জ্ঞানেশ কুমাৰক অপসাৰণৰ দাবীত (Demand for Gyanesh Kumar’s removal) বিৰোধী মিত্ৰজোঁট ‘ইণ্ডিয়া’ই কেন্দ্ৰৰ ওপৰত হেঁচা বৃদ্ধিৰ চেষ্টা চলাইছে। এইবাৰ ‘ইণ্ডিয়া’ৰ বৈঠকত কেন্দ্ৰৰ ওপৰত হেঁচা বৃদ্ধিৰ বাবে পৰৱৰ্তী কৌশলৰ সিদ্ধান্ত লোৱা হৈছে। মঙলবাৰে বিয়লি লোকসভাৰ বিৰোধী দলপতি ৰাহুল গান্ধীয়ে (Rahul Gandh) ‘ইণ্ডিয়া’ৰ সাংসদসকলক চাহমেলৰ বাবে আমন্ত্ৰণ জনাইছে। তাত বিভিন্ন ছাত্ৰ সংগঠন আৰু নাগৰিক সমাজৰ প্ৰতিনিধিকো আমন্ত্ৰণ জনোৱা হৈছে। ৰাহুল গান্ধীৰ বাসগৃহৰ পৰা যৌথ সংবাদমেল অনুষ্ঠিত কৰাৰো কথা আছে। তাৰ পৰাই পৰৱৰ্তী পৰিকল্পনা ঘোষণা হ’ব পাৰে বুলি অনুমান কৰা হৈছে।
পিটিআইৰ সূত্ৰ অনুসৰি, মঙলবাৰে বিয়লি দিল্লীৰ ৫নং সুনেহৰীবাগ ৰোডৰ ৰাহুল গান্ধীৰ বাসগৃহত এই চাহমেলৰ আয়োজন কৰা হৈছে। তাৰ পূৰ্বে ‘ইণ্ডিয়া’ৰ নেতাসকলে যৌথ সংবাদমেল অনুষ্ঠিত কৰিব। ইতিমধ্যে চাহমেলৰ আমন্ত্ৰণী-পত্ৰ সংশ্লিষ্ট নেতা, ছাত্ৰ-ছাত্ৰী আৰু নাগৰিক সমাজৰ প্ৰতিনিধিলৈ প্ৰেৰণ কৰা হৈছে। পিটিআইৰ তথ্য অনুসৰি, সোমবাৰে প্ৰেৰণ কৰা আমন্ত্ৰণ-পত্ৰত ৰাহুল গান্ধীয়ে লিখিছে, “‘গণতন্ত্ৰৰ সুৰক্ষাৰ বাবে মাৰ্চ’ আৰু আজি গোচৰ ৰুজু হোৱাৰ পিছত কাইলৈ বিয়লি ‘ইণ্ডিয়া’ৰ নেতাসকলৰ যৌথ সংবাদমেল আৰু চাহমেলৰ আয়োজন কৰা হ’ব। মই আপোনালোকক মঙলবাৰে (১৩ অক্টোবৰ) বিয়লি ৪ বজাত নতুন দিল্লীৰ সুনেহৰীবাগ ৰোডত মোৰ বাসগৃহলৈ আহিবলৈ আমন্ত্ৰণ জনাইছোঁ।”
উল্লেখ্য যে জ্ঞানেশ কুমাৰৰ পদত্যাগৰ দাবীত ককৰোচ জনতা পাৰ্টীৰ আন্দোলন অব্যাহত আছে। কংগ্ৰেছ নেতৃত্বাধীন ‘ইণ্ডিয়া’ৰো সমান্তৰাল প্ৰতিবাদ চলি আছে। ইতিমধ্যে ৰাহুল গান্ধীৰ সমৰ্থকসকলে ৰাষ্ট্ৰপতি দ্ৰৌপদী মুৰ্মুক সাক্ষাৎ কৰিছে। তেওঁৰ লগতে অন্যান্য বিৰোধী নেতাই সোমবাৰে সমদল উলিয়াই উচ্চতম ন্যায়ালয়ত এছআইআৰত অনিয়মৰ অভিযোগ উত্থাপন কৰে। চিজেপিৰ আন্দোলনৰ অন্যতম মুখ তথা আইছাৰ সৰ্বভাৰতীয় সভাপতি নেহা বোৰায়ো এই সমদলত যোগদান কৰে।
মঙলবাৰে উচ্চতম ন্যায়ালয়ত শুনানিৰ বাবে আহিব পাৰে ৰাহুল গান্ধীৰ গোচৰ। এই একেটা দিনতে ৰাহুল গান্ধীয়ে বিৰোধী সাংসদ, ছাত্ৰ নেতা আৰু নাগৰিক সমাজক চাহমেললৈ আমন্ত্ৰণ জনায়। অৱশ্যে এই চাহমেলত কোন বিশেষভাৱে উপস্থিত থাকিব সেয়া এতিয়াও স্পষ্ট হোৱা নাই। অৱশ্যে জ্ঞানেশ বিৰোধী আন্দোলনৰ পৰৱৰ্তী ৰূপৰেখা এই চাহমেলৰ পৰাই স্থিৰ হ’ব পাৰে বুলি বহুতে জল্পনা-কল্পনা কৰিছে।
