ভাৰতীয় নিৰ্বাচন আয়োগৰ ভিতৰচ’ৰাত চলি থকা একনায়কত্ববাদ আৰু সমগ্ৰ দেশজুৰি লাখ লাখ বৈধ নাগৰিকক ভোটাৰ তালিকাৰ পৰা ইচ্ছাকৃতভাৱে বাদ দিয়াত ৰাইজৰ দলে গভীৰ উদ্বেগ আৰু তীব্ৰ ক্ষোভ প্ৰকাশ কৰিছে। সংবাদ মাধ্যমত প্ৰকাশিত শেহতীয়া তথ্য অনুসৰি, দেশজুৰি প্ৰায় ১৩ কোটিৰো অধিক ভোটাৰৰ নাম তালিকাৰ পৰা কৰ্তন কৰাৰ সময়ত আয়োগৰ দুজন নিৰ্বাচনী আয়ুক্ত—সুখবীৰ সিং সান্ধু আৰু বিবেক যোশীক সম্পূর্ণ অন্ধকাৰত ৰখা হৈছিল।
মুখ্য নিৰ্বাচন আয়ুক্ত জ্ঞানেশ কুমাৰৰ অসাংবিধানিক আৰু স্বেচ্ছাচাৰী কাৰ্যকলাপৰ বিৰুদ্ধে দুজন আয়ুক্তই ১০ মাহত কমেও ১৪ বাৰ লিখিত আপত্তি দৰ্শাবলৈ বাধ্য হোৱা ঘটনাই আয়োগৰ আভ্যন্তৰীণ সমন্বয়হীনতা আৰু শাসকীয় বিজেপি দলৰ অবাধ হস্তক্ষেপ উদঙাই দিছে। নিয়ম উলংঘা কৰি ‘ফৰ্ম-৬’ ৰ সালসলনি কৰা আৰু স্থানীয় নিৰ্বাচন পঞ্জীয়ন বিষয়া সকলৰ আইনী ক্ষমতা কাঢ়ি লৈ সমগ্ৰ ভোটাৰৰ তথ্য নতুন দিল্লীত কেন্দ্ৰীভূত কৰা কাৰ্যক ৰাইজৰ দলে তীব্ৰ ধিক্কাৰ জনায়।
ৰাইজৰ দলৰ প্ৰকাশ কৰে যে নিৰ্বাচন আয়োগ ভাৰতীয় গণতন্ত্ৰৰ ৰক্ষাকবচ হ’ব লাগিছিল, কিন্তু বৰ্তমান ই শাসকীয় পক্ষৰ হাতৰ পুতলালৈ ৰূপান্তৰিত হৈছে । যেতিয়া স্বয়ং নিৰ্বাচন আয়ুক্তদ্বয়েই আয়োগৰ হঠকাৰী সিদ্ধান্তৰ বিৰুদ্ধে আপত্তি দৰ্শাবলগীয়া হয়, তেতিয়া দেশৰ নিৰ্বাচনী প্ৰক্ৰিয়াৰ ওপৰত জনসাধাৰণৰ বিশ্বাস সম্পূৰ্ণভাৱে ভাঙি পৰে।
সংবাদ মাধ্যমলৈ প্ৰেৰণ কৰা বিবৃতিত দলৰ সভাপতি অখিল গগৈ ডাঙৰীয়াই উল্লেখ কৰে ৰাইজৰ দলে ২৪ ঘন্টাৰ ভিতৰত মুখ্য নিৰ্বাচনী আয়ুক্ত জ্ঞানেশ কুমাৰৰ পদত্যাগৰ লগতে তেওঁৰ দিনত অনুষ্ঠিত আটাইবোৰ নিৰ্বাচন পুনৰ অনুষ্ঠিত কৰাৰ দাবী জনায়। সভাপতি গৰাকীয়ে বিগত অসম বিধান সভাৰ নিৰ্বাচনৰ বৈধতা সম্পৰ্কেও প্ৰশ্ন তোলাৰ লগতে সমষ্টিৰ পুনৰ নিৰ্ধাৰণ প্ৰক্ৰিয়াও নিয়মমতে হোৱা নাছিল বুলি মত প্ৰকাশ কৰে।
