ৰাজ্যৰ বান (Assam Flood) পৰিস্থিতি লাহে উন্নত হ’বলৈ ধৰিছে যদিও মৃত্যুৰ সংখ্যাও ক্ৰমাৎ বৃদ্ধি পাই আছে। বৰ্তমান বানত মৃত্যুৰ সংখ্যা (Number of deaths) ৯৮ জনলৈ বৃদ্ধি (Increase to 98 people) পাইছে। শেহতীয়া বানত অসমৰ ১৩ খন জিলাৰ ডেৰ লাখৰো অধিক লোক ক্ষতিগ্ৰস্ত হৈছে৷ অসম ৰাজ্যিক দুৰ্যোগ ব্যৱস্থাপনা প্ৰাধিকৰণে প্ৰকাশ কৰা দৈনিক বান তথ্য অনুসৰি, চৰাইদেউ জিলাৰ মাহমৰাত শুকুৰবাৰে এজন লোকৰ মৃতদেহ উদ্ধাৰ হৈছে৷
ইফালে শিৱসাগৰ, গোলাঘাট, নগাঁও, হোজাই, শোণিতপুৰ, ধেমাজি, দৰং, বিশ্বনাথ, কামৰূপ (মেট্ৰ’), লখিমপুৰ, ওদালগুৰি, যোৰহাট আৰু চৰাইদেউ জিলা বৰ্তমানো বানৰ কৱলত আছে। এই জিলাকেইখনৰ ৩৩টা ৰাজহ চক্ৰ আৰু ৪৬৪ খন গাঁও বানাক্ৰান্ত হৈ আছে৷ আনহাতে, চলিত বানত ১,৫৫,৮৪৯ জন লোক ক্ষতিগ্ৰস্ত হৈছে।
আনহাতে, ১০,৭৪৮.৬৪ হেক্টৰ শস্যভূমি বানত বুৰ গৈছে। জিলা হিচাপত গোলাঘাটত সৰ্বাধিক ৫৮,৭৫০ জন লোক বানত ক্ষতিগ্ৰস্ত হৈছে।
ইয়াৰ পিছতে শিৱসাগৰত ৪৮,২৮৬ জন আৰু যোৰহাটত ২৫,২৫৯ জন লোক বানত আক্ৰান্ত হৈছে। এই পৰ্যন্ত প্ৰশাসনে স্থাপন কৰা ৫৫টা সাহায্য শিবিৰত ১০,৩২৬ গৰাকী লোকে আশ্ৰয় লৈ আছে আৰু ১৮টা কেন্দ্ৰৰ পৰা ৬,৮৮১ জন লোকক বান সাহায্য বিতৰণ কৰা হৈছে৷ ইয়াৰ উপৰি ৪,৭৮৭৯ টা পশুধন বানত ক্ষতিগ্ৰস্ত হৈছে।
