স্বাধীনতা দিৱসৰ প্ৰাকক্ষণত পুনৰ উত্তপ্ত কাশ্মীৰ (Kashmir)। বুধবাৰে পুৱা জম্মু-কাশ্মীৰৰ ডোডাত (In Doda, Kashmir) সংঘটিত এনকাউণ্টাৰত এজন সেনা বিষয়া নিহত (Army officer killed) হয়। লগতে এজন সাধাৰণ নাগৰিকো গুৰুতৰভাৱে আহত হয়।
মঙলবাৰে সন্ধিয়া সেনাই সন্ত্ৰাসবাদীৰ গোপন শিবিৰৰ তথ্য লাভ কৰাৰ পিছত সেনাৰ এটা দলে চাৰিজন সন্ত্ৰাসবাদীৰ সন্ধানত ওলাই যায়। নিশাতেই দুয়োপক্ষৰ মাজত গুলীচালনা হয়। সাময়িক বিৰতিৰ পিছত বুধবাৰে পুৱাৰে পৰা পুনৰ আৰম্ভ হয় সংঘৰ্ষ। সেই সময়ত কেপ্টেইন পদবীৰ এজন সেনা বিষয়াক সন্ত্ৰাসবাদীয়ে গুলীয়াই হত্যা কৰে।
সংবাদ সংস্থা এ এন আইৰ মতে, মৃত কেপ্টেইনগৰাকী ভাৰতীয় সেনাৰ ৪৮ ৰাষ্ট্ৰীয় ৰাইফলছত কৰ্মৰত আছিল। এনকাউণ্টাৰ স্থানৰ পৰা নিৰাপত্তা বাহিনীয়ে এটা আমেৰিকান এম-৪ এছাল্ট ৰাইফল আৰু বিভিন্ন অস্ত্ৰ-শস্ত্ৰসহ তিনিটা বেগ উদ্ধাৰ কৰে। আনহাতে, চাৰিজন সন্ত্ৰাসবাদীৰ সন্ধানত এতিয়াও অভিযান চলি আছে ।
উল্লেখ্য যে জম্মু-কাশ্মীৰত বিগত কিছু বছৰ ধৰি সন্ত্ৰাসবাদীয়ে বিধ্বংসী ৰূপ ধাৰণ কৰি আহিছে। ২০২১ চনৰ পৰা অঞ্চলটোত সন্ত্ৰাসবাদী আক্ৰমণত ৫০ জনতকৈ অধিক জোৱান নিহত হৈছে। আনহাতে, বিগত কেইটামান সপ্তাহত পুনৰ সংঘটিত হৈছে এই আক্ৰমণ। শনিবাৰে অনন্তনাগত সন্ত্ৰাসবাদীৰ আক্ৰমণত ১৯ ৰাষ্ট্ৰীয় ৰাইফলছৰ দুজন জোৱান নিহত হয়। ইয়াৰ বাহিৰেও কঠুৱাৰ কুপৱাৰা, কিস্তিয়াৰত আক্ৰমণ সংঘটিত হৈছিল। ইয়াৰ পূৰ্বে জুলাই মাহত ডোডা জিলাৰ দেশা জংঘলত সন্ত্ৰাসবাদীয়ে চাৰিজন সেনা জোৱানক হত্যা কৰিছিল।
