ককৰোচ জনতা পাৰ্টীৰ (CJP) আহ্বায়ক অভিজীত দীপকেয়ে (Abhijit Deepke) শুকুৰবাৰে দিল্লীত এক নতুন প্ৰতিবাদী কাৰ্যসূচীৰ (New protest plan) আহ্বান জনাইছে। তেওঁ যুৱ প্ৰজন্মক জাতীয় পতাকা হাতত লৈ ‘লেহৰা দো তিৰঙ্গা’ বা ‘ত্ৰিৰংগ উৰাওক’ অভিযানত যোগদান কৰিবলৈ আহ্বান জনায়। ইয়াৰ সমান্তৰালকৈ তেওঁ সাধাৰণ ৰাইজ আৰু বিৰোধী ৰাজনৈতিক দলসমূহৰ কৰ্মী আৰু সমৰ্থকসকলকো এক বাৰ্তা প্ৰদান কৰে। চিজেপিৰ এই প্ৰতিবাদী কাৰ্যসূচী দলৰ আন দুজন নেতা সৌৰভ দাস আৰু আশুতোষ ৰাংকাক গ্ৰেপ্তাৰ কৰাৰ প্ৰতিবাদত আহ্বান জনোৱা হৈছে। শুকুৰবাৰে অৰ্থাৎ ১৬ অক্টোবৰত দিল্লীৰ কন’ট প্লেচত ‘ত্ৰিৰংগ উৰাওক’ অভিযানৰ নেতৃত্ব দিব দীপকেয়ে। সন্ধিয়া ৫ বজাত অনুষ্ঠিত হ’ব এই সমাৱেশ। সেইদিনা চিজেপিৰ প্ৰতিষ্ঠাপকগৰাকীয়ে সাধাৰণ ৰাইজক কন’ট প্লেচত দলবদ্ধভাৱে গোট খাই ৰাষ্ট্ৰীয় পতাকা উত্তোলন কৰিবলৈ আহ্বান জনাইছে।
শেহতীয়াকৈ কেন্দ্ৰীয় গৃহ মন্ত্ৰালয়ে নিৰ্দিষ্ট প্ৰতিবাদস্থলীৰ তালিকাৰ পৰা দিল্লীৰ যন্তৰ-মন্তৰক আঁতৰাই পেলাইছে। এতিয়া যন্তৰ-মন্তৰত সমাৱেশ বা যিকোনো ধৰণৰ প্ৰতিবাদী কাৰ্যসূচী নিষিদ্ধ। সেই নিৰ্দেশৰ পিছতো মঙলবাৰে সৌৰভ আৰু ৰাংকাৰ নেতৃত্বত চিজেপিৰ দুজনমান সদস্যই লোহাৰ গে’টত উঠি ৰাষ্ট্ৰীয় পতাকা উৰুৱাই ‘ভাৰত মাতা কি জয়’ শ্লোগান দি যন্তৰ-মন্তৰত প্ৰৱেশ কৰে। প্ৰথমে আৰক্ষীয়ে তেওঁলোকক আটক কৰে। পিছত দুয়োকে গ্ৰেপ্তাৰ কৰা হয়। আদালতে তেওঁলোকক পাঁচ দিনৰ বাবে ন্যায়িক জিম্মাত ৰখাৰ নিৰ্দেশ দিছে।
বৰ্তমান ৰাংকা আৰু সৌৰভৰ ঠিকনা তিহাৰ জে’ল। দীপকেয়ে কয় যে ৰাষ্ট্ৰীয় পতাকা উৰুওৱাটো কোনো অপৰাধ নহয়। ইয়াৰ বাবে কাকো জে’ললৈ পঠিয়াব নোৱাৰি। সতীৰ্থক গ্ৰেপ্তাৰ কৰাৰ প্ৰতিবাদত তেওঁ ‘ত্ৰিৰংগ উৰাওক’ অভিযানৰ আহ্বান জনায়।
এক ভিডিঅ’ বাৰ্তাত দীপকেয়ে কয়, “আপোনালোক সকলোৱে জানে যে সৌৰভ আৰু আশুতোষক কেৱল দেশৰ জাতীয় পতাকা উৰুওৱাৰ বাবে জে’ললৈ পঠিওৱা হৈছে। দেশ আৰু জাতীয় পতাকাক ভালপোৱা সকলো দেশপ্ৰেমিকলৈ মোৰ অনুৰোধ, ১৬ অক্টোবৰৰ সন্ধিয়া ৫ বজাত কন’ট প্লেচৰ চেণ্ট্ৰেল পাৰ্কলৈ আহক। তাত আমি জাতীয় পতাকা উত্তোলন কৰিম।
মই ক’ম, ই কোনো অপৰাধ নহয়। যিসকলে আহিব নোৱাৰে, তেওঁলোকে সন্ধিয়া নিজ নিজ চহৰত ত্ৰিৰংগ অভিযান কৰক। এই একনায়কত্ববাদীসকলক দেখুৱাই দিয়ক যে ত্ৰিৰংগ আমাৰ গৌৰৱ। ইয়াক উৰুওৱাটো অপৰাধ হ’ব নোৱাৰে।” দীপকেয়ে লগতে জনায় যে ইয়াৰ পিছত তেওঁকো গ্ৰেপ্তাৰ কৰা হ’ব পাৰে। তেওঁ কয়, “হয়তো ইয়াৰ পিছত মোকো গ্ৰেপ্তাৰ কৰিব পাৰে। মই এই বিষয়ে নাভাবোঁ। জাতীয় পতাকা মোৰ গৌৰৱ। মই উৰুৱামেই।”
