস্থিতিত সামৰিক সামগ্ৰী উদ্ধাৰ আৰু যোগানৰ বাবে দুৰ্গম অঞ্চলত এই বিমানখন অতুলনীয়। ই ৭.৫ টন ওজন কঢ়িয়াব পাৰে। ইয়াত ৫০ জন জোৱান কঢ়িয়াই নিব পৰা ক্ষমতা আছে।
জানিব পৰা মতে, ৰৰৈয়া বায়ুসেনাঘাটিত সংঘটিত হয় এই দুৰ্ঘটনা। এই বায়ুসেনাঘাটিটো উত্তৰ-পূব ভাৰতৰ এটা গুৰুত্বপূৰ্ণ বিমানবন্দৰ। অসম তথা অঞ্চলটোৰ সামৰিক কাৰ্যকলাপত এই বন্দৰটোৱে উল্লেখযোগ্য ভূমিকা পালন কৰে। অৱশ্যে ১৯৮৬ চনৰ পৰা এই শ্ৰেণীৰ ২২ খন বিমান দুৰ্ঘটনাগ্ৰস্ত হৈছে। যোৱা বছৰো এএন-৩২ বিমান এখন দুৰ্ঘটনাগ্ৰস্ত হৈছিল। বাৰে বাৰে দুৰ্ঘটনা সংঘটিত হোৱাৰ পিছতো বায়ুসেনাই কিন্তু এই সামৰিক বিমানখনৰ ওপৰত যথেষ্ট নিৰ্ভৰশীল।
