মানহানিৰ গোচৰত ৰাহুল গান্ধী (Rahul Gandhi) দোষী সাব্যস্ত হোৱা আৰু লোকসভাৰ পৰা অযোগ্য ঘোষণাৰ ওপৰত আমেৰিকাই (America) চকু ৰাখিছে। এই কথা প্ৰকাশ কৰিছে দেশখনৰ চৰকাৰৰ এজন মুখপাত্ৰই। ৰাহুলৰ ঘটনাৰ কথা উল্লেখ কৰি আমেৰিকাৰ বক্তব্য, আইনৰ শাসন, ন্যায়পালিকাৰ স্বাধীনতা গণতন্ত্ৰৰ মূল ভেটি।
এই সন্দৰ্ভত মঙলবাৰে আমেৰিকাৰ বিদেশ মন্ত্ৰালয়ৰ মুখ্য উপ-মুখপাত্ৰ বেদান্ত পেটেলে মন্তব্য কৰে। ৰাহুল গান্ধীৰ ঘটনা সন্দৰ্ভত তেওঁ কয়, “ভাৰতীয় আদালতত ৰাহুল গান্ধীৰ গোচৰ আমাৰ দৃষ্টিগোচৰ হৈছে। দুয়োখন দেশেই গণতান্ত্ৰিক মূল্যবোধ, বিশেষকৈ মত প্ৰকাশৰ স্বাধীনতা ৰক্ষাৰ বাবে প্ৰতিশ্ৰুতিবদ্ধ। ভাৰতৰ ক্ষেত্ৰত আমি গণতন্ত্ৰ, মানৱ অধিকাৰ আৰু মত প্ৰকাশৰ স্বাধীনতাৰ গুৰুত্বৰ ওপৰত গুৰুত্ব দিওঁ। দুয়োখন দেশতে গণতন্ত্ৰ ৰক্ষা কৰাটো প্ৰয়োজনীয়।”
বেদান্তক সোধা হৈছিল, ৰাহুলৰ ঘটনাৰ ভিত্তিত আমেৰিকাই ভাৰতৰ আভ্যন্তৰীণ বিষয়ত হস্তক্ষেপ কৰিবলৈ চেষ্টা কৰিছে নেকি? ইয়াৰ উত্তৰত আমেৰিকাৰ মুখপাত্ৰগৰাকীয়ে কয়, “আমি কোনো নিৰ্দিষ্ট বিষয়ত পৃথকে পৃথকে হস্তক্ষেপ কৰাৰ কথা চিন্তা কৰা নাই। আমি বিশেষ ক্ষেত্ৰত যিকোনো দেশৰ বিৰোধী দলৰ হৈ কথা কওঁ। অস্বাভাৱিক একো নাই।”
উল্লেখ্য, শুকুৰবাৰে কংগ্ৰেছৰ প্ৰাক্তন সভাপতি ৰাহুল গান্ধীৰ সাংসদ পদ নাকচ কৰে লোকসভাৰ অধ্যক্ষ ওম বিৰলাই। তেওঁ কেৰালাৰ ওৱেনাড় সমষ্টিৰ পৰা সাংসদ সদস্য আছিল। গুজৰাটৰ চুৰাট জিলা আদালতে বৃহস্পতিবাৰে ৰাহুলক ‘মোডী’ উপাধিৰ ওপৰত আপত্তিজনক মন্তব্য কৰাৰ বাবে দোষী সাব্যস্ত কৰে। ২ বছৰৰ কাৰাদণ্ডৰ শাস্তি। পিছত জামিনত মুকলি কৰি দিয়া হয় প্ৰাক্তন কংগ্ৰেছ সভাপতিগৰাকীক। চুৰাট আদালতৰ ৰায়দানৰ ভিত্তিত ভাৰতীয় সংবিধানৰ ১০২(১) অনুচ্ছেদ আৰু জনপ্ৰতিনিধিত্ব আইন (১৯৫১)ৰ ৮ নং অনুচ্ছেদৰ অধীনত ৰাহুলক সাংসদ সদস্য হিচাপে অযোগ্য ঘোষণা কৰা হয়।
এই ঘটনাৰ আধাৰত বিৰোধীয়ে কেন্দ্ৰীয় চৰকাৰৰ বিৰুদ্ধে সংগঠিত হৈছে। কংগ্ৰেছে দাবী কৰিছে যে মোডী চৰকাৰে ৰাহুলক নীৰৱ কৰাৰ পৰিকল্পনা অনুসৰি এই কাম কৰিছে। সোমবাৰে ৰাহুলক চৰকাৰী বাসগৃহ খালী কৰাৰো জাননী জাৰি কৰা হয়। এই প্ৰসংগত এইবাৰ আমেৰিকাৰ পৰা প্ৰতিক্ৰিয়া আহে।
