মুকেশ আম্বানীৰ (Mukesh Ambani) ‘ৰিলায়েন্স ইণ্ডাষ্ট্ৰীজ লিমিটেডে’ (Reliance Industries Limited) বিজেপিৰ প্ৰচাৰ অভিযানত কেনেদৰে সহায় কৰিছে সেই সন্দৰ্ভত ‘তথ্য’ দিছে আমেৰিকাৰ কোটিপতি ইলন মাস্কে (Elon Musk)। তেওঁ ৰিলায়েন্স আৰু বিজেপিৰ মাজত ‘সংযোগ’ সম্পৰ্কে ছ’চিয়েল মিডিয়াত প্ৰকাশ পোৱা দুটা বাতৰিৰ স্ক্ৰীণশ্বট শ্বেয়াৰ কৰে। ইয়াৰ পূৰ্বে তেওঁ ‘প্ৰিয় প্ৰধানমন্ত্ৰী আম্বানী’ক উদ্দেশ্যি মুকলি পত্ৰও লিখিছিল।
শনিবাৰে পুৱা মাস্কে পশ্চিম এছিয়াৰ সংবাদ মাধ্যম আল জাজিৰা আৰু ভাৰতীয় কাকত ইণ্ডিয়ান এক্সপ্ৰেছত প্ৰকাশিত দুটা বাতৰিৰ স্ক্ৰীণশ্বট শ্বেয়াৰ কৰে। ২০২২ চনত আল জাজিৰাই প্ৰকাশ কৰা প্ৰতিবেদনখনৰ শিৰোনাম আছিল, ‘ৰিলায়েন্সৰ পুঁজিৰে চলি থকা কোম্পানী এটাই ফেচবুকত বিজেপিৰ নিৰ্বাচনী প্ৰচাৰ বিয়পোৱাত কেনেদৰে সহায় কৰে’। আনহাতে, ইণ্ডিয়ান এক্সপ্ৰেছৰ ২০২৪ চনৰ প্ৰতিবেদনত ৰিলায়েন্স ‘কুইক ছাপ্লাই’ৰ সৈতে জড়িত এটা কোম্পানীয়ে নিৰ্বাচনী বণ্ডৰ জৰিয়তে বিজেপিক ৩৮৫ কোটিতকৈ অধিক টকাৰ ৰাজনৈতিক অনুদান আগবঢ়াইছিল।
উল্লেখ্য যে মাস্কে বৃহস্পতিবাৰে ছ’চিয়েল মিডিয়াত অভিযোগ কৰিছিল যে ভাৰতীয় একাংশ প্ৰভাৱশালী উদ্যোগপতি তেওঁৰ কোম্পানী ষ্টাৰলিংকক উপগ্ৰহ ভিত্তিক ইণ্টাৰনেট সেৱাৰ জৰিয়তে ভাৰতত প্ৰৱেশ কৰাত ‘বাধা’ দি আছে। তেওঁ লিখিছে, “আম্বানী ভাৰতৰ প্ৰকৃত মালিক নেকি?” শুকুৰবাৰে নিশা এখন মুকলি পত্ৰত মাস্কে লিখিছে, “প্ৰিয় প্ৰধানমন্ত্ৰী আম্বানী, আপুনি যে ভাৰতৰ প্ৰকৃত মালিক সেই কথা বুজি নোপোৱাৰ বাবে মোৰ বিনম্ৰ ক্ষমা প্ৰাৰ্থনা গ্ৰহণ কৰক। স্বাভাৱিকতে আপুনি ভাৰতৰ মহান জনসাধাৰণক শোষণ কৰি যাব বিচাৰে, কিন্তু তথাপিও আপুনি ষ্টাৰলিংকক প্ৰতিযোগিতাত অৱতীৰ্ণ হ’বলৈ অনুমতি দিয়াৰ কথা চিন্তা কৰিবনে?”
ইয়াৰ পিছত মাস্কে মন্তব্য কৰে, “ভাৰততো এনে বহু অঞ্চল আছে, যেনে সকলো দেশৰ দৰে য’ত ইণ্টাৰনেট সেৱা নাই, যাৰ ফলত শিশুসকলে শিক্ষা লাভৰ সুযোগ আৰু ক্ষুদ্ৰ ব্যৱসায়ীসকলে নিজৰ সামগ্ৰীসমূহ বিশ্বৰ বজাৰত বিক্ৰী কৰাৰ সুযোগৰ পৰা বঞ্চিত হৈছে। ষ্টাৰ্লিংকে তেওঁলোকৰ জীৱন ইতিবাচকভাৱে পৰিৱৰ্তন কৰি দিব।” দৰাচলতে মাস্কৰ কোম্পানী ষ্টাৰলিংকৰ ছেটেলাইট ভিত্তিক ইণ্টাৰনেট সেৱাই কেইবা বছৰ ধৰি ভাৰতত ব্যৱসায় কৰিবলৈ চেষ্টা কৰি আহিছে যদিও সেয়া এতিয়াও সম্ভৱ হোৱা নাই।
শেহতীয়াকৈ প্ৰকাশিত বাতৰি অনুসৰি, যদিও ষ্টাৰলিংককে ধৰি তিনিটা কোম্পানীয়ে প্ৰাৰম্ভিক অনুজ্ঞাপত্ৰ লাভ কৰিছে, সেৱা আৰম্ভ হোৱাৰ আগতেই নিৰাপত্তা অনুমোদন আৰু স্পেকট্ৰাম আবণ্টনৰ দৰে বিষয়সমূহ বাকী আছে। মাস্কে অভিযোগ কৰিছে যে একাংশ ‘অলিগাৰ্চ’ বা প্ৰভাৱশালী ব্যৱসায়ীয়ে ভাৰতীয় বজাৰত ষ্টাৰলিংকৰ প্ৰৱেশত বাধাৰ সৃষ্টি কৰিছে। তাৎপৰ্যপূৰ্ণভাৱে বৃহস্পতিবাৰে ৰাহুল গান্ধীয়ে মাস্কৰ পোষ্টটো শ্বেয়াৰ কৰি লিখিছে, “ভাৰতলৈ আপোনাক স্বাগতম ইলন। আন কোনোবা আৱিষ্কাৰ নোহোৱালৈকে অপেক্ষা কৰক।”
