অনানুষ্ঠানিকভাৱে বিজয় খাটাং যদিও আনুষ্ঠানিকভাৱে ৰাজ্যসভাৰ অসমৰ দুখন আসনৰ বাবে সোমবাৰে মনোনয়ন দাখিল কৰে অগপ আৰু বিজেপি মিত্ৰজোঁটৰ দুই প্ৰাৰ্থীয়ে (Rajyasabha Election)। উল্লেখ্য যে বিৰোধী দলে কোনো প্ৰাৰ্থী প্ৰক্ষেপ নকৰাৰ বাবে বিজেপি মিত্ৰজোঁটৰ প্ৰাৰ্থী বিনা প্ৰতিদ্বন্দ্বিতাৰে জয়ী হোৱাটো প্ৰায় নিশ্চিত হৈছে।
ৰাজ্যসভাৰ আসন দুখনৰ বাবে সোমবাৰে মনোনয়ন দাখিল কৰে বিজেপিৰ কণাড পুৰকায়স্থ আৰু অসম গণ পৰিষদৰ বীৰেন্দ্ৰ প্ৰসাদ বৈশ্যই৷
ৰাজ্যসভাৰ এই দুখন আসনৰ বাবে অহা ১৯ জুনত অনুষ্ঠিত হ’ব নিৰ্বাচন।
আনহাতে, এই নিৰ্বাচনৰ বাবে মনোনয়ন দাখিলৰ সোমবাৰে আছিল অন্তিম দিন। দুয়োগৰাকী প্ৰাৰ্থীয়ে সোমবাৰে দুপৰীয়া ৰিটার্নিং বিষয়াৰ ওচৰত তেওঁলোকৰ মনোনয়ন-পত্র দাখিল কৰে।
উল্লেখ্য যে প্ৰাক্তন কেন্দ্ৰীয় মন্ত্ৰী, অসম বিজেপিৰ মহীৰূহ তথা বৰাক উপত্যকাৰ প্ৰবীণ বিজেপি নেতা কবীন্দ্ৰ পুৰকায়স্থৰ পুত্ৰ হৈছে কণাড পুৰকায়স্থ। তেওঁৰ মনোনয়ন দাখিলৰ সময়ত মুখ্যমন্ত্ৰী হিমন্ত বিশ্ব শৰ্মা, বিজেপিৰ ৰাজ্যিক সভাপতি দিলীপ শইকীয়া, অগপৰ সভাপতি অতুল বৰা, কেন্দ্ৰীয় মন্ত্ৰী সৰ্বানন্দ সোণোৱালৰ লগতে মন্ত্ৰীসভাৰ কেইবাগৰাকীও মন্ত্ৰী উপস্থিত থাকে।
আনহাতে, বৰ্তমানৰ ৰাজ্যসভাৰ সাংসদ তথা অগপৰ জ্যেষ্ঠ নেতা বীৰেন্দ্ৰ প্ৰসাদ বৈশ্যই মনোনয়ন দাখিলৰ সময়ত সংগ দিয়ে মন্ত্ৰী অতুল বৰা, কেশৱ মহন্তকে ধৰি জ্যেষ্ঠ অগপ নেতাসকলৰ উপৰি মুখ্যমন্ত্ৰী আৰু বিজেপিৰ ৰাজ্যিক সভাপতি দিলীপ শইকীয়া।
উল্লেখ্য যে অসমৰ দুই ৰাজ্যসভাৰ সাংসদ বিজেপিৰ মিছন ৰঞ্জন দাস আৰু অগপৰ বীৰেন্দ্ৰ প্ৰসাদ বৈশ্যৰ কাৰ্যকাল অহা ১৪ জুনত সমাপ্ত হ’ব। ফলত ভাৰতৰ নিৰ্বাচন আয়োগে আসন দুখনৰ বাবে নিৰ্বাচনৰ অধিসূচনা জাৰি কৰে। সেই অনুসৰি মনোনয়ন দাখিলৰ অন্তিম তাৰিখ আছিল ৯ জুন আৰু মনোনয়ন পৰীক্ষাৰ তাৰিখ ১০ জুন।
১৯ জুনৰ পুৱা ৯ বজাৰ পৰা সন্ধিয়া ৪ বজালৈ ভোটগ্ৰহণৰ তাৰিখ তথা সময়সীমা ঘোষণা কৰা হৈছে। কিন্তু তেওঁলোকৰ বিপৰীতে কোনো প্ৰতিদ্বন্দ্বী প্ৰাৰ্থী নথকা বাবে এতিয়া আৰু নিৰ্বাচনৰ প্ৰয়োজন নহ’ব৷
