বৰপেটাত (Barpeta) বিএছএফৰ বাছ দুৰ্ঘটনাগ্ৰস্ত (BSF bus accident)। ২৭ নং ৰাষ্ট্ৰীয় ঘাইপথত বিএছএফ জোৱান লৈ গৈ থকা বাছখনে এখন ট্ৰাকৰ সৈতে মুখামুখি সংঘৰ্ষত লিপ্ত হয়। দুৰ্ঘটনাটোত ৩২ জন বিএছএফৰ জোৱান আহত হয়। ইয়াৰে ১৪ জনৰ অৱস্থা সংকটজনক।
আৰক্ষীৰ সূত্ৰ অনুসৰি, ২৭নং ৰাষ্ট্ৰীয় ঘাইপথত ধুবুৰী অভিমুখে গৈ থকা বিএছএফৰ বাছখনে বৰপেটাৰ হাউলীৰ সমীপত বিপৰীত দিশৰ পৰা অহা এখন ট্ৰাকৰ সৈতে মুখামুখি সংঘৰ্ষত লিপ্ত হয়। ইয়াৰ প্ৰভাৱ ইমানেই প্ৰবল আছিল যে বাছখনৰ সন্মুখভাগ আৰু ট্ৰাকখন চেপেটা হৈ যায়। বাছখনত থকা বিএছএফৰ জোৱান আহত হয়। স্থানীয় ৰাইজে তেওঁলোকক উদ্ধাৰৰ ব্যৱস্থা কৰি চিকিৎসালয়লৈ প্ৰেৰণ কৰে। আৰক্ষীয়েও সেই স্থানত উপস্থিত হৈ উদ্ধাৰ অভিযান আৰম্ভ কৰে।
জানিব পৰা মতে, আহত বিএছএফৰ জোৱানসকলক বৰপেটা মেডিকেল কলেজ হাস্পতালত ভৰ্তি কৰোৱা হৈছে। আৰক্ষী সূত্ৰৰ পৰা জানিব পৰা মতে, বিএছএফৰ জোৱানৰ বাছখনৰ চালক চামচুল হকৰ মৃত্যু হৈছে। তেওঁ গোৱালপাৰা জিলাৰ বাসিন্দা। আৰক্ষীয়ে জনোৱা মতে, কি কাৰণত দুৰ্ঘটনাটো সংঘটিত হ’ল তাৰ তদন্ত অব্যাহত আছে।
প্ৰত্যক্ষদৰ্শীয়ে জনোৱা মতে, তেওঁলোকে হঠাতে এটা প্ৰচণ্ড শব্দ শুনে। তাৰ পিছত বাছ আৰু ট্ৰাকৰ মাজত মুখামুখি সংঘৰ্ষ হোৱা দেখা পায়। বাছখনৰ ভিতৰত বিএছএফৰ জোৱানসকল আছিল। তেওঁলোকক উদ্ধাৰ কৰি চিকিৎসালয়লৈ প্ৰেৰণ কৰে।
