মঙলবাৰে নিশা হোৱা প্ৰবল বৰষুণৰ ফলত ক্ষতিগ্ৰস্ত হৈছে মুম্বাই (Rain hits Mumbai)। বিগত ২৪ ঘণ্টাত ৩০০ মিলিমিটাৰ বৰষুণৰ ফলত বাণিজ্যিক চহৰখনৰ এক বিশাল অঞ্চল প্লাৱিত (Vast area flooded) হয়। কেৱল বৰষুণেই নহয়, ইয়াৰ লগত ধুমুহায়ো জুৰুলা কৰে। মহানগৰীৰ বিভিন্ন স্থানত উভালি পৰে গছ-গছনি আৰু বিদ্যুতৰ খুঁটা। দক্ষিণ মুম্বাইত ২৪৮ মিলিমিটাৰ বৰষুণ হৈছে। বিগত এক দশকত এই জুন মাহত মুম্বাইত এয়াই হৈছে সৰ্বাধিক বৰষুণ। এই প্ৰাকৃতিক দুৰ্যোগৰ বাবে বাণিজ্যিক চহৰখনৰ স্বাভাৱিক জীৱন-যাত্ৰা ব্যাহত হৈ পৰে।
আনহাতে, বুধবাৰে পুৱাৰে পৰা বৰষুণৰ পৰিমাণ আৰু অধিক বৃদ্ধি পায়। মুম্বাই আৰু পালঘৰত বৰষুণৰ বাবে জাৰি কৰা হৈছে ৰেড এলাৰ্ট। আনহাতে, থানে, ৰায়গড়, পালঘৰ আৰু সিন্ধদুৰ্গতো প্ৰবল বৰষুণৰ সতৰ্কবাণী জাৰি কৰা হৈছে। বৃহনমুম্বাই পৌৰ নিগমে জনোৱা মতে, মঙলবাৰ নিশা ৮ বজাৰ পৰা বুধবাৰে পুৱা ৬ বজালৈকে অঞ্চলটোত ১৮৪ মিলিমিটাৰ বৰষুণ হৈছে।
মুম্বাইৰ পশ্চিম অংশত ১৫৪ মিলিমিটাৰ আৰু পূব অংশত ১৯০ মিলিমিটাৰ বৰষুণ হৈছে। নিৰ্ধাৰিত সময়ৰ ১৩ দিনৰ পাছত মঙলবাৰে মুম্বাইত উপস্থিত হয় মৌচুমী বায়ু। এই পৰিস্থিতিৰ সৈতে মোকাবিলা কৰিবলৈ বিএমচিয়ে ৭ হাজাৰ জোৱান নিয়োগ কৰিছে। দাদৰ ষ্টেচনৰ সমীপত এখন গাড়ীৰ ওপৰত গছ বাগৰি পৰে।
অৱশ্যে গাড়ীখনত কোনো নথকাৰ বাবে কোনো লোক নিহত বা আহত হোৱা নাই। বতৰ বিজ্ঞান বিভাগে আগন্তুক দিনত অধিক বৰষুণৰ ভৱিষ্যদ্বাণী কৰিছে। পাৰেলত সৰ্বাধিক বৰষুণ (৩৩৪ মিলিমিটাৰ) হয়। ইয়াৰ পিছতে মালাদ (৩১৩ মিলিমিটাৰ), পোৱাই (২৯৪), দাদৰ, ৱাডালা (২৯০), কান্দিৱলী (২৮৪), বৰিভালি (২৫৭) আৰু বান্দ্ৰাত (২৫৪) সৰ্বাধিক বৰষুণ ৰেকৰ্ড কৰা হয়।
