তিৰুৱনন্তপুৰমত ৱেষ্ট ইণ্ডিজৰ বিৰুদ্ধে এদিনীয়া শৃংখলাৰ প্ৰথমখন মেচত দেওবাৰে বিৰাট কোহলীয়ে শতক অৰ্জন কৰে। তেওঁ ১৩৯ ৰানৰ ইনিংছ খেলি ভাৰতীয় দলক জয়ৰ দিশে আগুৱাই লৈ যায়। এই ইনিংছটোত কোহলীয়ে ৭টা অভিলেখ গঢ়িবলৈ সক্ষম হৈছে।
দ্ৰুততম ১৫,০০০ ৰাণ
শচীন তেণ্ডুলকাৰৰ পিছত এদিনীয়া ক্ৰিকেটত ১৫ হাজাৰ ৰাণ সংগ্ৰহ কৰা কোহলী দ্বিতীয়জন বেটছমেন হিচাপে পৰিগণিত হয়। অৱশ্যে শচীনতকৈ কম ইনিংছত তেওঁ এই অভিলেখ অৰ্জন কৰে। কোহলীয়ে ৩০৩ ইনিংছত ১৫ হাজাৰ ৰাণৰ মাইলৰ খুঁটিত উপনীত হয়। শচীন তেণ্ডুলকাৰে ইয়াৰ বাবে ৩৭৭টা ইনিংছ লৈছিল।
সৰ্বাধিক প্ৰথম শ্ৰেণীৰ শতক
তিৰুৱনন্তপুৰমত শতক অৰ্জন কৰাৰ পিছত কোহলীয়ে প্ৰথম শ্ৰেণীৰ ক্ৰিকেটত ৬০টা শতক অৰ্জন কৰিছে। শচীনৰ নামতো ৬০টা শতক আছে। এতিয়ালৈকে শচীন তেণ্ডুলকাৰ এই তালিকাত শীৰ্ষত আছিল। কোহলীয়ে তেওঁক স্পৰ্শ কৰে। অৱশ্যে তেণ্ডুলকাৰতকৈ বহু কম ইনিংছত কোহলীয়ে এই কৃতিত্ব অৰ্জন কৰে। তেওঁ ৩৩৮টা ইনিংছ লোৱাৰ বিপৰীতে শচীনে ৫৩৮ ইনিংছ লৈছিল।
ঘৰুৱা মাটিত এদিনীয়া ক্ৰিকেটত সৰ্বাধিক ৰাণ
ভাৰতৰ মাটিত এদিনীয়া ক্ৰিকেটত ১৩১ খন মেচত ৭০০৬ ৰাণ সংগ্ৰহ কৰিবলৈ সক্ষম হৈছে কোহলীয়ে। ঘৰুৱা মাটিত ৭০০০ ৰোধিক ৰাণ সংগ্ৰহ কৰা তেওঁ হৈছে একমাত্ৰ ক্ৰিকেটাৰ। এতিয়ালৈকে এই অভিলেখ শচীনৰ নামতে আছিল। দেশৰ মাটিত ১৬৪ খন মেচত তেণ্ডুলকাৰে ৬,৯৭৬ ৰাণ সংগ্ৰহ কৰিছিল। সেই অভিলেখ ভংগ কৰিছে কোহলীয়ে।
দেশৰ মাটিত এদিনীয়া ক্ৰিকেটত অধিক শতক
ঘৰৰ মাটিত এদিনীয়া ক্ৰিকেটত কোহলীৰ এয়া ৪২ সংখ্যক শতক। ২৩২ খন মেচত তেওঁ এই কৃতিত্ব অৰ্জন কৰে। দেশৰ মাটিত এদিনীয়া ক্ৰিকেটত শচীনেও ৪২টা শতক অৰ্জন কৰিছে। তেওঁ ইয়াৰ বাবে ২৫৮ খন মেচ লৈছিল।
ৰাণৰ লক্ষ্য অনুসৰণত অধিক শতক
এদিনীয়া ক্ৰিকেটত জয়ৰ লক্ষ্য অনুসৰণ কৰি ৩০টা শতক অৰ্জন কৰিছে কোহলীয়ে। এই ক্ষেত্ৰত তেওঁ আন খেলুৱতকৈ বহু আগবাঢ়ি আছে। দ্বিতীয় স্থানত আছে ৰোহিত শৰ্মা। এই ক্ষেত্ৰত ৰোহিতে ১৮টা শতক অৰ্জন কৰিছে।
এখন দেশৰ বিৰুদ্ধে সৰ্বাধিক শতক
ৱেষ্ট ইণ্ডিজৰ বিৰুদ্ধে কোহলীৰ এয়া দশম শতক। এদিনীয়া ক্ৰিকেটত কোনো বিশেষ দলৰ বিৰুদ্ধে ইমান শতক অৰ্জন কৰা ৰেকৰ্ড আন কাৰো নাই। কেৱল ৱেষ্ট ইণ্ডিজেই নহয়, এদিনীয়া ক্ৰিকেটত শ্ৰীলংকাৰ বিৰুদ্ধেও কোহলীৰ ১০টা শতক আছে। ৱেষ্ট ইণ্ডিজৰ বিৰুদ্ধে কোহলীয়ে সকলো ফৰ্মেটতে ১৩টা শতক অৰ্জন কৰিছে। তেওঁ সুনীল গাভাস্কাৰৰ সৈতে যৌথভাৱে শীৰ্ষত আছে।
কেৰিয়াৰত শ্ৰেষ্ঠ ষ্ট্ৰাইক ৰেট
এদিনীয়া ক্ৰিকেটত কোহলীয়ে ৯৪ ষ্ট্ৰাইক ৰেটেৰে ৰাণ সংগ্ৰহ কৰিছে। এয়া তেওঁৰ কেৰিয়াৰৰ সৰ্বাধিক ষ্ট্ৰাইক ৰেট। তিৰুৱনন্তপুৰমত ৱেষ্ট ইণ্ডিজৰ বিৰুদ্ধে কোহলীয়ে ৯টা ছয় কোবায়। এদিনীয়া ক্ৰিকেটত মহেন্দ্ৰ সিং ধোনীৰ পিছতে তেওঁ দ্বিতীয় সৰ্বাধিক ছয় ৰাণ সংগ্ৰহ কৰিছে। শ্ৰীলংকাৰ বিৰুদ্ধে তেওঁ ১০টা ছয় কোবাইছিল।
