ডিফু ২১ জুনঃ ডিফুৰ ছাৰছিং টেৰন লাংকুং হাবে বহুমুখী ক্ৰীড়া কমপ্লেক্সত দেওবাৰে “স্বাস্থ্যকৰ বয়স বৃদ্ধিৰ বাবে যোগ” শীৰ্ষক বিষয়বস্তুৰে দ্বাদশ আন্তঃৰাষ্ট্ৰীয় যোগ দিৱস উৎসাহেৰে পালন কৰা হয়। এই কাৰ্যসূচীত চৰকাৰী বিষয়া, ছাত্ৰ-ছাত্ৰী, যোগ সাধক আৰু জনসাধাৰণৰ অংশগ্ৰহণৰ সাক্ষী হৈ পৰে।
কেএএচিৰ মুখ্য কাৰ্যবাহী সদস্য তথা বিধায়ক ড° তুলিৰাম ৰংহাঙে মুখ্য অতিথি হিচাপে উপস্থিত থাকে। অনুষ্ঠানত সংসদৰ সদস্য অমৰসিং টিছ’ আৰু জিলা উপায়ুক্ত অৰণ্যক শইকীয়া উপস্থিত থাকে। মুখ্য অতিথি হিচাপে সভাক ভাষণ দি কেএএচিৰ চিইএম আৰু বিধায়ক ড০ তুলিৰাম ৰংহাঙে কয় যে যোগ কেৱল শাৰীৰিক ব্যায়াম নহয় বৰঞ্চ শাৰীৰিক ফিটনেছ, মানসিক শান্তি আৰু আৱেগিক ভাৰসাম্য ৰক্ষা কৰাত সহায় কৰা জীৱনশৈলী। সুস্থ সমাজ এখনৰ বাবে দৈনন্দিন কাম-কাজৰ অংশ হিচাপে যোগাসন গ্ৰহণ কৰিবলৈ তেওঁ ৰাইজক আহ্বান জনায়।
এই উপলক্ষে চি ই এম ড০ তুলিৰাম ৰংহাং, সাংসদ অমৰছিং টিছ’, বিধায়ক নিসো তেৰণপি আৰু জিলা উপায়ুক্ত অৰণ্যক শইকীয়াই যোৱা ১৯ জুন, ২০২০ তাৰিখে অনুষ্ঠিত জিলা পৰ্যায়ৰ যোগ প্ৰতিযোগিতাৰ চাৰিটা শাখাৰ বিজয়ীসকলক পুৰস্কাৰ বিতৰণ কৰে।
