১০৯ নং হাওৰাঘাট বিধানসভা সমষ্টিৰ অন্তৰ্গত ১০ নং হাওৰাঘাট বিজেপি মণ্ডল সমিতিৰ উদ্যোগত আজি এক গুৰুত্বপূৰ্ণ বুথ সন্মিলন সফলতাৰে অনুষ্ঠিত হৈ যায়। হাওৰাঘাট ক্ৰীড়া সন্থাৰ খেলপথাৰ প্ৰেক্ষাগৃহত দিনজোৰা বিস্তৃত কাৰ্যসূচীৰে আয়োজিত এই সন্মিলনত সভাপতিত্ব কৰে মণ্ডল সভাপতি পিন্টু দত্তই।
দলীয় সংগঠনক তৃণমূল পৰ্যায়ত অধিক শক্তিশালী কৰাৰ উদ্দেশ্যে এই সন্মিলনৰ আয়োজন কৰা হয়। আজিৰ এই বিশেষ অনুষ্ঠানত বিগত বিধানসভা নিৰ্বাচনত বিজেপি দলৰ সমৰ্থনত সৰ্বাধিক ভোট প্ৰদান কৰা তিনিটা বুথক ক্ৰমে প্ৰথম, দ্বিতীয় আৰু তৃতীয় স্থানৰ বাবে বিশেষ পুৰস্কাৰ প্ৰদান কৰা হয়।
স্থানীয় বিধায়ক লুনচিং টেৰণে নিজ হাতে এই পুৰস্কাৰসমূহ বিতৰণ কৰে। ইয়াৰ উপৰিও সাংগঠনিক কাম-কাজক উৎসাহিত কৰিবলৈ প্ৰতিটো বুথকে বিশেষ সন্মান হিচাপে আৰ্থিক অনুদান আগবঢ়োৱা হয়।
উক্ত সন্মিলনত ১০৯ নং হাওৰাঘাট বিধানসভা সমষ্টিৰ সমষ্টিৰ বিধায়ক লুনচিং টেৰণে মুখ্য অতিথি হিচাপে উপস্থিত থাকি দলীয় কৰ্মীসকলক উদ্দেশ্যি গুৰুত্বপূৰ্ণ ভাষণ প্ৰদান কৰে। তেওঁ চৰকাৰৰ উন্নয়নমূলক আঁচনিসমূহ জনসাধাৰণৰ ওচৰলৈ লৈ যাবলৈ আৰু দলৰ ভেটি মজবুত কৰিবলৈ কৰ্মীসকলক আহ্বান জনায়।
সভাত বিশিষ্ট অতিথি হিচাপে উপস্থিত থাকে কাৰ্বি আংলং স্বায়ত্তশাসিত পৰিষদৰ অধ্যক্ষ ৰিতেশ ইংহি, কাৰ্যবাহী সদস্য ৰাজু টিছু, প্ৰাক্তন কাৰ্যবাহী সদস্য ৰতন টেৰণ, প্ৰাক্তন সদস্য ৰামচিং টিমুং, প্ৰাক্তন কাৰ্যবাহী সদস্য খনচিং ৰংপি, বৰ্ডাৰ বৰ্ড চিয়াৰমেন উইলিংচন ফাংচু, বিজেপিৰ প্ৰক্তন জিলা উপ সভাপতি ভাস্কৰ সন্দিকৈ, হাওৰাঘাট পৌৰ সভাৰ অধ্যক্ষ বিদ্যা টেৰণ আৰু গাঁও উন্নয়ন সমিতিৰ অধ্যক্ষ দেউৰী লেকথে আদি। দলীয় কাৰ্যকৰ্তা আৰু শতাধিক ৰাইজৰ সক্ৰিয় উপস্থিতিয়ে সমগ্ৰ কাৰ্যসূচীটো সাফল্যমণ্ডিত কৰি তোলে।
