তিনি বছৰীয়া শিশুক ধৰ্ষণ (Three-year-old child raped) কৰি হত্যা কৰাৰ অপৰাধত পুনেৰ আদালতে মৃত্যুদণ্ডৰ শাস্তি প্ৰদান (Awarding the death penalty) কৰিছে। বিশেষ আদালতে অপৰাধৰ দুমাহৰ ভিতৰতে অভিযুক্তক দোষী সাব্যস্ত কৰি মৃত্যুদণ্ডৰ শাস্তি প্ৰদান কৰে। ন্যায়াধীশগৰাকীয়ে এই কাণ্ডক ‘বিৰলতকৈ বিৰল’ বুলি অভিহিত কৰে।
যোৱা ১ মে’ত সংঘটিত হৈছিল এই ঘটনা। পুনে জিলাৰ এখন গাঁৱৰ পৰা শিশুটিক লোভ দি অভিযুক্তই অপহৰণ কৰিছিল। তাৰ পিছত তিনি বছৰীয়া শিশুটিক এখন খেতিপথাৰলৈ লৈ গৈ ধৰ্ষণ কৰি ডিঙি চেপি হত্যা কৰে। ২৫ জুনত পুনে বিশেষ আদালতৰ ন্যায়াধীশ এছ আৰ ছালুংকে অভিযুক্তক দোষী সাব্যস্ত কৰে। ইয়াৰ পিছত সোমবাৰে তেওঁ এই শাস্তি ঘোষণা কৰে। আদালতে মৃত্যুদণ্ড ঘোষণা কৰাৰ সময়তে কাঠগড়াত থিয় হৈ আছিল অভিযুক্ত। ন্যায়াধীশগৰাকীয়ে তেওঁৰ অপৰাধক ‘বিৰলতকৈ বিৰল’ বুলিও অভিহিত কৰে। আদালতে অভিযুক্তক মৃত্যুদণ্ড প্ৰদান কৰাৰ লগে লগে আদালতৰ কক্ষত কান্দোনত ভাঙি পৰে পৰিয়ালৰ লোক।
ৰায়দানৰ মূল অংশটো পঢ়ি শুনোৱাৰ সময়ত ন্যায়াধীশগৰাকীয়ে কয় যে দাখিল কৰা সকলো প্ৰমাণৰ ভিত্তিত অপৰাধৰ ভয়াৱহতা প্ৰমাণিত হৈছে। তেওঁ পৰ্যবেক্ষণ কৰে যে পূৰ্বেও অভিযুক্তৰ বিৰুদ্ধে গুৰুতৰ আক্ৰমণৰ অভিযোগ উত্থাপন হৈছে। ন্যায়াধীশগৰাকীয়ে কয়, “এটা অতি জঘন্য অপৰাধ সংঘটিত হৈছে। অমানৱীয় ব্যৱহাৰ আৰু অত্যাচাৰ কৰা হৈছে। এই গোচৰত ভুক্তভোগীজন আছিল এগৰাকী নিৰীহ আৰু অসহায় শিশু। এই হত্যাকাণ্ড যিধৰণেৰে সংঘটিত হৈছিল, তাৰ পৰাই এক অত্যন্ত বিকৃত মানসিকতাৰ পৰিচয় পোৱা গৈছে। শিশুটিক কোনো প্ৰৰোচনা নোহোৱাকৈ ঠাণ্ডা মগজুৰে হত্যা কৰা হৈছিল। এইটো ইমানেই নিৰ্মমভাৱে কৰা হৈছিল যে ই মানুহৰ ৰ বিবেকক স্তম্ভিত কৰি দিয়ে।”
ন্যায়াধীশগৰাকীৰ মতে, এই গোচৰত অভিযুক্তৰ শাস্তি হ্ৰাস কৰাৰ কোনো পৰিস্থিতি নাই। তেওঁ কয়, “এই গোচৰত মাত্ৰ এটা কথাহে আহিব পাৰে, সেয়া হ’ল অভিযুক্তৰ বয়স। তেওঁ এজন ৬৫ বছৰীয়া ব্যক্তি। কিন্তু ইয়াক তেওঁৰ শাস্তি হ্ৰাস কৰাৰ কাৰণ হিচাপে গণ্য কৰিব নোৱাৰি। বৰঞ্চ ই অপৰাধৰ ভয়াৱহতাক আৰু বৃদ্ধি কৰে।”
