পুনেত (Pune) এগৰাকী স্বয়ম্ভূ বাবাৰ (Self-existent Baba) বিৰুদ্ধে ধৰ্ষণৰ অভিযোগ (Rape accusation)। আৰক্ষীয়ে তেওঁক গ্ৰেপ্তাৰ কৰিছে। অভিযোগ অনুসৰি, তেওঁ এগৰাকী মহিলাক কেইবাবছৰ ধৰি ধৰ্ষণ কৰি আছিল। লগতে তেওঁক ব্লেকমেইলিঙো কৰি আছিল। অৱশ্যে এই ঘটনাত মহিলাগৰাকী শেহতীয়াকৈ আৰক্ষীৰ কাষ চাপে। তেওঁৰ অভিযোগৰ ভিত্তিত গ্ৰেপ্তাৰ কৰা হৈছে বাবাজনক।
আৰক্ষীৰ সূত্ৰ অনুসৰি, লোকজনে নিজৰ আশ্ৰমখন ‘মডাৰ্ন গুৰুকুল’ (Modern Gurukul) বুলি দাবী কৰিছিল। তেওঁৰ অলৌকিক শক্তি আছে বুলিও তেওঁ দাবী কৰিছিল। আৰু সেই কৌশলেৰে ভণ্ড বাবাই এগৰাকী নাৰীক নিজৰ ফান্দত প্ৰলোভিত কৰে। অভিযোগ অনুসৰি, তেওঁ মহিলাগৰাকীক স্বামীৰ পৰা বিচ্ছিন্ন কৰিছিল। তেতিয়াৰে পৰাই তেওঁ মহিলাগৰাকীক ‘বন্দী’ কৰি নিজৰ লগত ৰাখিছিল।
২০১০ চনৰ পৰা ২০১৬ চনৰ ভিতৰত তেওঁ মহিলাগৰাকীক কেইবাবাৰো ধৰ্ষণ কৰাৰ অভিযোগ। এই ঘটনাৰ ভিডিঅ’ও ৰাখিছিল। ভিডিঅ’টো দেখুৱাই ব্লেকমেইল কৰিছিল আৰু পিছতো অত্যাচাৰ অব্যাহত ৰাখিছিল বুলি ভুক্তভোগীয়ে দাবী কৰিছে।
ভুক্তভোগীৰ অভিযোগৰ ভিত্তিত আৰক্ষীয়ে ভণ্ড বাবাৰ ঠিকনাত তালাচী চলায়। তেওঁৰ গোপন কোঠাৰ পৰা বহু আপত্তিজনক সামগ্ৰী উদ্ধাৰ কৰা হয়। তালাচীত ১২টা লেপটপ, ১১টা মোবাইল ফোন, ১৯টা হাৰ্ড ডিস্ক আৰু নগদ ৬.৫ লাখ টকা উদ্ধাৰ কৰা হয়। ইয়াৰ উপৰি সোণৰ গহনা, গৰ্ভনিৰোধক টেবলেট, ড্ৰাগছ আদিও উদ্ধাৰ কৰা হৈছে বুলি আৰক্ষীৰ সূত্ৰই প্ৰকাশ কৰিছে।
