গুৱাহাটীৰ হোটেল-কাণ্ডৰ অন্যতম অভিযুক্ত আৰক্ষীৰ গুলীত মৃত্যু গুৱাহাটী হোটেল কাণ্ডৰ অভিযুক্ত ঘনকান্তক আৰক্ষীৰ এনকাউণ্টাৰ। বৰা চাৰ্ভিছৰ হোটেল বিলাস ইনত পাঁচজন লোকক গুলীয়াই হত্যা কৰা ঘনকান্ত গগৈৰ আৰক্ষীৰ গুলীত মৃত্যু৷ শিৱসাগৰৰ ফুলপানীচিগাত আৰক্ষীৰ গুলীত গুৰুতৰভাৱে আহত হোৱা ঘনকান্ত গগৈক চিকিৎসালয়লৈ নিয়াৰ পথত মৃত্যু হয়৷
জানিব পৰা মতে, গুৱাহাটী কেন্দ্ৰীয় কাৰাগাৰৰ পৰা আন এক গোচৰত ঘনকান্ত গগৈক শিৱসাগৰ থানালৈ নিয়াৰ পথত আৰক্ষী উপ-পৰিদৰ্শক দেৱাশীষ শৰ্মাৰ পিষ্টল কাঢ়ি লৈ গুলীচালনা কৰাৰ লগতে পলায়নৰ চেষ্টা চলোৱাৰ অভিযোগ। আৰক্ষীয়েও ইয়াৰ প্ৰত্যুত্তৰ দিয়াত গুলীবিদ্ধ হয় ঘনকান্ত। আহত অৱস্থাত তেওঁক চিকিৎসালয়লৈ নিয়া হয় যদিও চিকিৎসকে তেওঁক মৃত ঘোষণা কৰে৷
উল্লেখযোগ্য যে যোৱা ২৬ অক্টোবৰত হোটেল বিলাস ইনত ঘনকান্তই সংঘটিত কৰিছিল গুলীচালনাৰ ঘটনা। এই ঘটনাত হোটেলখনৰ মালিক পক্ষৰ চাৰিজন লোককে ধৰি মুঠ পাঁচজন লোকৰ মৃত্যু হৈছিল। এই ঘটনাৰ প্ৰায় এক ঘণ্টা পিছতে আৰক্ষীয়ে ঘনকান্তক আটক কৰে৷ পিছদিনা অভিযুক্ত ঘনকান্ত গগৈক পল্টনবজাৰ থানাত সোধা-পোছা কৰি সন্ধিয়া গুৱাহাটীৰ চিজেএম আদালতত হাজিৰ কৰায়। ইয়াৰ পিছত আদালতে ঘনকান্তক ৭ দিনৰ আৰক্ষী জিম্মালৈ প্ৰেৰণ কৰে।
আনহাতে, মঙলবাৰে ঘনকান্তৰ আৰক্ষীৰ জিম্মাৰ ম্যাদ শেষ হোৱাত পুনৰ আদালতত হাজিৰ কৰোৱা হয় আৰু আদালতে তেওঁক ১৪ দিনৰ ন্যায়িক জিম্মালৈ প্ৰেৰণ কৰে।
