ইৰাণৰ ওপৰত আমেৰিকাৰ পুনৰ আক্ৰমণ (US Iran Conflict)। যোৱা বৃহস্পতিবাৰে হৰমুজ প্ৰণালীত এখন মালবাহী জাহাজত আক্ৰমণ কৰা হৈছিল। আমেৰিকাৰ দাবী যে ইৰাণে স্বাক্ষৰিত বুজাবুজিৰ চুক্তিৰ চৰ্ত উলংঘা কৰি এই আক্ৰমণ সংঘটিত কৰিছে।
ইয়াৰ প্ৰতিক্ৰিয়া স্বৰূপে শুকুৰবাৰে ইৰাণৰ উপকূলীয় অঞ্চলত থকা ক্ষেপণাস্ত্ৰ আৰু ড্ৰোন গুদামসমূহক লক্ষ্য কৰি লয় আমেৰিকান বাহিনীয়ে।
পশ্চিম এছিয়াত সক্ৰিয় হৈ থকা আমেৰিকাৰ সামৰিক চেণ্ট্ৰেল কমাণ্ডে দাবী কৰিছে যে উপকূলীয় ৰাডাৰ ছাইটতো আক্ৰমণ কৰা হৈছে। ইৰাণৰ আক্ৰমণৰ পিছত আমেৰিকাৰ উপ-ৰাষ্ট্ৰপতি জে ডি ভেন্সে ছ’চিয়েল মিডিয়াত পোষ্ট কৰি নিজৰ বাৰ্তা স্পষ্ট কৰি দিয়ে। তেওঁ কয় যে ইৰাণে হিংসাৰ উত্তৰত হিংসাই পাব।
তেওঁ কয়, “ইৰাণে যুদ্ধবিৰতি চুক্তিত স্বাক্ষৰ কৰিলে। আমি ইয়াক সন্মান জনাইছোঁ। বুজাবুজি চুক্তিৰ চৰ্তসমূহ কাৰ্যকৰী হোৱাৰ ধৰণৰ ওপৰত যদি ইৰাণৰ কিবা আপত্তি আছে, তেন্তে তেওঁলোকে ফোন কৰিব পাৰে। কিন্তু হিংসাৰ উত্তৰ হিংসাই হ’ব।”
উল্লেখ্য যে হৰমুজত মালবাহী জাহাজক আক্ৰমণ কৰাৰ অভিযোগ তেহৰানে অস্বীকাৰ কৰিছে। তেওঁলোকৰ ওলোটা দাবী যে আমেৰিকাই চৰ্ত উলংঘা কৰি জাহাজখনক আক্ৰমণ কৰিছিল।
ওমানৰ উপকূলৰ মাজেৰে পাৰ হৈ গৈছিল জাহাজখন। আগতে আমেৰিকাৰ হৰমুজ অৱৰোধৰ সময়ত আমেৰিকাৰ সেনাই এই অংশত কেইবাখনো জাহাজ আক্ৰমণ কৰিছিল। অৱশ্যে আমেৰিকাৰ ৰাষ্ট্ৰপতি ড’নাল্ড ট্ৰাম্পে দাবী কৰিছে যে ইৰাণে জাহাজখনত আঘাত কৰিছে।
এই ঘটনাৰ পিছত ইৰাণে ঘোষণা কৰে যে তেওঁলোকে পুনৰ হৰমুজ নিয়ন্ত্ৰণ কৰিবলৈ আৰম্ভ কৰিব। তেহৰানে পশ্চিম এছিয়াৰ দেশসমূহলৈও আমেৰিকাৰ কাষত থিয় নহ’বলৈ বাৰ্তা প্ৰেৰণ কৰিছে। ফলত পৰিস্থিতি ক্ৰমান্বয়ে জটিল হৈ পৰিছে। স্বাক্ষৰিত বুজাবুজি চুক্তিখন বৰ্তি থাকিব নে নাই সেই লৈ সন্দেহৰ সৃষ্টি হৈছে।
বুজাবুজি চুক্তি স্বাক্ষৰিত হোৱাৰ পিছত আমেৰিকা আৰু ইৰাণৰ প্ৰতিনিধিয়ে ছুইজাৰলেণ্ডত বৈঠকত মিলিত হয়। জাহাজখনত হোৱা আক্ৰমণক লৈ পুনৰ উত্তপ্ত হৈ পৰিছে হৰমুজ। ইৰাণৰ উপকূলত থকা ক্ষেপণাস্ত্ৰ আৰু ড্ৰোন গুদামত আক্ৰমণৰ কথা নিশ্চিত কৰিছে কেন্দ্ৰীয় কমাণ্ডে।
ইৰাণে দাবী কৰিছে যে তেওঁলোকেও উক্ত অঞ্চলত থকা আমেৰিকাৰ ঘাটিসমূহক লক্ষ্য কৰি ইয়াৰ প্ৰতিক্ৰিয়া প্ৰকাশ কৰিছে। অৱশ্যে ইৰাণৰ আক্ৰমণ আৰু ক্ষয়-ক্ষতিৰ সন্দৰ্ভত এতিয়াও কোনো মন্তব্য কৰা নাই আমেৰিকাৰ সেনাই।
