
মহাৰাষ্ট্ৰত ইণ্ডিগোৰ (Indigo) এগৰাকী কৰ্মচাৰীৰ মৃত্যু ৰহস্যৰ আবৰ্তত সোমাই পৰিছে। ৩৫ বছৰীয়া বৰষা ঠাকুৰে পুনে বিমানবন্দৰৰ ইণ্ডিগো টিকট কাউণ্টাৰত কৰ্মৰত আছিল। শনিবাৰে গণ্ডিয়া জিলাৰ বান্দ্ৰাণী বনাঞ্চলত তেওঁৰ মৃতদেহ ৰক্তাক্ত অৱস্থাত উদ্ধাৰ হয়। চিকিৎসালয়লৈ নিয়াৰ সময়ত তেওঁক চিকিৎসকে মৃত বুলি ঘোষণা কৰে। পৰিয়ালৰ সূত্ৰৰ পৰা জানিব পৰা মতে, বৰ্ষা দীপাৱলীৰ ছুটীত নিজৰ ঘৰলৈ আহিছিল। তেওঁৰ ডেৰ-দুবছৰীয়া ল’ৰা এটাও আছে। শনিবাৰে বৰ্ষাৰ লগত এজন যুৱকো আছিল। আৰক্ষীয়ে তেওঁক আটক কৰি জেৰা অব্যাহত ৰাখিছে।

বৰ্ষাৰ পিতৃৰ ঘৰ মধ্যপ্ৰদেশৰ বালাঘাট জিলাত। ই মহাৰাষ্ট্ৰ সীমান্তৰ লগত সংলগ্ন। আৰক্ষী সূত্ৰৰ পৰা জানিব পৰা মতে, শনিবাৰে বিয়লি প্ৰায় ৪ বজাত ঘৰৰ পৰা ওলাই আহিছিল যুৱতীগৰাকী। নিতেশ আগৰৱালা নামৰ বন্ধু এজনৰ লগত তেওঁ নদীৰ কাষলৈ ফুৰিবলৈ গৈছিল। কেইঘণ্টামান পিছত নিতেশে তেওঁৰ ঘৰলৈ ফোন কৰি কয় যে তেওঁলোকক ডকাইতে আক্ৰমণ কৰিছে, বৰ্ষা আহত হৈছে । বৰ্ষাৰ পৰিয়ালৰ লোকে দুয়োখন ৰাজ্যৰ সীমান্তৱৰ্তী অঞ্চলৰ বনাঞ্চলত উপস্থিত হয়। তেওঁক উদ্ধাৰ কৰি চিকিৎসালয়লৈ লৈ যোৱা হয়। কিন্তু তেওঁক ৰক্ষা কৰিব পৰা নগ’ল। প্ৰথমতে তেওঁক চোকা অস্ত্ৰৰে আক্ৰমণ কৰা বুলি ধাৰণা কৰা হৈছে।
নিতেশে আৰক্ষীক জনায় যে কিছুমান মুখা পিন্ধা লোকে হাবিলৈ আহি তেওঁলোকৰ সকলো বস্তু লুটি লৈ যায়। ইয়াৰ পিছত তেওঁলোকে বৰ্ষাক আক্ৰমণ কৰে। এই বক্তব্যক লৈ তদন্তকাৰীয়ে সন্দেহ প্ৰকাশ কৰিছে। কাৰণ নিতেশৰ শৰীৰত কোনো আঘাতৰ চিন নাছিল। যদি ডকাইতৰ সৈতে সংঘৰ্ষ বা কাজিয়া হ’লহেঁতেন তেন্তে তেৱোঁ আহত হ’লহেঁতেন। ইয়াৰ পিছত আৰক্ষীয়ে নিতেশক গ্ৰেপ্তাৰ কৰি জেৰা আৰম্ভ কৰে। মৰণোত্তৰ পৰীক্ষাৰ প্ৰতিবেদনৰ বাবে তদন্তকাৰীয়ে অপেক্ষা কৰি আছে।









