আহমেদাবাদ বিমানবন্দৰৰ পৰা উৰণৰ কিছু মুহূৰ্তৰ পিছত কিয় দুৰ্ঘটনাগ্ৰস্ত হৈছিল এয়াৰ ইণ্ডিয়াৰ (Air India) বিমানখন? ইয়াৰ তদন্তৰ প্ৰাৰম্ভিক প্ৰতিবেদন অসামৰিক বিমান পৰিবহণ মন্ত্ৰালয়ত দাখিল কৰা হৈছে। এই কথা সংবাদ সংস্থা এ এন আয়ে প্ৰকাশ কৰিছে।
আহমেদাবাদৰ বিমান দুৰ্ঘটনা সন্দৰ্ভত তদন্ত কৰিছে বিমান দুৰ্ঘটনা তদন্ত ব্যুৰোৱে। এজন শীৰ্ষ চৰকাৰী বিষয়াৰ উদ্ধৃতি দি এ এন আয়ে কয় যে তদন্তৰ প্ৰাৰম্ভিক পৰ্যায়ত সংগ্ৰহ কৰা সকলো তথ্যৰ মূল্যায়ন আৰু তথ্যৰ ভিত্তিত এ এ আই বিয়ে এই প্ৰতিবেদন প্ৰস্তুত কৰিছে।
উক্ত প্ৰতিবেদন অসামৰিক বিমান পৰিবহণ মন্ত্ৰালয়ৰ ওচৰত দাখিল কৰা হৈছে। চলিত সপ্তাহৰ শেষৰ ফালে এই প্ৰতিবেদন ৰাজহুৱা হ’ব পাৰে।
যোৱা ১২ জুনত আহমেদাবাদ বিমানবন্দৰৰ পৰা লণ্ডন অভিমুখী এয়াৰ ইণ্ডিয়া ১৭১ বিমানখন উৰণৰ ৩২ ছেকেণ্ডৰ ভিতৰতে দুৰ্ঘটনাগ্ৰস্ত হয়।
এই দুৰ্ঘটনাত কেবিন ক্ৰু আৰু পাইলটকে ধৰি ২৪১ জন লোকৰ মৃত্যু হয়। মাত্ৰ এজন যাত্ৰীহে ৰক্ষা পৰে। য’ত বিমানখন দুৰ্ঘটনাগ্ৰস্ত হৈ বিস্ফোৰণ ঘটে তাতো বহু লোকৰ মৃত্যু হয়। দুৰ্ঘটনাৰ পিছত আহমেদাবাদ চিকিৎসালয় কৰ্তৃপক্ষই ডি এন এৰ নমুনা সংগ্ৰহ কৰি মৃতদেহ চিনাক্ত কৰে।
নমুনা মিলাই মৃতদেহ পৰিয়ালক গতাই দিয়ে। এই দুৰ্ঘটনাত গুজৰাটৰ প্ৰাক্তন মুখ্যমন্ত্ৰী বিজয় ৰূপানীৰো মৃত্যু হয়। কিয় দুৰ্ঘটনাগ্ৰস্ত হ’ল বিমানখন? এই প্ৰশ্নটো দুৰ্ঘটনাৰ পিছৰে পৰা বিভিন্ন মহলত উত্থাপন হৈ আহিছে।
যোৱা ১৩ জুনত দুৰ্ঘটনাস্থলীৰ পৰা বিমানখনৰ প্ৰথমটো ব্লেক বক্স উদ্ধাৰ কৰা হৈছিল। এই ব্লেক বক্সটোত বিমানখনৰ সকলো তথ্য সন্নিবিষ্ট কৰা হৈছে। ককপিটত পাইলটৰ কথা-বতৰাও ৰেকৰ্ড কৰা হয়। ১৬ জুনত দ্বিতীয়টো ব্লেক বক্স উদ্ধাৰ কৰা হৈছিল। এ এ আই বিয়ে ইয়াৰ পৰীক্ষা কৰি আছে।
