পুনৰ অস্থিৰ হৈ পৰিছে মণিপুৰ (Manipur Incident) । শুকুৰবাৰে ৰাজ্যখনৰ এটা গুৰুত্বপূৰ্ণ ৰাষ্ট্ৰীয় ঘাইপথত কেইবাখনো বাহনত গুলীচালনা কৰে সশস্ত্ৰ সন্ত্ৰাসবাদীয়ে। এই আক্ৰমণত চাৰিজন সাধাৰণ নাগৰিকৰ মৃত্যু হোৱাৰ খবৰ পোৱা গৈছে। এই ঘটনাত উপত্যকাটোৰ নিৰাপত্তা পৰিস্থিতিক লৈ সতেজ উদ্বেগ প্ৰকাশ পাইছে।
আৰক্ষীৰ সূত্ৰ অনুসৰি, শুকুৰবাৰে দিনটোতে মণিপুৰৰ উখৰুল জিলাৰ ৰাষ্ট্ৰীয় ঘাইপথত সংঘটিত হয় এই ঘটনা। দুখন গাড়ীৰে গন্তব্যস্থানৰ দিশে গৈ আছিল যাত্ৰীসকল। সেই সময়ত হঠাৎ উগ্ৰপন্থীয়ে নিৰ্বিচাৰে গাড়ীখনলৈ গুলীচালনা আৰম্ভ কৰে। ফলত থিতাতে ৪ জন লোকৰ মৃত্যু হয়। প্ৰাথমিক খবৰ অনুসৰি, মৃতসকলৰ ভিতৰত এগৰাকী মাতৃ আৰু তেওঁৰ পুত্ৰও আছে। এই কৰুণ ঘটনাই অঞ্চলটোত শোকৰ ছাঁ পেলাইছে।
উল্লেখ্য যে বিগত কিছুদিন ধৰি মণিপুৰৰ বিভিন্ন প্ৰান্তত পুনৰ উত্থাপিত হৈছে সাম্প্ৰদায়িক হিংসা আৰু আক্ৰমণৰ কাৰ্য। যদিও সাধাৰণ জনতাৰ নিৰাপত্তা আৰু শান্তি বজাই ৰখাৰ বাবে প্ৰশাসনে কঠোৰ পদক্ষেপ গ্ৰহণ কৰিছে, তথাপিও দুষ্কৃতিকাৰীৰ হিংসা বন্ধ হোৱা নাই। এইবাৰ ৰাষ্ট্ৰীয় ঘাইপথৰ দৰে গুৰুত্বপূৰ্ণ পথত এনেধৰণৰ সশস্ত্ৰ আক্ৰমণে সাধাৰণ ৰাইজৰ যাতায়াত আৰু নিৰাপত্তা বিপন্ন কৰিছে।
ঘটনাৰ খবৰ পোৱাৰ পিছতে এটা বৃহৎ আৰক্ষী বাহিনী আৰু অসম ৰাইফলছৰ জোৱান ঘটনাস্থলীত উপস্থিত হৈ সমগ্ৰ অঞ্চলটো ঘেৰাও কৰে। সন্ত্রাসবাদীৰ সন্ধানত চাৰিওফালৰ বনাঞ্চল আৰু পাহাৰীয়া অঞ্চলত যুটীয়া অনুসন্ধান আৰম্ভ কৰা হয়৷ তদন্তকাৰীয়ে এই আক্ৰমণৰ আঁৰত কোন আছে আৰু কোনটো সংগঠন ইয়াৰ লগত জড়িত তাৰ তদন্ত কৰি আছে।
