কুলগামত চিআৰপিএফ শিবিৰত আক্ৰমণ কৰা সন্ত্ৰাসবাদী তিনিজনৰ সন্ধানত অভিযান তীব্ৰতৰ কৰি তোলা হৈছে। সন্ত্ৰাসবাদীয়ে কোন পথেৰে পলায়ন কৰিছিল সেই পথটো চিনাক্ত কৰি সেনাই তাত অনুসন্ধান অব্যাহত ৰাখিছে। তদন্তকাৰীয়ে ইতিমধ্যে ৫০০ লোকক সোধা-পোছা কৰিছে।
২০ জন সন্দেহযুক্ত লোকক গ্ৰেপ্তাৰ কৰা হৈছে। আৰক্ষীৰ সূত্ৰ অনুসৰি, গ্ৰেপ্তাৰ হোৱা লোকসকলে সন্ত্ৰাসবাদীক বিভিন্ন ধৰণে সহায় কৰাৰ সন্দেহ কৰা হৈছে। আক্ৰমণ সংঘটিত কৰাৰ পৰা আৰম্ভ কৰি আশ্ৰয় আৰু খাদ্য যোগান ধৰালৈকে ‘অভাৰগ্ৰাউণ্ড ৱৰ্কাৰছ’সকলে তেওঁলোকৰ বাবে ব্যৱস্থা কৰিছে।
সূত্ৰৰ পৰা জানিব পৰা মতে, একে ধৰণেৰে ২০ জন লোকক গ্ৰেপ্তাৰ কৰা হৈছে। উল্লেখ্য যে যোৱা ১১ নৱেম্বৰত দুপৰীয়া প্ৰায় ২.১৫ বজাত কুলগামৰ মিৰবজাৰৰ সমীপৰ আখৰাণত চিআৰপিএফ দলৰ ৪৬ নং বেটেলিয়নৰ নাকা দলত তিনিজন সন্ত্ৰাসবাদীয়ে আক্ৰমণ চলাইছিল।
এই আক্ৰমণত আহত হেড কনিষ্টবল সোমবীৰ সিং, কনিষ্টবল ৰাকেশ দাস আৰু কনিষ্টবল সন্তোষ চন্দ্ৰ। সোমবীৰৰ হাতত, ৰাকেশৰ ভৰিত আৰু সন্তোষৰ তলপেট আৰু মেৰুদণ্ডত গুলী লাগিছিল। তিনিওজনকে অনন্তনাগৰ এখন চিকিৎসালয়ত ভৰ্তি কৰোৱা হয়। পিছত সন্তোষক শ্ৰীনগৰৰ সেনা চিকিৎসালয়লৈ স্থানান্তৰ কৰা হয়।
প্ৰাথমিক তদন্তত সন্ত্ৰাসবাদীকেইজন বাইকেৰে আহিছিল বুলি জানিব পৰা গৈছে। অৱশ্যে চিচিটিভিৰ ফুটেজ পৰীক্ষা কৰাৰ পিছত পোহৰলৈ আহিছে যে সন্ত্ৰাসবাদীয়ে জংঘলৰ ভিতৰৰ পৰা খোজকাঢ়ি আহিছিল। গুলীচালনাৰ পিছত জংঘলৰ মাজেৰে উভতি পলায়ন কৰে। সন্ত্ৰাসবাদীয়ে ৩০ জাঁই গুলীচালনা কৰে। আক্ৰমণৰ পিছৰে পৰা কুলগাম আৰু ইয়াৰ কাষৰীয়া অঞ্চলত সন্ত্ৰাসবাদীক গ্ৰেপ্তাৰ কৰিবলৈ তালাচী অভিযান তীব্ৰতৰ কৰি তোলা হৈছে।
