পত্নীয়ে পৰপুৰুষৰ সৈতে প্ৰেমৰ সম্পৰ্ক স্থাপন কৰা বুলি সন্দেহ (Suspecting his wife’s affair) কৰি এজন ব্যক্তিয়ে নিজৰ দুগৰাকী কন্যাক হত্যা (Killed his two daughters) কৰে। লগতে নিজেও ডিঙি কাটি আত্মহত্যাৰ চেষ্টাও (Attempted suicide himself) কৰে। বেংগালুৰুত (Bengaluru) সংঘটিত এই ঘটনা সন্দৰ্ভত আৰক্ষীয়ে তদন্ত আৰম্ভ কৰিছে।
জানিব পৰা মতে, এছ জি ইমৰাণ নামৰ ব্যক্তিজনে দেওবাৰে বিয়লি বেংগালুৰুৰ কেম্পেগৌডা বিমানবন্দৰৰ সমীপত হোটেল বুকিং কৰিছিল। সোমবাৰে বিয়লি ৪ বজাত হোটেলৰ কৰ্মচাৰীয়ে কোঠাটো চাফা কৰিবলৈ মাত দিয়ে, কিন্তু কোনেও কোনো সঁহাৰি নিদিলে। ইয়াৰ পিছত চাফাই কৰ্মীসকলে দুৱাৰখন খুলি কোঠাটোত প্ৰৱেশ কৰি বিচনাত অচেতন হৈ পৰি থকা দুটি শিশু উদ্ধাৰ কৰে। তেওঁলোকৰ বয়স এটিৰ পাঁচ বছৰ আৰু আনটিৰ ১০ বছৰ। আনহাতে, ব্যক্তিজনক শৌচাগাৰত ৰক্তাক্ত অৱস্থাত উদ্ধাৰ কৰা হয়। ততাতৈয়াকৈ তেওঁক ওচৰৰ চিকিৎসালয়লৈ প্ৰেৰণ কৰা হয়। এতিয়াও তেওঁ তাত চিকিৎসাধীন হৈ আছে যদিও তেওঁৰ অৱস্থা সুস্থিৰ।
আৰক্ষীৰ সূত্ৰ অনুসৰি, চিকিৎসালয়ৰ বিচনাত পৰি থকা ইমৰাণ নামৰ ব্যক্তিজনে নিজৰ দুগৰাকী কন্যাক ডিঙি চেপি হত্যা কৰা বুলি স্বীকাৰ কৰে। ইয়াৰ পিছত তেওঁৰ ডিঙি ছুৰীৰে কাটি আত্মহত্যাৰ চেষ্টা কৰে। নিজৰ সিদ্ধান্তৰ কাৰণ জনাই তেওঁ কয় যে তেওঁৰ পত্নীৰ আন এজন যুৱকৰ সৈতে সম্পৰ্ক আছে। ইয়াৰ প্ৰমাণ তেওঁ লাভ কৰিছে। সেইবাবেই তেওঁ নিবিচাৰিছিল যে তেওঁৰ সন্তানে এনে এগৰাকী মাতৃৰ লগত ডাঙৰ হোৱাটো। সেইবাবেই তেওঁ নিজৰ সন্তান দুটাক হত্যা কৰি আত্মহত্যাৰ চেষ্টা চলাইছিল বুলিও কয়।
ইতিমধ্যে এই ঘটনাৰ তদন্ত আৰম্ভ কৰিছে বেংগালুৰু আৰক্ষীয়ে। হত্যাৰ গোচৰ ৰুজু হৈছে। ইমৰাণৰ ঘৰ উত্তৰ বেংগালুৰুৰ নাগাৱাৰাত। স্থানীয় ৰাইজৰ সৈতে কথা পাতি তেওঁৰ বৃত্তি কি আৰু তেওঁৰ দাবীত কিমান সত্যতা আছে সেয়া নিশ্চিত কৰাৰ চেষ্টা চলাইছে আৰক্ষীয়ে। এই সন্দৰ্ভত বেংগালুৰু আৰক্ষীৰ উপ-আয়ুক্ত জি কে মিথুন কুমাৰে কয়, “ঘটনাৰ খবৰ পোৱাৰ লগে লগে আমি হোটেললৈ গৈছিলো। হোটেল কৰ্তৃপক্ষৰ সৈতে কথা পাতিছিলো। আমি সকলো দিশৰ তদন্ত কৰি আছো।”
