এদিনীয়া ভ্ৰমণসূচীৰে বৃহস্পতিবাৰে নিশা ডিব্ৰুগড়ত (Dibrugarh) উপস্থিত হোৱা কেন্দ্ৰীয় গৃহমন্ত্ৰী অমিত শ্বাহে (Amit Shah) শুকুৰবাৰে ডিব্ৰুগড়ত কেইবাটাও অভিলাষী প্ৰকল্পৰ আধাৰশিলা স্থাপনৰ (Foundation stone laying) লগতে শুভ উদ্বোধন কৰে।
মুঠ ১,৭১৫ কোটি টকা ব্যয়েৰে শুভ উদ্বোধন তথা আধাৰশিলা স্থাপন কৰা প্ৰকল্পসমূহৰ ভিতৰত অন্যতম হৈছে ডিব্ৰুগড়ক দ্বিতীয় ৰাজধানী হিচাপে গঢ়ি তুলিবলৈ নিৰ্মাণ কৰিবলগা অসম বিধানসভা চৌহদৰ ((Assam Legislative Assembly Boundary) আধাৰশিলা (Foundation stone) স্থাপন। ২৮৪ কোটি টকা ব্যয়সাপেক্ষে আধাৰশিলা স্থাপন কৰা অসম বিধানসভাৰ দ্বিতীয় চৌহদ আৰু বিধায়ক আৱাসৰ প্ৰকল্পটোত থাকিব এটা তিনিমহলীয়া বিধানসভা ভৱন, এটা নমহলীয়া বিধায়ক আৱাস, এটা ৮০০ আসনবিশিষ্ট প্ৰেক্ষাগৃহ আৰু নিৰাপত্তাৰক্ষীৰ বাবে বেৰেক।
ইয়াৰ উপৰি ২৩৮ কোটি ব্যয়সাপেক্ষে নিৰ্মাণ কৰা খনিকৰ ক্ৰীড়া প্ৰকল্পৰ প্ৰথম পৰ্যায়ৰ শুভ উদ্বোধন কৰাৰ লগতে ২০৯ কোটি টকা ব্যয়সাপেক্ষ নিৰ্মাণ কৰিবলগা দ্বিতীয় পৰ্যায়ৰ কামৰ আধাৰশিলা স্থাপন কৰে গৃহমন্ত্ৰীয়ে।
আনহাতে, ২৯২ কোটি টকাৰ এটা বন্যপ্ৰাণী স্বাস্থ্য আৰু গৱেষণা কেন্দ্ৰৰো আধাৰশিলা স্থাপন কৰে অমিত শ্বাহে। আন এটা অভিলাষী প্ৰকল্প ৬৯২ কোটি টকা ব্যয়সাপেক্ষে জলাহভূমিৰ পুনৰুদ্ধাৰ আৰু পুনৰুজ্জীৱিতকৰণ প্ৰকল্পৰো শুভ উদ্বোধন কৰে কেন্দ্ৰীয় গৃহমন্ত্ৰী অমিত শ্বাহে।
ডিব্ৰুগড়ত এই কাৰ্যসূচী সামৰি ধেমাজিলৈ যায় অমিত শ্বাহ। ধেমাজিত মিচিং যুৱ মহোৎসৱত অংশগ্ৰহণৰ পিছত সন্ধিয়া গুৱাহাটীত উপস্থিত হ’ব কেন্দ্ৰীয় গৃহমন্ত্ৰীগৰাকী। গুৱাহাটীস্থিত ৰাজ্যিক বিজেপিৰ কাৰ্যালয়ত দলীয় কৰ্মকৰ্তাৰ সৈতে এক বৈঠকত মিলিত হ’ব কেন্দ্ৰীয় গৃহমন্ত্ৰী অমিত শ্বাহ।
