৬ অক্টোবৰত অনুষ্ঠিত হ’বলগীয়া নগাঁও লোকসভা সমষ্টিৰ উপনিৰ্বাচনৰ ভোটগ্ৰহণৰ বাবে কাইলৈ ভোটগ্ৰহণকাৰী বিষয়াৰ দলসমূহ নগাঁও আৰু মৰিগাঁও চহৰৰ পৰা ৰাওনা হ’ব। নগাঁও জিলাৰ ৰহা আৰু নগাঁও-বটদ্ৰৱা সমষ্টিৰ বাবে নগাঁও ল’ৰাৰ উচ্চতৰ মাধ্যমিক বিদ্যালয়, ৰূপহীহাট, চামগুৰি আৰু ধিং সমষ্টিৰ বাবে নগাঁৱৰ ডচন উচ্চতৰ মাধ্যমিক বহুমুখী বিদ্যালয় আৰু মৰিগাঁও, জাগীৰোড আৰু লাহৰিঘাট সমষ্টিৰ বাবে মৰিগাঁও মহাবিদ্যালয়ৰ পৰা সৰ্বমুঠ ১১,৫৩৫ গৰাকী ভোটগ্ৰহণকাৰী বিষয়া -কৰ্মচাৰী কাইলৈ আগবেলাৰ ভিতৰতে ৰাওনা হ’ব।
ইয়াৰে পোলিং আৰু প্ৰিজাইডিং বিষয়া হৈছে ৯২২৮ আৰু ২৩০৭ জন নিৰাপত্তাৰক্ষী। তেওঁলোকে নগাঁও জিলাৰ ১৩৩৯ টা আৰু মৰিগাঁও জিলাৰ ৯৬৮ টা, অৰ্থাৎ মুঠ ২৩০৭ টা ভোটগ্ৰহণ কেন্দ্ৰত ভোটগ্ৰহণৰ বাবে ৰাওনা হ’ব। প্ৰশাসনে ইয়াৰে ৬২৪ টা কেন্দ্ৰক ভিন ভিন দৃষ্টিকোণৰ পৰা স্পষ্টকাতৰ বুলি চিনাক্ত কৰিছে। সংসদীয় সমষ্টিটোৰ অন্তৰ্গত নগাঁও আৰু মৰিগাঁও জিলাৰ মুঠ ৮ টা বিধানসভা সমষ্টিৰ মুঠ ভোটাৰৰ সংখ্যা হৈছে ১৯,০২,০০৯ জন।
ইয়াৰে ৯,৫৮,৫৯৫ জন পুৰুষ, ৯,৪৩,৩৬৪ গৰাকী মহিলা আৰু ৫০ গৰাকী তৃতীয় লিংগৰ ব্যক্তি। ডি-ভোটাৰৰ সংখ্যা হৈছে ১০,৭৮২ জন। পোলিং -প্ৰিজাইডিং বিষয়াৰ উপৰিও ২০৩ জন ছেক্টৰ বিষয়া আৰু ৫৩ জন জ’নেল বিষয়ায়ো ক্ষেত্ৰ পৰ্যায়ত নিজ নিজ অঞ্চলত উপস্থিত থাকিব। নগাঁও জিলাৰ বাবে নিয়োজিত ৫৪ জন মাইক্ৰো অবজাৰভাৰে ভোটগ্ৰহণৰ দিনা স্পৰ্শকাতৰ ভোটগ্ৰহণ কেন্দ্ৰসমূহৰ কামকাজ পৰ্যবেক্ষণ কৰিব।
নগাঁও জিলাৰ তথ্য আৰু জনসংযোগ বিষয়া বিকাশ শৰ্মাই এই কথা প্ৰকাশ কৰি জনাইছে যে, নগাঁও আৰু মৰিগাঁও জিলা প্ৰশাসনে ইয়াৰ বাবে সকলো ব্যৱস্থা সম্পূৰ্ণ কৰি তুলিছে। ভোটগ্ৰহণকাৰী বিষয়াসকলৰ বাবে উপযুক্ত খাদ্য আৰু পৰ্য্যাপ্ত যানবাহনৰো ব্যৱস্থা কৰা হৈছে। নগাঁও ল’ৰাৰ চৰকাৰী উচ্চতৰ মাধ্যমিক বিদ্যালয়ৰ বাবে নেহেৰুবালি খেলপথাৰত যানবাহন ৰখোৱাৰ লগতে খাদ্যগ্ৰহণৰ ব্যৱস্থা কৰাৰ বিপৰীতে ডচন স্কুলৰ বাবে গৰুফিল্ডত যানবাহন ৰখাৰ ব্যৱস্থা কৰা হৈছে। মৰিগাঁও জিলাৰ বাবে গাছবাৰী, দলবাৰী আৰু ভেটেনেৰী খেলপথাৰত গাড়ী ৰখাৰ ব্যৱস্থা কৰা হৈছে।
কেৱল ভোটগ্ৰহণকাৰী দলৰ বাবেই নগাঁও জিলাত ৫৮৪ খন আৰু মৰিগাঁও জিলাত ৪২৭ খন সৰু-ডাঙৰ গাড়ীৰ ব্যৱস্থা কৰা হৈছে। নিৰ্বাচন সম্পূৰ্ণ সুকলমে আৰু শান্তিপূৰ্ণভাৱে অনুষ্ঠিত কৰাৰ বাবে প্ৰশাসনৰ তৰফৰ পৰা ব্যাপক তৎপৰতা চলোৱা হৈছে। সাম্ভাব্য যিকোনো ধৰণৰ হিংসাত্মক গতিবিধি ৰোধ কৰাৰ বাবে নিতৌ আৰক্ষী আৰু অৰ্ধসামৰিক বাহিনীৰ দ্বাৰা ঠায়ে ঠায়ে ফ্লেগমাৰ্চ অব্যাহত ৰাখিছে।
আৰক্ষীয়ে নিয়মীয়া তহলদাৰী বৃদ্ধি কৰিছে। আজিও জনসংযোগ বিভাগৰ দ্বাৰা চামগুৰি, ধিং আৰু ৰূপহীহাট সমষ্টিত ভ্ৰাম্যমাণ দূৰভাষ যন্ত্ৰৰ জৰিয়তে শান্তি ৰক্ষাৰ বাবে ব্যাপক সজাগতামূলক প্ৰচাৰ চলাই থকা দেখা গৈছে। লোকসভা সমষ্টিটোৰ এই উপ-নিৰ্বাচনৰ ৰিটাৰ্ণিং বিষয়া আৰণ্যক শইকীয়াই সমূহ ৰাইজক যিকোনো প্ৰভাবৰ পৰা মুক্ত হৈ আনন্দমনেৰে নিজৰ ভোটাধিকাৰ সাব্যস্ত কৰি গণতন্ত্ৰক সবল কৰি তুলিবলৈ আহ্বান জনাইছে।
