অসমৰ বান (Assam flood) পৰিস্থিতি লাহে লাহে উন্নতি ঘটিছে যদিও বহু ঠাইত এতিয়াও শোচনীয় হৈ আছে৷ দেওবাৰৰ দিনটোত আৰু দুজন লোকৰ বানত মৃত্যু হয়। ইয়াৰ লগে লগে ৰাজ্যৰ শেহতীয়া বানত মৃত্যুৰ সংখ্যা (Number of deaths) ১০০ জনলৈ বৃদ্ধি (Increase to 100 people) পাইছে৷
অসম ৰাজ্যিক দুৰ্যোগ ব্যৱস্থাপনা কৰ্তৃপক্ষৰ দেওবাৰৰ নিশাৰ তথ্য অনুসৰি, বিগত ২৪ ঘণ্টাত মৃত্যু হোৱা লোক দুজনৰ এজন গোলাঘাটৰ আৰু আনজন কাৰ্বি আংলং জিলাৰ৷ বৰ্তমান গোলাঘাট, শিৱসাগৰ, হোজাই, দৰং, লখিমপুৰ, যোৰহাট, কাৰ্বি আংলং, চৰাইদেউ, নগাঁও আৰু বিশ্বনাথ জিলাত মুঠ ১,৩৭,৫০০ৰো অধিক লোক বানত আক্ৰান্ত হৈছে৷
সৰ্বাধিক আক্ৰান্ত জিলাৰ ভিতৰত গোলাঘাটত প্ৰায় ৭০ হাজাৰ, শিৱসাগৰত প্ৰায় ৪০ হাজাৰ আৰু যোৰহাটত ১৬ হাজাৰৰো অধিক লোক বানৰ কৱলত৷ আনহাতে, ছয়খন জিলাত প্ৰশাসনে স্থাপন কৰা ১২৫টা সাহায্য আৰু আশ্ৰয় শিবিৰত ৪৯,০৬১ জন লোকে আশ্ৰয় লৈ আছে৷
আনহাতে, ৰাজ্যৰ ১০ খন জিলাৰ ২৮ টা ৰাজহ চক্ৰৰ ৪৫৬ খন গাঁও বানৰ কবলত পৰাৰ বিপৰীতে ১১,৯৩৩.৪৬ হেক্টৰ কৃষিভূমি নষ্ট হৈছে৷ ইয়াৰ উপৰি ৪৩,৩৩১টা পশুধন ক্ষতিগ্ৰস্ত হোৱাৰ লগতে বহু মথাউৰি, পথ, দলং তথা অন্যান্য আন্তঃগাঁথনিও ক্ষতিগ্ৰস্ত হৈছে৷
