আত্মনিৰ্ভৰশীল আৰু উন্নত ভাৰত গঢ়ি তোলা আৰু সেই লক্ষ্যত উপনীত হোৱাৰ দিশত দেশে কেইবাটাও পদক্ষেপ গ্ৰহণ কৰিছে বুলি প্ৰধানমন্ত্ৰী নৰেন্দ্ৰ মোদীয়ে নতুন দিল্লীৰ ‘ছেমিকন ইণ্ডিয়া ২০২৬’ৰ (Semicon India) মঞ্চৰ পৰা দাবী কৰে। ইয়াৰ সমান্তৰালকৈ তেওঁ ৭৬ সংখ্যক জন্মদিনত বিশ্বত ভাৰতৰ ক্ৰমবৰ্ধমান কূটনৈতিক আৰু অৰ্থনৈতিক শক্তিৰ এখন ছবি দাঙি ধৰে। বৃহস্পতিবাৰে নতুন দিল্লীত ‘ছেমিকন ইণ্ডিয়া’ উদ্বোধন কৰে প্ৰধানমন্ত্ৰীয়ে। তাৰ পৰাই তেওঁ অৰ্ধপৰিবাহী উদ্যোগত দেশৰ অগ্ৰগতিৰ ওপৰতো আলোকপাত কৰে।
কেৱল সেয়াই নহয়, শেহতীয়াকৈ নতুন দিল্লীত অনুষ্ঠিত ব্ৰিকছৰ বিষয়টোও প্ৰধানমন্ত্ৰীৰ ভাষণত আহে। মোদীয়ে কয় যে এই সন্মিলনত ‘নতুন দিল্লীৰ ঘোষণা’ সৰ্বসন্মতিক্ৰমে গ্ৰহণ কৰা আৰু বিশ্বৰ অৰ্থনৈতিক মন্দাৱস্থাৰ মাজতো ভাৰতৰ জিডিপি ৭.৮ শতাংশ বৃদ্ধিয়ে ভাৰতৰ প্ৰতি বিশ্বৰ দেশসমূহৰ কিমান আস্থা আৰু ভৰসা বৃদ্ধি পাইছে সেয়া প্ৰমাণ কৰে। তেওঁ কয়, “এফালে ভাৰতৰ অৰ্থনীতি মজবুত হৈ আহিছে, আনফালে ভাৰতৰ প্ৰতি বিশ্বৰ আস্থা ক্ৰমান্বয়ে বৃদ্ধি পাইছে। আৰু সেই আস্থাৰ ভাবমূৰ্তি কিছুদিন পূৰ্বে অনুষ্ঠিত ব্ৰিকছ সন্মিলনত প্ৰকাশ পাইছে।
নতুন দিল্লীৰ ঘোষণাক সৰ্বসন্মতিক্ৰমে গ্ৰহণ কৰাটো ভাৰতৰ প্ৰতি বিশ্বৰ আস্থাৰ আন এক ডাঙৰ প্ৰমাণ।” উল্লেখ্য যে নতুন দিল্লীত ১৮ সংখ্যক ব্ৰিকছ সন্মিলন ১২ আৰু ১৩ ছেপ্টেম্বৰত অনুষ্ঠিত হৈছিল। এই মঞ্চৰ পৰাই মোদীয়ে ভাৰতৰ আন্তঃৰাষ্ট্ৰীয় কূটনৈতিক সফলতাৰ ওপৰত আলোকপাত কৰে। ব্ৰিকছ সন্মিলনত ইৰাণ আৰু সংযুক্ত আৰব আমিৰশ্বাহীৰ মাজত মতানৈক্য থকাৰ পাছতো আলোচনাৰ জৰিয়তে কেনেকৈ একমতত উপনীত হোৱাটো সম্ভৱ হ’ল আৰু ইয়াত ভাৰতৰ ভূমিকা কি সেই বিষয়েও প্ৰধানমন্ত্ৰীয়ে আলোকপাত কৰে।
ইয়াৰ পিছত মোদীয়ে কয় যে ভাৰতৰ অৰ্থনীতিৰ ওপৰত বিশ্বৰ আস্থা যিমানেই বাঢ়িছে, প্ৰযুক্তিৰ ক্ষেত্ৰতো বিশ্বত দেশখনৰ গুৰুত্ব বাঢ়িছে। অৰ্ধপৰিবাহী উদ্যোগত দেশৰ অগ্ৰগতিৰ ওপৰত আলোকপাত কৰি প্ৰধানমন্ত্ৰীয়ে কয় যে ইতিমধ্যে ১২টা অৰ্ধপৰিবাহী প্ৰকল্পৰ কাম আৰম্ভ হৈছে। কিছুমান প্ৰকল্পত বাণিজ্যিক চিপ উৎপাদনো আৰম্ভ হৈছে। ইয়াৰ পিছত তেওঁ কয়, “এই তিনিটা ক্ষেত্ৰ প্ৰযুক্তি, উদ্ভাৱন আৰু উৎপাদন একত্ৰিত কৰি ভাৰতে আত্মনিৰ্ভৰ ভাৰতৰ লক্ষ্যত উপনীত হোৱাৰ দিশত আগবাঢ়িব।”
