কোনো অধিবক্তাই আদালতত ৰাম মন্দিৰ (Ram Mandir)ৰ প্ৰণামী চুৰিৰ অভিযোগ (Accusation of Pranami theft)ত অভিযুক্তসকলক প্ৰতিনিধিত্ব কৰিব নোৱাৰিব। এই নিৰ্দেশ অযোধ্যা উকীল সন্থা (Ayodhya Lawyers’ Association)ৰ। লগতে জনোৱা হৈছে যে যদি কোনো অধিবক্তাই অভিযুক্তক প্ৰতিনিধিত্ব কৰে তেন্তে তেওঁৰ পৰা ৫ লাখ টকাৰ জৰিমনা আদায় কৰা হ’ব।
সোমবাৰে অযোধ্যা বাৰ এছোচিয়েচনৰ সদস্যসকলৰ এখন বৈঠক অনুষ্ঠিত হয়। উক্ত বৈঠকতে সিদ্ধান্ত লোৱা হয় যে সংগঠনটোৰ কোনো সদস্যই এই গোচৰত অভিযুক্তক প্ৰতিনিধিত্ব নকৰে। ইয়াৰ সমান্তৰালকৈ অধিবক্তা সংগঠনটোৱে দীৰ্ঘদিন ধৰি ৰাম মন্দিৰৰ প্ৰশাসনৰ লগত জড়িত তিনিজন লোকক তিনিদিনৰ ভিতৰত অযোধ্যা এৰি যাবলৈ নিৰ্দেশ দিছে। তেওঁলোক হৈছে শ্রী ৰাম জন্মভূমি তীর্থক্ষেত্র ন্যাসৰ প্রাক্তন সাধাৰণ সম্পাদক চম্পত ৰায়, অনিল মিশ্র আৰু ন্যাসৰ অন্যতম সদস্য গোপাল ৰাও৷
প্ৰণামী বিতৰ্কতো এই তিনিজন লোকৰ নাম সন্নিবিষ্ট কৰা হৈছে। এনে পৰিস্থিতিত যদি ৭২ ঘণ্টাৰ ভিতৰত চম্পতকে ধৰি তিনিজন লোক অযোধ্যাৰ পৰা ওলাই নাযায় তেন্তে অযোধ্যা উকীল সন্থাই সমগ্ৰ চহৰখন অৱৰোধৰ আহ্বান জনাইছে। উকীল সন্থাৰ সভাপতি কালিকা প্ৰসাদ মিশ্ৰই কয়, “এই গোচৰত আমাৰ কোনো অধিবক্তাই অভিযুক্তৰ বাবে আবেদন নকৰে। কোনোবাই যদি তেনে কৰে তেন্তে তেওঁৰ পৰা ৫ লাখ টকাৰ জৰিমনা আদায় কৰা হ’ব।” ইতিমধ্যে চম্পতকে ধৰি তিনিজন লোকৰ বিৰুদ্ধে গোচৰ ৰুজু কৰিবলৈ অযোধ্যা উকীল সন্থাই আদালতৰ কাষ চাপিছে। প্ৰণামী গোচৰৰ চিবিআইৰ তদন্তৰ বাবেও অনুৰোধ জনাইছে।
ৰাম মন্দিৰত জমা হোৱা প্ৰণামিত অনিয়মৰ অভিযোগৰ তদন্তৰ দায়িত্ব দিয়া বিশেষ তদন্তকাৰী দলে মঙলবাৰে এই সন্দৰ্ভত প্ৰাৰম্ভিক প্ৰতিবেদন দাখিল কৰে। ইয়াৰ পিছত বৃহস্পতিবাৰে এছআইটিৰ পৰামৰ্শ অনুযায়ী ট্ৰাষ্টীসকলৰ অন্যতম কৃষ্ণ মোহনে শ্ৰী ৰাম জন্মভূমি তীৰ্থক্ষেত্ৰ ট্ৰাষ্টৰ হৈ আনুষ্ঠানিকভাৱে আঠজন লোকৰ বিৰুদ্ধে আৰক্ষীৰ ওচৰত এজাহাৰ দাখিল কৰে। তাৰ ভিত্তিত আৰক্ষীয়ে এফআইআৰ ৰুজু কৰি সেই নিশাই আঠজন অভিযুক্তক গ্ৰেপ্তাৰ কৰে। ইয়াৰে একাংশৰ ঠিকনাৰ পৰা উদ্ধাৰ হৈছে হিচাপ বহিৰ্ভূত ৮০ লাখ টকা।
