শুকুৰবাৰে প্ৰধানমন্ত্ৰী নৰেন্দ্ৰ মোদীয়ে দেশজোৰা এক কাৰ্যসূচীৰ অংশ হিচাপে পঞ্জাবৰ জলন্ধৰৰ পৰা অমৃত ভাৰত ষ্টেচন আঁচনি (Amrit Bharat Station Scheme)ৰ অধীনত ৭৫টা পুনৰ উন্নীতকৰণ ৰে’ল ষ্টেচন (Upgraded train station)ৰ ভাৰ্চুৱেলী উদ্বোধন (Virtual inauguration) কৰে। প্ৰধানমন্ত্ৰীয়ে উদ্বোধন কৰা ৭৫টা ষ্টেচনৰ ভিতৰত অসমৰ ১১৭ বছৰীয়া ৰে’ল ইতিহাসৰ সাক্ষী হৈ অহা মাজবাট ৰে’ল ষ্টেচনো (Majbat Rail station) আছে। এই উপলক্ষে মাজবাটত অনুষ্ঠিত উদ্বোধনী অনুষ্ঠানত অসমৰ ৰাজ্যপাল লক্ষ্মণ প্ৰসাদ আচাৰ্যই অংশগ্ৰহণ কৰে আৰু ষ্টেচনটোৰ উদ্বোধনী ফলক উন্মোচন কৰে।
এই উপলক্ষে প্ৰদান কৰা ভাষণত ৰাজ্যপাল আচাৰ্যই কয় যে মাজবাট ষ্টেচনক উন্নীত কৰি অমৃত ষ্টেচন হিচাপে উদ্বোধন কৰাৰৰ ফলত অঞ্চলটোৰ পৰ্যটন, কৰ্মসংস্থাপন আৰু স্থানীয় বাণিজ্য বৃদ্ধিৰ ক্ষেত্ৰত অৰিহণা যোগাব। উল্লেখ্য যে নতুন ষ্টেচনটোত যাত্ৰীৰ বাবে আধুনিক সুবিধা, পাৰ্কিঙৰ বৰ্ধিত সুবিধা, যাত্ৰীৰ বাবে বিশাল পৰিসৰৰ অপেক্ষা এলেকা আৰু পানী সংৰক্ষণ, সৌৰশক্তি আৰু সেউজ স্থানৰ ব্যৱস্থা আছে।
তেওঁ লগতে এই নতুন ষ্টেচনটোক গুৰুত্বপূৰ্ণ ৰাজহুৱা সম্পত্তি হিচাপে সংৰক্ষণ কৰিবলৈ নাগৰিকসকলক আহ্বান জনায়। লগতে ষ্টেচনটোৰ পৰিষ্কাৰ-পৰিচ্ছন্নতা, সুৰক্ষা আৰু ৰক্ষণাবেক্ষণৰ বাবে ৰাইজ বিশেষকৈ যুৱপ্ৰজন্মক সমূহীয়াভাৱে দায়িত্ব গ্ৰহণ কৰিবলৈ আহ্বান জনায়। এই উপলক্ষে আয়োজিত অনুষ্ঠানত ৰাজ্যৰ পশুপালন আৰু পশু চিকিৎসা বিভাগৰ মন্ত্ৰী নীলিমা দেৱী, পৰিবহণ আৰু বড়োলেণ্ড কল্যাণ মন্ত্ৰী চৰণ বড়ো, উত্তৰ-পূব সীমান্ত ৰে’লৱেৰ জেনেৰেল মেনেজাৰ চেতন কুমাৰ শ্ৰীবাস্তৱ, ৰঙিয়া সংমণ্ডলৰ বিভাগীয় ৰে’লৱে প্ৰবন্ধক অনন্ত সদাশিৱ, ভাৰতীয় ৰে’লৱেৰ জ্যেষ্ঠ বিষয়া আৰু অন্যান্য বিশিষ্ট ব্যক্তিসকল উপস্থিত থাকে।
